ខេត្តព្រះសីហនុ ៖ ព្រឹកថ្ងៃទី២៥ មីនា មាននាវាកងទ័ពជើងទឹកឥណ្ឌាមួយគ្រឿង បានចូលចតនៅកំពង់ផែអន្តរជាតិក្រុងព្រះសីហនុប្រកបដោយសុវត្ថិភាព ដោយមានការទទួលស្វាគមន៍ពីនាយនាវី នាយនាវីរងមូលដ្ឋានសមុទ្រនៅកំពង់ផែអន្តរជាតិក្រុងព្រះសីហនុ ដឹកនាំដោយលោកឧត្តមនាវីទោ រស់ វាសនា មេបញ្ជាការរងមូលដ្ឋានសមុទ្រ ។
តាមការបង្ហើបឱ្យដឹងពីមន្ត្រីស្ថានទូតឥណ្ឌាបានឲ្យដឹងថា នាវាកងទ័ពជើងទឹកឥណ្ឌាចូលចតធ្វើទស្សនកិច្ចនៅព្រះរាជាណាចក្រកម្ពុជា មានរយៈពេល៥ថ្ងៃ គឺពីចាប់ពីថ្ងៃទី២៥ ដល់ថ្ងៃទី២៩ មីនា ឆ្នាំ២០១៩ ។ ប្រភពខាងលើបានបន្តឲ្យដឹងបន្ថែមទៀតថា នាវានេះជាប្រភេទនាវាឆ្នាំសមុទ្រមានឈ្មោះICGS VIJIT(លេខ31) បណ្តោយ ៨០ម៉ែត្រ ជម្រៅទឹក៤,៥០ម៉ែត្រ មានល្បឿន២៦គីឡូម៉ែត្រក្នុងមួយម៉ោង ជាប្រភេទនាវាបំពាក់ដោយប្រព័ន្ធនាំផ្លូវបច្ចេកវិទ្យាស្វ័យប្រវត្តិ និងមានឧត្តម្ភាគចក្រមួយគ្រឿង ។ នាវានេះ មានតួនាទីក្នុងការឆែកឆេរជួយសង្គ្រោះ គ្រោះមហន្តរាយក្នុងរយៈចម្ងាយឆ្ងាយ ដែលដឹកនាំដោយលោកមេបញ្ជាការនាវាលោកវរនាវីទោ TASHISH មាននាវិក៨០នាក់ និងនាយទាហាន១៥នាក់ សរុប៩៥នាក់ ។
លោកវរនាវីទោTASHISH មេបញ្ជា ការនាវា មានប្រសាសន៍ថ្លែងអំណរគុណដល់នាយនាវីកងទ័ពជើងទឹកកម្ពុជា ដែលបានទទួលស្វាគមន៍ នូវដំណើចូល ចតធ្វើទស្សនកិច្ចរបស់នាវាឥណ្ឌានៅព្រះ រាជាណាចក្រកម្ពុជានាពេលនេះ ។ លោកមេបញ្ជាការនាវាខាងលើបានបញ្ជាក់ទៀតថា ការចូលចតនាវាជើងទឹកឥណ្ឌានៅកំពង់ផែអន្តរជាតិក្រុងព្រះសីហនុ តាមពេលវេលាខាងលើ ក្នុងគោលបំណងសិក្សាស្វែងយល់ ផ្លាស់ប្តូរបទពិសោធន៍រវាងកងទ័ពជើងទឹកនៃប្រទេសទាំងពីរឥណ្ឌា និងកងទ័ពជើងទឹកកម្ពុជាដើម្បី ពង្រឹងទំនាក់ទំនង សាមគ្គីភាព មិត្តភាព កិច្ចសហប្រតិបត្តិការ និងការហ្វឹកហ្វឺនរួមគ្នា ដើម្បីពង្រីកទំនាក់ទំនងរវាងប្រទេសទាំងពីរ ពិសេសការពង្រឹងទំនាក់ទំនងផ្នែកការទូតរវាងប្រទេសទាំងពីរ ក៍ដូចជាប្រជាជន នៃប្រទេសទាំងពីរផងដែរ ។
លោកវរនាវីទោTASHISH មេបញ្ជា ការនាវា បានបញ្ជាក់ថា នេះជាលើកទីមួយ ដែលលោកបានដឹកនាំនាវាមកចូលចតធ្វើទស្សនកិច្ចនៅប្រទេសកម្ពុជា ហើយដំណើរទស្សនកិច្ចរបស់នាវាកង ទ័ពជើងទឹកឥណ្ឌានាពេលនេះ ឆ្លងកាត់ប្រទេសចំនួន០៤ ក្នុងតំបន់អាស៊ី ក្នុងនោះមានដូចជា ប្រទេសឥណ្ឌូនេស៊ី កម្ពុជា វៀតណាម និងប្រទេសម៉ាឡេស៊ី ។ លោកឧត្តមនាវីទោ រស់ វាសនា មេបញ្ជាការរងមូលដ្ឋានសមុទ្រ បានស្វាគមន៍ការចូលចតនាវាឥណ្ឌា ដោយគូសបញ្ជាក់ថា ជាមោទនៈភាព ដែលនាវាកង ទ័ពជើងទឹកឥណ្ឌាបានមកចូលចតធ្វើទស្សនកិច្ចនៅព្រះរាជាណាចក្រកម្ពុជា ជាពិសេសការចូលចតនៅកំពង់ផែអន្តរជាតិក្រុងព្រះសីហនុ យើងសូមស្វាគមន៍យ៉ាងកក់ក្តៅចំពោះការចូលចតរបស់នាវាកងទ័ពជើងទឹកឥណ្ឌា និងនាយនាវីពលនាវឹកនៅក្នុងទឹកដីខេត្តមាត់សមុទ្រ។
លោកសង្ឃឹមថា ក្រុមនាវិកនាវាកងទ័ពជើងទឹកឥណ្ឌា និងធ្វើដំណើរកម្សាន្តនៅព្រះរាជាណាចក្រកម្ពុជា ពិសេសដំណើរកម្សាន្តនៅខេត្តព្រះសីហនុប្រកបដោយសុវត្ថិភាព ។លោកមេបញ្ជាការនាវាខាងលើបានគូសបញ្ជាក់ឲ្យដឹងផងដែរថា នៅក្នុងឱកាសចូលចតនាវានិងស្នាក់នៅប្រទេសកម្ពុជាលោក មានគម្រោងចូលជួបសំដែងការគួរសមជាមួយអភិបាលខេត្តព្រះសីហនុ មេបញ្ជាការមូលដ្ឋានសមុទ្រ ទស្សនកិច្ចនៅរាជធានីភ្នំពេញ មានការប្រកួតកីឡាជាលក្ខណមិត្តភាព រវាងកង ទ័ពជើងទឹក នៃប្រទេសទាំងពីរនៅមូល ដ្ឋានសមុទ្រ មានបាល់ទះ បាល់ទាត់ និងបើកឱ្យសិស្សានុសិស្ស សមាគមន៍ឥណ្ឌាចូលទស្សនាផងដែរ ព្រមទាំងធ្វើលំហាត់រួមគ្នា មុននិងការធ្វើដំណើរចាកចេញពីដែនសមុទ្រកម្ពុជា ។
សូមរំលឹកថា កាលពីឆ្នាំ២០១៧ កន្លង មកនាវាកងទ័ពជើងទឹកឥណ្ឌា បានចូលចតនៅកំពង់ផែអន្តរជាតិក្រុងព្រះ សីហនុ ធ្វើទស្សនកិច្ចនៅព្រះរាជាណា ចក្រកម្ពុជា មានរយៈពេល ៤ថ្ងៃប្រកប ដោយសុវត្ថិភាពមុននិងធ្វើដំណើរចាកចេញ ៕
ចែករំលែកព័តមាននេះ