រាជធានីភ្នំពេញ ៖ ព្រះករុណាព្រះបាទសម្តេចព្រះបរមនាថនរោត្តមសីហមុនីព្រះមហាក្សត្រនៃព្រះរាជាណាចកក្រកម្ពុជាបានកោតសរសើររាជរដ្ឋាភិបាលដែលបានដឹកនាំប្រទេសមានសុខសន្តិភាព និងរីកចម្រើន ។ នេះបើតាមព្រះរាជសាររបស់ព្រះអង្គក្នុងសម័យប្រជុំលើកទី២ នីតិកាលទី៦ រដ្ឋសភា នាព្រឹកថ្ងៃទី០១ ខែមេសា ឆ្នាំ២០១៩នេះ ក្រោមអធិបតីសម្តេចហេង សំរិនប្រធានរដ្ឋសភា ។
នៅក្នុងព្រះរាជសារផ្ញើជូនរដ្ឋសភាព្រះករុណាព្រះមហាក្សត្របានកោតសរសើរចំពោះសម្តេច ហេង សំរិន ប្រធានរដ្ឋសភាព្រមទាំងថ្នាក់ដឹកនាំ និងសមាជិកសមាជិការដ្ឋសភាទាំងអស់ ដែលបានបំពេញការងារអស់ពីកម្លាំងកាយចិត្តពុំគិតពីការនឿយហត់ខិតខំយកចិត្តទុកដាក់ក្នុងការបម្រើប្រជាពលរដ្ឋ និងបានដោះស្រាយនូវរាល់បញ្ហាប្រឈមនានាបានដោយជោគជ័យតាមលំដាប់លំដោយ ។ ព្រះរាជសារបានបន្តថា ការខិតខំប្រឹងប្រែងរបស់សម្តេចប្រធានរដ្ឋសភាសមាជិកសមាជិកានៃរដ្ឋសភាគ្រប់រូប គឺជាសកម្មភាពបម្រើប្រជាពលរដ្ឋដែលជាភារកិច្ចរបស់រដ្ឋសភានោះរួមមានការអញ្ជើញយ៉ាងសកម្មចុះសួរសុខទុក្ខជួយដោះស្រាយបញ្ហាប្រជារាស្ត្រជាម្ចាស់ឆ្នោតនៅតាមមូលដ្ឋានព្រមទាំងទទួលយកនូវរាល់បញ្ហាកង្វល់ និងបញ្ហាប្រឈម នានាមកជម្រាបជូនរាជរដ្ឋាភិបាល ដើម្បីរិះរកវិធានការដោះស្រាយជាបន្ទាន់នូវបញ្ហាទាំងឡាយនោះ ។
នៅក្នុងព្រះរាជសារផ្ញើជូនសម័យប្រជុំរដ្ឋសភាលើកទី២នីតិកាលទី៦នេះព្រះមហាក្សត្រក៏បានកោតសរសើរចំពោះសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលមានគុណបំណាច់ដ៏ថ្លៃថ្លាក្នុងការបម្រើប្រទេសជាតិ ។ ព្រះមហាក្សត្របានគូសបញ្ជាក់ថា «វីរភាពដ៏ឧត្តុង្គឧត្តម និងជាមគ្គុទេសដ៏ឆ្នើមដឹកនាំប្រទេសប្រកបដោយគតិបណ្ឌិត និងសក្តានុពលរបស់សម្តេចនាយកបានធ្វើឲ្យព្រះរាជាណាចក្រកម្ពុជាមានសុខសន្តិភាព ស្ថិរភាពសង្គម និងការអភិវឌ្ឍជាតិរីកចម្រើនលើគ្រប់វិស័យជាលំដាប់រហូតមកទល់ពេលនេះ» ។
ព្រះមហាក្សត្រទ្រង់បានគូសបញ្ជាក់ថា រយៈពេលកន្លងមកនេះរដ្ឋសភាបានយកចិត្តទុកដាក់ សហការជាមួយរាជរដ្ឋាភិបាលធានាការពារនូវសន្តិភាព ស្ថិរភាព សន្តិសុខ និងសុវត្ថិភាព សម្រាប់ការរស់នៅដោយសុខក្សេមក្សាន្តរបស់ប្រជាពលរដ្ឋគ្រប់ទិសទីក្នុងផ្ទៃប្រទេស និងប្រឹងប្រែងបន្តអភិវឌ្ឍន៍សេដ្ឋកិច្ច និងសង្គមគ្រប់វិស័យដោយផ្តោតជាអាទិភាពទៅលើការកែទម្រង់អភិបាលកិច្ចល្អ ការកសាង សមត្ថភាព អភិវឌ្ឍធនធានមនុស្ស និងការវិនិយោគលើហេដ្ឋា រចនាសម្ព័ន្ធ ដើម្បីជំរុញលើកកម្ពស់ និងកែលម្អជីវភាពប្រជាពលរដ្ឋឲ្យកាន់តែប្រសើរឡើង និង ពង្រឹងប្រព័ន្ធគាំពារសង្គម សម្រាប់ប្រជាពលរដ្ឋគ្រប់រូប ពិសេសអ្នកក្រីក្រ និងជនងាយរង គ្រោះ ។
នៅក្នុងព្រះរាជសារផ្ញើជូនរដ្ឋសភានាឱកាសនេះព្រះករុណាព្រះបាទសម្តេចព្រះបរមនាថ នរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជាព្រះអង្គបានគូសបញ្ជាក់ថា«ខ្ញុំមានសេចក្តីសង្ឃឹមថា រដ្ឋសភាដ៏ឧត្តុង្គឧត្តមជាតំណាងរបស់ប្រជាពលរដ្ឋទូទាំងព្រះរាជាណាចក្រកម្ពុជានឹងបន្តខិតខំប្រឹងប្រែងដោះស្រាយបញ្ហាប្រឈមចំពោះមុខបន្តទៀតសំដៅធានាបាននូវសង្គមជាតិកម្ពុជាប្រកបដោយភាពសុខដុមរមនាមានសន្តិភាព ស្ថិរភាព នយោបាយ និងការអភិវឌ្ឍទៅតាមទិសដៅរួមជាជំហានៗ» ។
សូមជម្រាបថា នៅក្នុងសម័យប្រជុំរដ្ឋសភាថ្ងៃទី០១ ខែមេសា ឆ្នាំ២០១៩ ដែលជាឱកាសបើកបវេសនកាលសម័យប្រជុំរដ្ឋសភាលើកទី២ នីតិកាលទី៦នេះមានរបៀបវារៈចំនួន៤មាន ១- ព្រះរាជសារព្រះករុណាព្រះបាទសម្តេចព្រះបរមនាថនរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជាជូនសម័យប្រជុំរដ្ឋសភាលើកទី២ នីតិកាលទី៦ ។ ២-របាយការណ៍ស្តីពីសកម្មភាពរបស់រដ្ឋសភាចន្លោះសម័យប្រជុំរដ្ឋសភាលើកទី១ និងលើកទី២ នីតិកាលទី៦ ។ ៣- ការបោះឆ្នោតជ្រើសតាំងលោកជំទាវ លី វួចឡេង ជាសមាជិកក្រុមប្រឹក្សាធម្មនុញ្ញសម្រាប់អាណត្តិឆ្នាំ(២០១៩-២០២៨) ។
៤- ការបោះឆ្នោតជ្រើសតាំង លោក ប្រាជ្ញ ច័ន្ទ ជាសមាជិកគណៈកម្មការសិទ្ធិមនុស្សទទួល ពាក្យបណ្តឹងអង្កេត និងទំនាក់ទំនងរដ្ឋសភាព្រឹទ្ធសភា និងលោកច័ន្ទ សុផល ជាសមាជិកគណៈកម្មការមហាផ្ទៃការពារជាតិ និងមុខងារសាធារណៈ ។ សម័យប្រជុំរដ្ឋសភាក្រោមអធិបតីភាពដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភាបានពិភាក្សា និងអនុម័តលើរបៀបវារៈជាលំដាប់លំដោយ ៕
ចែករំលែកព័តមាននេះ