ទង្វើបរទេសស្បែក.សម្នាក់នេះ…ធ្វើឱ្យយើងមានអារម្មណ៍បែបណាដែរ?
- ភ្នំពេញ
រាជធានីភ្នំពេញ ៖ តើនរណាស្មានដល់ថា ជនបរទេសស្បែកសម្នាក់ ហ៊ានមុជទឹកប្រឡាយបឹងត្របែក ដែលជាទូទៅ គឺជាទឹកស្អុុយខ្មៅកខ្វក់បំផុត ។ មិនមានព័ត៌មានត្រូវបានបំភ្លឺឱ្យដឹងនោះទេ ពីជនបរទេសរូបនេះ ។ ទោះបីជាបែបណា មានការផ្តល់អត្ថន័យផ្សេងៗគ្នា ជុំវិញការចុះងូតទឹកប្រឡាយបឹងត្របែកនេះ ដែលអ្នកខ្លះចង់បង្ហាញថា ទឹកស្អុុយក្នុងប្រឡាយបឹងត្របែកនេះមិនកខ្វក់ទេ តែអ្នកចោលសំរាមចូលប្រឡាយឯណោះទេ ដែលស្អុយ និងកខ្វក់បំផុតនោះ ។
ស្ថានភាពប្រឡាយទឹកស្អុយបឹងត្របែកសម្បូរទៅដោយសំរាមសក្បុស រកមើលផ្ទៃទឹកមិនឃើញ ហាក់បានប្រែប្រួលជាវិជ្ជមានមួយ ហើយបន្ទាប់ពីការពុះពាររបស់ក្រុមយុវជន សាន ដារ៉ាវីត និងគ្រប់គ្នាបានស្គាល់លើបណ្ដាញសង្គម ដែលបានផ្តួចផ្តើមក្នុងការប្រមូលសំរាមនៅប្រឡាយទឹកស្អុយបឹងត្របែក ចាប់តាំងពីថ្ងៃទី៨ មីនាកន្លងទៅថ្មីៗនេះ ។ សកម្មភាពរបស់ក្រុមយុវជនទាំងនោះ ពិតជាបានឆក់យកបេះដូងមនុស្សគ្រប់គ្នា ជាពិសេសអាជ្ញាធរដែលធ្លាប់តែដេកផ្សំដួលរមួលផ្សំគ្រេច ហាក់បានយកចិត្តដាក់ និងធ្វើការរារាំងការបោះចោលសំរាមថ្មីៗបន្ថែមទៀតចូលទៅក្នុងប្រឡាយនេះ ។
យុវជន សាន ដារ៉ាវីត បានប្រាប់អ្នកសារព័ត៌មានថា គោលបំណងរបស់ក្រុមខ្លួន គឺចង់ធ្វើឲ្យរាជធានីភ្នំពេញគ្មានសំរាមប្លាស្ទិក និងគ្មានដីហុយ ទើបកើតមានគំនិតមួយចុះប្រមូលសំរាមនេះ ។ យុវជនរូបនេះបានស្នើឲ្យចូលរួមសហការទាំងអស់គ្នា ចំពោះការចូលរួមសម្អាតបរិស្ថាន ជាពិសេសបញ្ហាសំរាម ដើម្បីលើកម្ពស់សោភ័ណភាព និងសុខុមាលភាពពលរដ្ឋផងដែរ ។ សាន ដារ៉ាវីត និយាយថា «សូមប្រជាពលរដ្ឋខ្មែរយើង ទាំង អស់គ្នា កុំចោទឬបន្ទោសអ្នកណាខុសអ្នកណាត្រូវ ឬអ្នកនៅខាងលើខាងក្រោមក៏ដោយ» ។
ទាក់ទងនឹងឥរិយាបថនៃការបោះសំរាមចូលទៅក្នុងប្រឡាយលូបឹងត្របែកនេះ យុវជន ដារ៉ាវីត អះអាងថា ក្នុងនាមជាយុវជនគ្រាន់តែព្យាយាមជួយរើស ឬសម្អាតបរិស្ថានទាំងអស់គ្នា ដើម្បីរាជធានីភ្នំពេញមានសោភ័ណភាព ដោយមិនចាំបាច់ទៅបន្ទោសឬជេរអ្នកណាដែរ ។«គម្រោងរបស់ខ្ញុំធ្វើនេះ គឺធ្វើដើម្បីឲ្យអ្នកសម្អាតច្រើនជាងអ្នកបោះ ដូច្នេះខ្ញុំមិនដឹងថាអ្នកបោះសំរាមច្រើនប៉ុណ្ណាទេ តែបច្ចុប្បន្ននេះ ខ្ញុំកំពុងបង្កើនអ្នកសម្អាតសំរាម» ។
លោក ដួង ចាន់សារ៉ាត់ ប្រធានលូទឹក បូមទឹក នៃមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យដឹងកាលពីពាក់កណ្តាលខែមីនាកន្លងមកថា តាមការណែនាំរបស់លោកប្រធានមន្ទីរ ក្រុមការងាររបស់លោកនឹងបញ្ចប់ការងារកាយសំរាមចេញពីប្រឡាយផ្លូវលេខ១០៥ បឹងត្របែក នៅក្នុងរយៈពេល២សប្ដាហ៍ទៀត។
លោកបានឲ្យដឹងថា ក្រុមការងាររបស់លោកបានដាក់គ្រឿងចក្រចុះកាយប្រឡាយនេះភ្លាមៗ តាមការណែនាំរបស់រដ្ឋបាលរាជធានីភ្នំពេញ។ ការកាយសំរាមនៅប្រឡាយបឹងត្របែកតាមផ្លូវលេខ១០៥នេះ មានភាពយឺតយ៉ាវបន្តិច ដោយសារតែផ្លូវមានការកកស្ទះចរាចរណ៍ និងមានរោងការ និងរោងបុណ្យនៅលើផ្លូវលេខ១០៥ មិនអាចឲ្យគ្រឿងចក្រចូលកាយសំរាមក្នុងប្រឡាយខាងលើបាន ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា មកដល់ពេលនេះ សកម្មភាពនៃការកាយស្តារប្រឡាយខាងលើ បានចំនួនពីរសប្ដាហ៍ហើយ ស្មើនឹង៤០ភាគរយ ។ ប្រឡាយបឹងត្របែកមានសារៈសំខាន់ណាស់ក្នុងការរំដោះទឹកចេញពីរាជធានីភ្នំពេញ ហើយត្រូវបានប្រជាពលរដ្ឋរស់នៅជុំវិញមាត់ប្រឡាយយកសំរាមមកបោះចូលទៅក្នុងប្រឡាយ បង្កឲ្យកកស្ទះណែនណាន់តាន់តាប់ ដែលធ្វើឲ្យមានបញ្ហាដល់ចរន្តទឹកហូរ ពិសេសប៉ះពាល់ធ្ងន់ធ្ងរដល់បរិស្ថានអនាម័យ និងសោភ័ណភាពរាជធានីភ្នំពេញ ៕
ចែករំលែកព័តមាននេះ