ខេត្តកណ្តាល ៖ ជនសង្សយ័ម្នាក់បានធ្វើសកម្មភាពយកដែកបំពង់ទីប និងពូថៅវាយបំបែកសោរបងផ្ទះមន្ត្រីរាជការម្នាក់ ហើយចូលទៅលួចយកម៉ូតូរបស់ជនរងគ្រោះដែលទុកក្នុងផ្ទះយកទៅបាត់អស់រយៈពេល២ថ្ងៃ ត្រូវនគរបាលស្រាវជ្រាវឃាត់ខ្លួនបាន។
ហេតុការណ៍នេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី២៨ ខែមីនា ឆ្នាំ២០១៩ នៅចំណុចផ្ទះជនរងគ្រោះ ស្ថិតក្នុងភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល។
ជនរងគ្រោះជាម្ចាស់ម៉ូតូឈ្មោះហេង រត្ន័សីម៉ា ភេទប្រុស អាយុ៥១ឆ្នាំ មុខរបរមន្ត្រីរាជការ មានទីលំនៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល ។ ចំណែកជនសង្ស័យឈ្មោះសែន រិទ្ធីយ៉ា ភេទប្រុស អាយុ២២ឆ្នាំ មុខរបរកម្មករឡឥដ្ឋ មានទីលំនៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល។
រីឯវត្ថុតាងចាប់យករួមមានម៉ូតូ១គ្រឿងម៉ាកហ្សូមមើអិច ស៊េរីឆ្នាំ២០១៧ ពណ៌ក្រហមលាយស គ្មានស្លាកលេខ (ជារបស់ជនរងគ្រោះ), ដែកបំពង់ទីបប្រវែង៧០សង្ទីម៉ែត្រចំនួន១ដើម, ពូថៅដងដែកប្រវែង៥៤សង្ទីម៉ែត្រចំនួន១ដើម និង កាបិតប៉័ងតោដងដែកប្រវែង២៩សង្ទីម៉ែត្រចំនួន១ ។
លោកវរសេនីយ៍ ស កែវពិសិដ្ឋ អធិការនគបាលក្រុងតាខ្មៅបានអោយដឹងថា កាលពីវេលាកើតហេតុខាងលើ ពេលជនរងគ្រោះមិនបាននៅផ្ទះ ស្រាប់តែជនសង្ស័យម្នាក់ខាងលើបានធ្វើសកម្មភាពយកដែកបំពង់ទីបនិងពូថៅវាយបំបែកសោរបងផ្ទះ ហើយចូលទៅលួចយកម៉ូតូរបស់ជនរងគ្រោះដែលទុកក្នុងផ្ទះយកទៅបាត់។
ប្រភពដដែលបានបន្តថា លុះដល់វេលាម៉ោង១០ព្រឹកថ្ងៃទី៣០ ខែមិនា ឆ្នាំ២០១៩ កំលាំងប៉ុស្តិ៍ដើមមៀន ក៏បានធ្វើការស្រាវជ្រាវចាប់ឃាត់ខ្លួនជនសង្ស័យម្នាក់និងវត្ថុតាងបញ្ជូនមកកាន់អធិការដ្ឋានចាត់ការតាមនីតិវិធីតែម្តង។
ក្រោយពេលចាប់ឃាត់ខ្លួន ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពវាយបំបែកសោរបងផ្ទះរបស់ជនរងគ្រោះលួចយកម៉ូតូខាងលើប្រាកដមែន ហើយធ្វើសកម្មភាពតែម្នាក់ឯងទេ គ្មានបក្ខពួកឡើយ៕
ចែករំលែកព័តមាននេះ