រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា ប្តីប្រពន្ធ២នាក់ត្រូវបានកំលាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃចាប់ឃាត់ខ្លួន បន្ទាប់ពីម្ចាស់ក្រុមហ៊ុនទិញ-លក់រថយន្តបង់រំលស់បានប្តឹងមកថា ប្តីប្រពន្ធទាំង២នាក់នេះទិញរថយន្តបង់រំលោះ ហើយបានក្លែងឯកសារយករថយន្តទៅលក់ជាបន្តបន្ទាប់ចំនួន៣គ្រឿងរួចរត់គេចខ្លួនបាត់។
ហេតុការណ៍នេះបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី១ ខែមេសា ឆ្នាំ២០១៩ នៅចំណុចផ្លូវខាងសារិន ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។
ភ្លាមៗនោះ ប្តីប្រពន្ធទាំង២នាក់ខាងលើពុំត្រូវបានស្គាល់ឈ្មោះនៅឡើយទេ។
តាមប្រភពពីសមត្ថកិច្ចបានឲ្យដឹងថា ការឃាត់ខ្លួនប្តីប្រពន្ធទាង២នាក់ខាងលើនេះធ្វើឡើងតាមបណ្តឹងរបស់ម្ចាស់ក្រុមហ៊ុនទិញលក់រថយន្តបង់រំលស់មួយកន្លែង។
តាមប្រភពដដែលបានអោយដឹងបន្តថា ប្តីប្រពន្ធទាំង២នាក់ខាងលើបានទៅទិញរថយន្តពីក្រុមហ៊ុនទិញ-លក់រថយន្តមួយកន្លែងដោយបង់លស់ ហើយបានក្លែងឯកសារយករថយន្តទៅលក់ជាបន្តបន្ទាប់ចំនួន៣គ្រឿង រួចរត់គេចខ្លួនបាត់ ។ បន្ទាប់ពីដឹងថាចាញ់បោកគេ ម្ចាស់ក្រុមហ៊ុនទិញ-លក់រថយន្តបង់រំលស់ក៍បានទៅដាក់ពាក្យបណ្តឹងនៅនគរបាលនាយកដ្ឋានព្រហ្មទណ្ឌក្រសួងមហាផ្ទៃ ។
ប្រភពដដែលបានបន្តទៀតថា លុះនៅព្រឹកថ្ងៃទី១ ខែមេសា ឆ្នាំ២០១៩ ម្ចាស់រថយន្តបានប្រទះឃើញជនសង្ស័យទាំង២នាក់ធ្វើដំណើរតាមដងផ្លូវ ក៍រាយការណ៍ទៅនគរបាលប៉ុស្តិ៍ឬស្សីកែវ អោយជួយចាប់ឃាត់ខ្លួន និងបានហៅនគរបាលព្រហ្មទណ្ឌក្រសួងមហាផ្ទៃមកនាំជនសង្ស័យទាំង២នាក់ទៅធ្វើការសាកសួរ និងចាត់ការតាមច្បាប់តែម្តង។
ទោះបីជាយ៉ាងណា នគរបាលពុំបានផ្តល់ព័ត៌មានលំអិតជុំវិញការឃាត់ខ្លួន២នាក់ប្តីប្រពន្ធខាងលើនោះនៅឡើយទេ ។ ព័ត៌មានលម្អិតនឹងមានផ្សាយជូននៅពេលក្រោយ ៕
ចែករំលែកព័តមាននេះ