កសិណ​​ប្រាសាទអង្គរវត្ត​នៅ​តែ​រក្សា​​តុល្យភាព​ទឹក ទោះបី​ជួប​ប្រទះ​អាកាសធាតុ​ក្តៅ​ខ្លាំង​


ខេត្តសៀមរាប​ ៖ ​ស្ថានភាព​ទឹក​ក្រោម​ដី​ និង​លើ​ដី​សុទ្ធតែ​មាន​សារៈសំខាន់​ខ្លាំង​ណាស់​សម្រាប់​ប្រាសាទ​ក្នុង​តំបន់​រមណីយដ្ឋាន​អង្គរ ពិសេស​ប្រាសាទអង្គរវត្ត​។ ដូច្នេះ​ការ​រក្សា​ទឹក​ឱ្យ​មាន​តុល្យភាព​ទាំង​រដូវប្រាំង​ និង​រដូវវស្សា​ក្នុង​ក​សិណ គឺ​ចាំបាច់​បំផុត​ទាមទារ​ឱ្យ​ការ​គ្រប់គ្រង​ទឹកបាន​ត្រឹមត្រូវ ដើម្បី​ទ្រទ្រង់​ប្រាសាទ និង​រក្សា​សោភ័ណ​ភាព សម្រាប់​រមណីយដ្ឋាន​ទាំងមូល​។

ជាក់ស្តែង​រដូវប្រាំង​នៅ​ក្នុង​ឆ្នាំ​២០១៩ ធ្វើ​ឱ្យ​អាកាសធាតុ​​នៅ​ប្រទេស​កម្ពុជា​ក្តៅ​ហួតហែង​ខ្លាំង និង​ធ្វើ​ឱ្យ​មានការ​បាត់បង់​ទឹក​យ៉ាងច្រើន​ដោយ​បញ្ហា​រំហួត​ទឹក ដែល​បញ្ហា​នេះ​បាន​ជះ​ឥទ្ធិពល​ខ្លាំង​ដល់​ការ​គ្រប់គ្រង​ទឹក​ក្នុង​តំបន់​រមណីយដ្ឋាន​អង្គរ​។

លោក ភឿន សុ​ឃី​ម អនុប្រធាន​នាយកដ្ឋាន​គ្រប់គ្រង​ទឹក​នៃ​អាជ្ញាធរ​ជាតិ​អប្សរា​បានឱ្យ​ដឹង​ថា «​ក្នុង​មួយ​ថ្ងៃ​ៗ ទឹក​ក្នុង​ក​សិណ​អង្គរវត្ត​បាត់បង់​អស់​ប្រហែល​ជាង​មួយ​ម៉ឺន​ម៉ែត្រគូប (​ស្រក​ប្រហែល​១​​ទៅ២​ហ៊ុន​) ដោយ​ការ​រំហួត​ទៅ​បរិយាកាស​ផង​និង​ការ​ជ្រាប​ទឹក​ទៅ​ក្នុង​ដី​ផង​។ ទោះបី​ការ​រំហួត​ទឹក​មាន​កម្រិត​ធំ តែ​មិន​ធ្វើ​ឱ្យ​ប៉ះពាល់​ដល់​បរិមាណ​ទឹក​ក្នុង​ក​សិណ​ប្រាសាទអង្គរវត្ត​នោះ​ឡើយ ព្រោះ​ក​សិណអាច​ផ្ទុក​ទឹកបាន​សរុប​ជាង​១​លាន​ម៉ែត្រគូប ព្រមទាំង​មានការ​បញ្ចូល​ទឹកជា​ប្រចាំ​ផង​ដែរ​»​។

ម្យ៉ាងវិញទៀត អាជ្ញាធរ​ជាតិ​អប្សរា​ក៏​បាន​សហការ​ជាមួយ​រដ្ឋាករទឹក​ស្វយ័ត​សៀមរាប​ជា​ប្រចាំ​ក្នុង​ការ​គ្រប់គ្រង​ទឹក​ក្រោម​ដី ធ្វេ​ី​យ៉ាងណា​កុំឱ្យ​ការ​បូមទឹក​ក្រោម​ដី​យក​មក​ប្រេ​ី​ប្រាស់​ប៉ះពាល់​ទៅ​ដល់​ស្រទាប់​ទឹក​ក្រោម​ដី ដែល​អាច​នឹង​មាន​ហា​នី​ភ័យ​ដល់​ការ​អភិរក្ស​ប្រាសាទ​ក្នុង​តំបន់​រមណីយដ្ឋាន​អង្គរ​។

លើស​ពី​នោះ​ទៅ​ទៀត អាជ្ញាធរ​ជាតិ​អប្សរា​ក៏​បាន​ស្តារ​ឡើង​វិញ​នូវ​ប្រព័ន្ធ​ផ្លូវទឹក​បុរាណ​ដើម្បី​បង្ហូរទឹក​ពី​ក​សិណ​ទីក្រុង​អង្គរធំ​ទៅ​ក​សិណ ​ប្រាសាទអង្គរវត្ត​ត្រង់​ចំណុច​ទន្លេ​អុំ​ខាងកើត​តាម​ច្រក​សំពៅ​លូន​។ ដូច្នេះ​ហើយ​ទើប​ធ្វើ​ឱ្យ​ទឹក​ក្នុង​ក​សិណ​ប្រាសាទអង្គរវត្ត​ធានា​បាន​តុល្យភាព មិន​រីងស្ងួត និង​រក្សា​បាន​នូវ​ភាព ស្រស់​ស្អាត​ក្នុង​ក​សិណ​ជា​និច្ច​៕​

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ