ខេត្តព្រះសីហនុ ៖ កាលពីសៀលថ្ងៃទី២៤ ខែមីនាកន្លងទៅ សមត្ថកិច្ចចម្រុះរបស់រដ្ឋបាលស្រុកព្រៃនប់ បានទៅធ្វើការពិនិត្យជាក់ស្តែង កន្លែងដែលមានការចាក់ដីលុបចូលព្រែកដៃសមុទ្រទឹករាក់ និងព្រៃលិចទឹក ស្ថិតក្នុងភូមិកោះខ្យង ឃុំអូរជ្រៅ ដើម្បីមានវិធានការទៅតាមផ្លូវច្បាប់ ។
តាមមន្ត្រីរដ្ឋបាលស្រុកព្រៃនប់បានឲ្យដឹងថា ការចាក់ដីចូលព្រែកខាងលើនេះ មិនមានច្បាប់អនុញ្ញាតទេ ដូចនេះនៅចំពោះមុខអ្នកដែលពាក់ព័ន្ធត្រូវតែកាយចេញវិញឲ្យអស់ រូមនឹងវាយកម្ទេចចោលខឿនថ្មដែលបានសាងសង់រួចហើយផងដែរ គឺធ្វើយ៉ាងណារក្សានូវសភាពដើមវិញដោយគ្មានការតវ៉ា ។ ក្នុងករណីមិនអនុវត្តតាម រដ្ឋបាលស្រុកនឹងមានវិធានតាមផ្លូវច្បាប់ និងអាចប្រឈមមុខជាប់ទោសទណ្ឌផងដែរ ។
ជុំវិញការចាក់ដីលុបចូលចំណីព្រែក ឬព្រៃលិចទឹកបែបនេះ ត្រូវបានមន្ត្រីស្រុកព្រៃនប់និយាយថា សកម្មភាពនេះបើសិនជាសុំច្បាប់ក៏មិនអនុញ្ញាតឲ្យដែរ ពីព្រោះថាដីព្រៃលិចទឹកក៏ដូចជាដីមាត់សមុទ្រគឺជាដីសាធារណៈរបស់រដ្ឋ មិនអាចឲ្យបុគ្គលណាម្នាក់ទៅរំលោភយកធ្វើជាកម្មសិទ្ធិផ្ទាល់ខ្លូនបានទេ ។
បច្ចុប្បន្ន ដីដែលបានចាក់ចូលសមុទ្រ និងព្រៃលិចទឹក ត្រូវបានចាប់ផ្តើមកាយចេញវិញបណ្តើរៗហើយ នារសៀលថ្ងៃទី២៤ មីនា ប៉ុន្តែទោះជាយ៉ាងនេះក៏ដោយ គេនៅមិនទាន់ដឹងថា ការកាយចេញនោះបានក្នុងកម្រិតណាទេ ព្រោះនៅរសៀលថ្ងៃទី២៤ ខែមីនា គ្រឿងចក្រកំពុងដំណើរការកាយចេញជាបណ្តើរៗ ដោយមានការប្រចាំការពិនិត្យផ្ទាល់ពីលោកមេភូមិកោះខ្យង ។
ជាមួយគ្នានេះ លោកអភិបាលស្រុកក៏បានសង្កត់ធ្ងន់ថា អាជ្ញាធរភូមិ ឃុំ គួរពង្រឹងកិច្ចការមូលដ្ឋានរបស់ខ្លួនពាក់ព័ន្ធនឹងបទល្មើសផ្សេងៗ ជាពិសេស ការកាប់ទន្ទ្រានដីព្រៃលិចទឹក និងចាក់ដីរំលោភដីចំណីសាធារណៈរបស់រដ្ឋ ។ មិនត្រឹមតែប៉ុណ្ណោះ ត្រូវតែមានចំណាត់ការមិនឲ្យមានជាដាច់ខាត រាល់សកម្មភាពណាដែលមិនមានច្បាប់អនុញ្ញាត ៕
ចែករំលែកព័តមាននេះ