ខេត្តបន្ទាយមានជ័យ ៖ តូបលក់អីវ៉ាន់៨៦០តូបនៅក្នុងផ្សារចំការគរ ហៅផ្សារថ្មី ក្រុងសិរីសោភ័ណ ត្រូវបានកម្លាំងនគរបាល និងប្រជាពលរដ្ឋបានចេញអន្តរាគមន៍ជួយសង្គ្រោះទាន់ពេលវេលា ដោយបាញ់ទឹកពន្លត់អគ្គីភ័យប្រើប្រាស់រថយន្តពន្លត់អគ្គីភ័យ៣គ្រឿង និងបំពង់ឧស្ម័នពន្លត់អគ្គីភ័យជាច្រើនបំពង់ ខណៈដែលមានអគ្គីភ័យឆេះតូបលក់សម្ភារជ័រសម្រាប់ក្មេងលេងទំហំ៥ម៉ែត្រគុណ៥ម៉ែត្រនៅក្នុងផ្សារចំការគរ…
ខេត្តបន្ទាយមានជ័យ ៖ តូបលក់អីវ៉ាន់៨៦០តូបនៅក្នុងផ្សារចំការគរ ហៅផ្សារថ្មី ក្រុងសិរីសោភ័ណ ត្រូវបានកម្លាំងនគរបាល និងប្រជាពលរដ្ឋបានចេញអន្តរាគមន៍ជួយសង្គ្រោះទាន់ពេលវេលា ដោយបាញ់ទឹកពន្លត់អគ្គីភ័យប្រើប្រាស់រថយន្តពន្លត់អគ្គីភ័យ៣គ្រឿង និងបំពង់ឧស្ម័នពន្លត់អគ្គីភ័យជាច្រើនបំពង់ ខណៈដែលមានអគ្គីភ័យឆេះតូបលក់សម្ភារជ័រសម្រាប់ក្មេងលេងទំហំ៥ម៉ែត្រគុណ៥ម៉ែត្រនៅក្នុងផ្សារចំការគរ ហៅផ្សារថ្មី វេលាម៉ោង៤និង៣០នាទីព្រឹក ថ្ងៃទី១ ខែមេសា ឆ្នាំ២០១៩ ដែលម្ចាស់តូបបានបិទចាក់សោចោលសម្រាកនៅផ្ទះ អគ្គីភ័យឆេះតូបលក់សម្ភារជ័រឆេះអស់ទាំងស្រុងនេះគិតជាទឹកប្រាក់ប្រមាណ២ម៉ឺនដុល្លារ ។
អធិការនគរបាលក្រុងសិរីសោភ័ណលោកវរសេនីយ៍ឯក ស៊ី ឌី បានប្រាប់ ឱ្យដឹងថា តូបលក់សម្ភារជ័រសម្រាប់ក្មេងលេងតូបលេខ៥៣៧ម្ចាស់ឈ្មោះ សំ ឌី ភេទប្រុស អាយុ៦៣ឆ្នាំ រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ បានរងការឆាបឆេះខូចខាតទាំងស្រុងសរុបជាទឹកប្រាក់ប្រមាណ២ម៉ឺនដុល្លារ ។
លោកអធិការប្រាប់ឱ្យដឹងទៀតថា តាមការសាកសួររបស់សមត្ថកិច្ចចំពោះប្រជាពលរដ្ឋដែលឃើញហេតុការណ៍គេឃើញមុនពេលកើតហេតុភ្លើងចាប់ផ្តើមឆេះចេញពីក្នុងតូបខាងលើ បង្កឱ្យមានការភ្ញាក់ផ្អើលដល់អាជីវករដែលទៅរៀបចំបើកតូបលក់អីវ៉ាន់នៅក្បែរនោះ ខណៈដែលភ្លើងកំពុងឆេះតូបគឺមានប្រជាពលរដ្ឋបានយកបំពង់ពន្លត់អគ្គីភ័យជាច្រើនបំពង់នាំគ្នាបាញ់សង្គ្រោះបឋមទប់ស្កាត់ភ្លើងកុំឱ្យឆាបឆេះខ្លាំង ប៉ុន្តែមិនអាចទប់ស្កាត់បាននោះឡើយភ្លើងនៅតែបន្តឆេះ ។
បន្ទាប់មករថយន្តពន្លត់អគ្គីភ័យរបស់ស្នងការដ្ឋាននគរបាលខេត្ត២គ្រឿង និងរថយន្តពន្លត់អគ្គីភ័យរបស់អធិការដ្ឋាននគរបាលក្រុងសិរីសោភ័ណ១គ្រឿងបានចេញទៅជួយអន្តរាគមន៍ ទើបដោះស្រាយបញ្ហាអគ្គីភ័យនោះបានឆេះអស់តែមួយតូបប៉ុណ្ណោះ ។ ចំពោះអគ្គីភ័យនេះតាមការសន្និដ្ឋានរបស់សមត្តកិច្ច អាចបង្កឡើងដោយទុស្សេខ្សែភ្លើង ៕
ចែករំលែកព័តមាននេះ