រាជធានីភ្នំពេញ ៖ បុរសជាអ្នកបើកបរម៉ូតូកង់បីឥណ្ឌាម្នាក់ជាប់សង្ស័យថាជួញដូរគ្រឿងញៀន និងបានយកគ្រឿងញៀនទៅចែកចាយឲ្យក្រុមកម្មករសំណង់នៅក្នុងការដ្ឋានសំណង់នៅក្នុងបុរីផ្ទះល្វែងមួយកន្លែង ប៉ុន្តែសកម្មភាពនេះមិនអាចលាក់បាំងជាមួយប្រជាពលរដ្ឋបានឡើយ ទីបំផុតត្រូវបានប្រជាពលរដ្ឋរាយការណ៍ជូនលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ។
បន្ទាប់មកលោកអធិការខណ្ឌបានដឹកនាំកម្លាំងនគរបាលខណ្ឌនិងនគរបាលប៉ុស្តិ៍ព្រៃស ចុះធ្វើការពួនស្ទាក់ចាប់ធ្វើការឆែកឆេររកឃើញគ្រឿងញៀន១កញ្ចប់ធំដែលជនសង្ស័យលាក់ទុកក្នុងហោប៉ាវខោដើម្បីយកទៅចែកចាយឲ្យកម្មករសំណង់ខាងលើ។
នគរបាលបានឲ្យដឹងថា ការចាប់ឃាត់ខ្លួនជនសង្ស័យម្នាក់ខាងលើនោះបានធ្វើឡើងកាលពីវេលាម៉ោង៨និង៤០នាទីព្រឹកថ្ងៃទី២៥ ខែមីនា ឆ្នាំ២០១៩ នៅតាមផ្លូវបេតុង ក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ។
ជនសង្ស័យខាងលើឈ្មោះកាន ម៉ារីន ភេទប្រុស អាយុ៣០ឆ្នាំ មុខរបររត់ម៉ូតូកង់បីឥណ្ឌា ស្នាក់នៅក្នុងការដ្ឋានសំណង់ក្នុងភូមិខាងលើ ។
នៅពេលធ្វើការត្រួតពិនិត្យលើខ្លួនជនសង្ស័យ សមត្ថកិច្ចបានរកឃើញថ្នាំញៀនចំនួន១កញ្ចប់ធំ បន្ទាប់មកកម្លាំងសមត្ថកិច្ចបានដកហូតរួមជាមួយទូរសព្ទ័ដៃចំនួន៣គ្រឿង, គ្រឿងអលង្ការកាឡៃមួយចំនួនមានដូចជាខ្សែកមួយខ្សែ និងខ្សែដៃមួយខ្សែ និងម៉ូតូកង់បីឥណ្ឌាមួយគ្រឿង ពណ៍លឿង ពាក់ស្លាកលេខ កណ្ដាល ១X-៤៥៤០ ។
ប្រភពដដែលបានបន្តថា ក្រោយពេលចាប់ខ្លួនជនសង្ស័យខាងលើត្រូវនាំទៅធ្វើការសាកសួរនៅប៉ុស្តិ៍នគរបាលរដ្ឋបាលព្រៃស ហើយជនសង្ស័យនេះបានសារភាពថា ខ្លួនបានទិញថ្នាំញៀនខាងលើពីបុរសមិនស្គាល់អត្តសញ្ញាណម្នាក់ ដើម្បីទុកយកទៅចែកចាយឲ្យក្រុមជាងសំណង់ក្នុងការដ្ឋានសំណង់បុរីផ្ទះល្វែងមួយកន្លែងដើម្បីប្រើប្រាស់។ ដោយឡែកនៅវេលាព្រឹកថ្ងៃកើតហេតុ ខ្លួនបានបើកម៉ូតូកង់បីឥណ្ឌាគ្រឿងខាងលើយកថ្នាំញៀនទៅចែកចាយឲ្យក្រុមជាងសំណង់ តែមិននឹកស្មានថាត្រូវបែកការណ៍ដឹងដល់នគរបាលចុះទៅធ្វើការស្ទាក់ចាប់ខ្លួនបានបែបនេះសោះ។
បច្ចុប្បន្ន ជនសង្ស័យខាងលើត្រូវបានកម្លាំងនគរបាលធ្វើការឃុំខ្លួនបណ្តោះអាសន្ននៅអធិការដ្ឋាននគរ
បាលខណ្ឌដង្កោដើម្បីកសាងសុំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់៕
ចែករំលែកព័តមាននេះ