ខេត្តកំពត ៖ កម្មករសំណង់២នាក់បានត្រូវខ្សែភ្លើងឆក់ឲ្យរងរបួសយ៉ាងធ្ងន់ធ្ងរ ខណៈកំពុងធ្វើសំណង់ក្នុងការដ្ឋានអគារមួយកន្លែងនៅចំណុចកាច់ជ្រុងផ្លូវបែកជាបួន ចូលទៅវត្តត្រើយកោះ ស្ថិតក្នុងភូមិទ្វីខាងត្បូង សង្កាត់អណ្តូងខ្មែរ ក្រុងកំពត បង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរកន្លែងកើតហេតុ និងអ្នកធ្វើដំណើរឆ្លងកាត់មុខការដ្ឋានសំណង់អាគារខាងលើនោះ ដែលបានកើតឡើងកាលពីវេលាម៉ោង៩និង៣០នាទីព្រឹកថ្ងៃទី០១ ខែមេសា ឆ្នាំ២០១៩ ស្ថិតនៅចំណុចខាងលើ ។
កម្មកររងគ្រោះដែលឆក់ខ្សែភ្លើងទាំងពីរនាក់មានឈ្មោះទី១-ឈ្មោះ អុន អាត ភេទប្រុស អាយុ២៣ឆ្នាំ និងទី២-ឈ្មោះ ធា ធី ភេទប្រុស អាយុ២៦ឆ្នាំ ទាំងពីរនាក់មានស្រុកកំណើតនៅឃុំភ្នំទង ស្រុកអន្លុងវែង ខេត្តឧត្តរមានជ័យ ។
តាមសំដីជនរងគ្រោះទាំងពីរនាក់បានឲ្យដឹងថា មុនពេលកើតហេតុខ្លួនទាំងពីរនាក់បានដោះរន្ទាដែកនៅជញ្ជាំងដែលបូកហើយនៅពេលខ្លួនកំពុងតែកាន់ដែកផ្តេកដើម្បីរៀបតំឡើងរន្ទានៅជញ្ជាំងម្ខាងទៀតមិនទាន់បានរៀបផង គ្រាន់តែផ្តេករន្ទាក៏ប៉ះនឹងខ្សែភ្លើងស្រាតបីសរសៃនៅក្បែរជញ្ជាំងនោះក៏ឆក់ធ្លាក់មកលើស្បៃដែលបាំងការដ្ឋានសំណង់ទាំងពីរនាក់តែម្តង ។
ប្រភពជាច្រើនបានរិះគន់មកលើម្ចាស់សំណង់អគារ និងមន្ត្រីរមន្ទីរជំនាញក្រុងកំពតថា សំណង់អគារដែលឆក់កម្មករនេះ គឺបណ្តាលមកពីការសាងសង់រំលោភលើចំណីផ្លូវ ដែលសំណង់នេះជាប់កៀកនឹងខ្សែភ្លើងស្រាត ( គម្លាតកន្លះម៉ែត្រ) ពីជញ្ជាំងអគារពេលកម្មករលើកដែកនៅជិតខ្សែភ្លើងបណ្តាលឲ្យភ្លើងអគ្គីសនីស្រូបឆក់តែម្តង ។
ប្រភពដដែលបានលើកឡើងទៀតថា សំណង់នេះបើតាមច្បាប់សាងសង់គឺមិនអាចអនុញ្ញាតឲ្យសាងសង់រំលោភចំណីផ្លូវដូច្នេះទេ ប៉ុន្តែការសាងសង់សំណង់ខាងលើនេះទៅបាន គេមានការសង្ស័យទៅលើម្ចាស់សំណង់ និងមន្ត្រីជំនាញមានការឃុបឃិតបិទភ្នែកជាមួយម្ចាស់សំណង់ ទើបហ៊ានសង់កៀកនឹងខ្សែភ្លើងបង្កឲ្យមានគ្រោះថ្នាក់ដល់កម្មករសំណង់យ៉ាងនេះ ។
ជុំវិញហេតុការខាងលើ កោះសន្តិភាព បានភ្ជាប់ទូរស័ព្ទទៅលោក ផូ បូរ៉ា ប្រធានសំណង់ក្រុងកំពត ដើម្បីបំភ្លឺជុំវិញសំណង់ខាងលើ តែទូរស័ព្ទជាប់រវល់រហូត ។ ភ្នាក់ងារកោះសន្តិភាពក៏បានទំនាក់ទំនងលោក លាង រឿនសុទ្ធី អភិបាលក្រុងកំពត ដើម្បីស្រាយបំភ្លឺជុំវិញសំណងខាងលើត្រូវបានលោកប្រាប់ថា សំណង់ភាគច្រើននៅក្នុងក្រុងកំពតគឺសុទ្ធតែមានច្បាប់ទាំងអស់ ប៉ុន្តែសំណង់អគារដែលកំពុងសង់នៅចំណុចកើតហេតុដែលមតិមួយចំនួនសង្ស័យថា សំណង់ខាងលើសង់រំលោភចំណីផ្លូវនេះលោកពុំទាន់បានដឹងថាតើមានច្បាប់ឬមិនមានច្បាប់នោះទេ ពីព្រោះលោកពុំទាន់បានសួរទៅមន្ត្រីជំនាញក្រុងកំពត ៕
ចែករំលែកព័តមាននេះ