ប្រទេសថៃ ៖ ក្រោយការបោះឆ្នោតសភាកាលពីថ្ងៃទី២៤មីនា ទាំងពួកប្រឆាំងទាំងពួកយោធាសុទ្ធតែអះអាងពីការដណ្ដើមបានជ័យជម្នះ។ ពួកអ្នកសង្កេតការណ៍យល់ថា បែបនេះវិបត្តិនយោបាយមួយពិបាកចៀសផុត។ គណបក្សរបស់ពួកយោធា PALANG PRACHARAT បើតាមការអះអាងរបស់មេដឹកនាំគណបក្សនោះ លោក UTTAMA SAVANAYANA ថា ទទួលបានសំឡេងច្រើនជាងគេ។ លោកថា ពេលនេះយើងចាប់ផ្ដើមពិភាក្សា ជាមួយគណបក្សនានាទទួលបានកៅអី ដែលប្រកាន់នយោបាយស្របជាមួយយើង ដើម្បីបង្កើតរដ្ឋាភិបាលចម្រុះមួយ។
ចំណែកគណបក្សភឿថៃជាគណបក្សប្រឆាំងសំខាន់ បានបរិហារការបោះឆ្នោតនោះថា ពុំមានលក្ខណៈប្រជាធិបតេយ្យ និងបរិហារពីការក្លែងបន្លំ។ លោក POKIN POLAKUL សមាជិកគណបក្សនេះគូសបញ្ជាក់ថា យើងកត់សម្គាល់ឃើញថា សមាជិកសភាជាង២០០រូប នៃក្រុមប្រឆាំងដែលជាប់ឆ្នោតប្រកាសរួចហើយថា នឹងមិនទុកឲ្យពួកយោធារក្សាអំណាចឡើយ។ លោកថា នោះជាឆន្ទៈរបស់ប្រជាជន ដែលចង់ឲ្យមានការផ្លាស់ប្ដូរមួយក្នុងប្រទេស ហើយឲ្យប្រទេសដើរលើផ្លូវនៃលទ្ធិប្រជាធិបតេយ្យមួយ។
លទ្ធផលជាស្ថាពរនៃការបោះឆ្នោតនោះ នឹងដឹងរហូតដល់ថ្ងៃទី៩ ឧសភា។ ប្រសិនពួកប្រឆាំងទទួលបានកៅអីច្រើនជាងពួកយោធាតាមមណ្ឌលនានា តែពួកយោធាបានចងក្រឡារួចហើយ តាមរយៈច្បាប់បោះឆ្នោតដ៏ស្មុគស្មាញមួយ ដែលអាចឲ្យពួកគេរក្សាបានសំឡេងភាគច្រើនដែរ។
ក្នុងបទសម្ភាសន៍មួយជាមួយ AFP កាលពីថ្ងៃទី២៥ មីនា អតីតនាយករដ្ឋមន្ត្រីថៃ លោកថាក់ស៊ីនស៊ីណាវ៉ាត្រា ដែលត្រូវពួកយោធាផ្ដួលរំលំកាលពីឆ្នាំ២០០៦ ថ្លែងនៅក្រុងហុងកុងថា ការបោះឆ្នោតសភាថៃ កាលពីថ្ងៃទី២៤ មីនា ពោរពេញដោយការក្លែងបន្លំ និងពោរពេញដោយភាពមិនប្រក្រតី ដើម្បីឲ្យពួកយោធាអាចរក្សាអំណាច។
មហាសេដ្ឋីអាយុ៦៩ឆ្នាំរូបនោះដែលរស់នៅនិទេសក្រៅស្រុក ហើយពុំអាចវិលចូលស្រុកវិញបាន ចាប់តាំងពីជាង១០ឆ្នាំមកហើយ អះអាងកាលពីថ្ងៃទី២៥ មីនាថា មនុស្សទាំងអស់សុទ្ធតែដឹងរឿងនៅថៃ ហើយសហគមន៍អន្តរជាតិទាំងមូលដែលតាមដានការបោះឆ្នោតដឹងថា ការបោះឆ្នោតនោះមានភាពមិនប្រក្រតីនានា។
ការបោះឆ្នោតសភាកាលពីថ្ងៃទី២៤ មីនា ជាការបោះឆ្នោតលើកដំបូងរៀបចំធ្វើចាប់តាំងពីរដ្ឋប្រហារឆ្នាំ២០១៤ របស់ប្រមុខយោធាលោក ប្រាយុទ្ធចាន់អូចា ប្រឆាំងប្អូនស្រីលោកថាក់ស៊ីន លោកស្រី យីងឡាក់ ស៊ីណាវ៉ាត្រា។ ក្រោយការបោះឆ្នោតនេះ របបយោធាពិតជារក្សាអំណាច ប៉ុន្តែការចោទប្រកាន់ ពីការការក្លែងបន្លំសន្លឹកឆ្នោតមានការកើនឡើង។
កាលពីថ្ងៃទី២៥ មីនា លោកថាក់ស៊ីន បានចេញពីភាពស្ងៀមស្ងាត់ចំពោះសារព័ត៌មានអស់ពេលច្រើនខែមកហើយ ដោយលោកបរិហារចំពោះការបោះឆ្នោតនេះថា ចំនួនសន្លឹកឆ្នោតមានលើសច្រើន ពីចំនួនអ្នកបោះឆ្នោតក្នុងខេត្តជាច្រើន។ លោកអះអាងបែបនោះនៅឯលើដំបូលសណ្ឋាគារដឺលិចមួយនៃក្រុងហុងកុង។ ម្យ៉ាងវិញទៀតសន្លឹកឆ្នោតជិត២លានសន្លឹកត្រូវបានគេថា ពុំត្រឹមត្រូវគ្មានសុពលភាព មកពីការគូសច្រឡំ។ ប្រសិនបើរដ្ឋាភិបាលមួយកើតចេញពីការបោះឆ្នោតក្លែងបន្លំ តើសមអាចទទួលការគោរពរបស់សហគមន៍អន្តរជាតិដែរទេ?
លោកបន្តទៀតថា ខ្ញុំនៅតែស្រឡាញ់ប្រទេសខ្ញុំ ស្រឡាញ់ប្រជាជនខ្ញុំជានិច្ច ប៉ុន្តែបើមិនអាចវិលចូលស្រុកបាន ខ្ញុំក៏មិនបោះបង់ការស្រឡាញ់នោះដែរ។
កាលពីថ្ងៃទី២២ មីនា លោកថាក់ស៊ីន បានរៀបចំការរៀបការរបស់ប្អូនស្រីលោកម្នាក់ នៅក្រុងហុងកុង ដោយមានវត្តមានជាពិសេសរបស់ព្រះរៀមព្រះមហាក្សត្រថៃ គឺព្រះអង្គម្ចាស់ក្សត្រីអ៊ូបុលរតនា។ ម្ចាស់ក្សត្រីអង្គនោះធ្លាប់មានបំណងឈរឈ្មោះប្រជែងជាមួយប្រមុខយោធាដណ្ដើមយកតំណែងនាយករដ្ឋមន្ត្រី សម្រាប់គណបក្សមួយដែលទាក់ទិននឹងលោកថាក់ស៊ីន។ ប៉ុន្ទែព្រះមហាក្សត្រថៃ មហាវ៉ាជីរ៉ាឡុងកន ភ្លាមៗបានបំផ្លាញមហិច្ឆតានោះរបស់ព្រះរៀម ហើយប្រឆាំងជំទាស់ការឈរឈ្មោះនេះ។
លោកថាក់ស៊ីន បានធ្វើការសន្និដ្ឋានថា គ្មាននរណាធ្វើត្រូវគ្រប់យ៉ាងនោះទេ។ គ្មាននរណាធ្វើត្រូវ ឬធ្វើខុស១០០%ឡើយ។ ប្រាកដណាស់យើងត្រូវរៀនយល់ពីអតីតកាល តែក៏មិនត្រូវធ្វើជាអ្នកទោសរបស់អតីតកាលដែរ។ ពេលនេះមធ្យោបាយតែមួយគត់ គឺធ្វើឲ្យថៃកាន់តែរុងរឿង ហើយក្លាយជាប្រទេសប្រជាធិបតេយ្យពេញលេញ និងអាចរៀបចំការបោះឆ្នោតដោយសេរី និងស្មើភាព។ លោកផ្ដោតលើប្រការដែលថា ប្រសិនបើមានបាតុកម្មនានាបាតុកម្មទាំងនោះ ត្រូវតែធ្វើដោយសន្តិវិធី។
ចែករំលែកព័តមាននេះ