រាជធានីភ្នំពេញ ៖ តម្លៃដីធ្លីនៅខេត្តព្រះសីហនុ រយៈពេលចុងក្រោយនេះ មានតម្លៃថ្លៃគួរឲ្យកត់សម្គាល់ ដោយសារតែការរីកសាយយ៉ាងខ្លាំងពីសំណាក់វិនិយោគិនបរទេស ពិសេសគឺវិនិយោគិនចិនតែម្ដង ។ ហេតុដូច្នេះ អ្នកជំនាញខាងវិស័យអចលទ្រព្យទទួលស្គាល់ថាអចលទ្រព្យ…
រាជធានីភ្នំពេញ ៖ តម្លៃដីធ្លីនៅខេត្តព្រះសីហនុ រយៈពេលចុងក្រោយនេះ មានតម្លៃថ្លៃគួរឲ្យកត់សម្គាល់ ដោយសារតែការរីកសាយយ៉ាងខ្លាំងពីសំណាក់វិនិយោគិនបរទេស ពិសេសគឺវិនិយោគិនចិនតែម្ដង ។ ហេតុដូច្នេះ អ្នកជំនាញខាងវិស័យអចលទ្រព្យទទួលស្គាល់ថាអចលទ្រព្យ ក៏ដូចជាដីធ្លីនៅខេត្តមួយនេះកំពុងឡើងថ្លៃខ្ពស់ ដែលតំបន់ខ្លះគឺមានតម្លៃ ៤០០០ ដុល្លារសហរដ្ឋអាមេរិកក្នុងមួយម៉ែត្រការ៉េ ហើយមានតែវិនិយោគិនចិនដែលហ៊ានទិញក្នុងតម្លៃថ្លៃ ។
ជាងនេះទៅទៀតអ្នកជំនាញខាងវិស័យមួយនេះ បានលើកឡើងថាកំណើនវិនិយោគិនចិនទៅកាន់ខេត្តមាត់សមុទ្រ បានប្រែក្លាយខេត្តមួយនេះឲ្យកាន់តែមានសក្តានុពលសេដ្ឋកិច្ច ខ្លាំងឡើង ជាក់ស្តែងកើនឡើងនៃចំនួន សណ្ឋាគារ កាស៊ីណូ រោងចក្រសហគ្រាស ភោជនីយដ្ឋាន និងសេវាកម្សាន្ដផ្សេងទៀត បាននិងកំពុងមានពង្រីកខ្លួនកាន់តែខ្លាំងឡើងៗនិងរីកដុះដាលដូចផ្សិត ។
ជាមួយគ្នានេះផងដែរ ប្រមុខរដ្ឋាភិបាលកម្ពុជា សម្តេចតេជោ ហ៊ុនសែន នៅថ្ងៃទី ២២ ខែមីនា ម្សិលមិញនេះ បានស្នើឱ្យក្រុមហ៊ុនវិនិយោគចិនមួយសាងសងមជ្ឈមណ្ឌលសន្និសីទអន្តរជាតិនៅក្រុងព្រះសីហនុ ដើម្បីត្រៀមរាបចំកិច្ចប្រជុំអាស៊ាន នៅចុងឆ្នាំ២០២២ខាងមុខ។ ដែលជម្រុញឲ្យអ្នកជំនាញអចលទ្រព្យជឿជាក់ថាតម្លៃអចលទ្រព្យនៅខេត្តនេះនឹងមានសន្ទុះឡើងថ្លៃបន្តទៀត ។
ថ្លែងក្នុងពិធីបើកការដ្ឋានសាងសង់ផ្លូវល្បឿនលឿន ភ្នំពេញ-ព្រះសីហនុ (Express Way) សម្តេចតេជោ ហ៊ុន សែន មានប្រសាសន៍ថា «ខ្ញុំកំពុងស្នើឱ្យក្រុមហ៊ុនវិនិយោគចិនមួយកសាងមជ្ឈមណ្ឌលសន្និសីទអន្តរជាតិនៅខេត្តព្រះសីហនុ ហើយកិច្ចការនេះ ខ្ញុំប្រគល់ទៅឱ្យឧបនាយករដ្ឋមន្ត្រីជាសុផារ៉ារៀបចំ។ ព្រោះខ្ញុំចង់ប្រជុំដៃគូពាក់ព័ន្ធ នៅក្រុងព្រះសីហនុនៅចុងឆ្នាំ២០២២។ដូចនេះយើងអាចធ្វើទាន់ ព្រោះព្រលានយន្តហោះ កងកេង ត្រូវក្រុមហ៊ុនវ៉ាងស៊ីធានារ៉ាប់រងថាធ្វើឱ្យរួចរាល់នៅចុងឆ្នាំ២០២១ឬដើមឆ្នាំ២០២២។
អីចឹងយន្តហោះធំៗដែលមកទាំងពីឆ្ងាយៗរាប់ទាំងយន្តប្រធានធិបតីសហរដ្ឋអាមេរិកក៏អាចមកប្រជុំនៅប្រទេសយើងបាន»។ សម្តេចសង្កត់ធ្ងន់ថា ប៉ុន្តែនៅក្រុងព្រះសីហនុមិនទាន់មានមជ្ឈមណ្ឌលសន្និសីទអន្តរជាតិ អីចឹងឧបនាយករដ្ឋមន្ត្រីជាសុផារ៉ា ត្រូវសហការជាមួយខាងក្រសួងការបរទេស ត្រូវធ្វើយ៉ាងម៉េច ទាក់ទងការរៀបចំកិច្ចប្រជុំឱ្យមានលក្ខណៈដូចនិងវិមានសន្តិភាពនៅពេលសាងសង់រួចរាល់។
សម្តេចលើកឡើងថា « ឆ្នាំ២០២២ខ្ញុំគិតថា ប្រជុំរវាងអាស៊ានគ្នាឯងនៅខែមេសានៅខេត្តសៀមរាប។ តែនៅពេលប្រជុំអាស៊ាននឹងដៃគូគឺប្រជុំនៅក្រុងព្រះសីហនុ ព្រោះយើងប្រជុំនៅភ្នំពេញពីរលើករួចហើយ ។អីចឹងគប្បីឱ្យខេត្តសៀមរាបទទួលបានមួយផ្នែក និងក្រុងព្រះសីហនុទទួលបានមួយផ្នែក»។ គម្រោងសាងសង់មជ្ឈមណ្ឌលសន្និសីទអន្តរជាតិនៅក្រុងព្រះសីហនុនាពេលអនាគតនេះ ត្រូវបានគេមើលឃើញថា នឹងធ្វើឱ្យខេត្តព្រះសីហនុកាន់តែមានការទាក់ទាញវិនិយោគិនបរទេសបន្ថែមទៀត ពិសេសវិនិយោគិនចិន។ទន្ទឹមនឹងនេះតម្លៃដីធ្លីនៅក្បែតំបន់មជ្ឈមណ្ឌលវានិងឡើងថ្លែបន្ថែមលើតម្លៃដែលមាននៅពេលបច្ចុប្បន្ន។
លោក វ៉ា វីរៈ នាយកក្រុមហ៊ុន Century 21 Fortuna Investment មានប្រសាសន៍ថាតម្លៃដីធ្លីនៅក្រុងព្រះសីហនុ កន្លងមកនៅតំបន់មាត់សមុទ្រ ក្បែផ្លូវធំៗមួយម៉ែត្រការ៉េថ្លែអាចដល់៤.០០០ដុល្លារអាមេរិក។ ចំណែកតម្លៃដីធ្លីនៅក្បែមជ្ឈមណ្ឌលខាងលើអាចឡើងថ្លៃដល់ចំណុចមួយខ្ពស់ បន្ទាប់វានឹងជះឥទ្ធិពលជាវេជ្ជមានទៅដល់ការអភិវឌ្ឍន៍នៅតំបន់ផ្សេងៗស្ថិតនៅក្នុងតំបន់ដទៃទៀត។
តាមនាយកក្រុមហ៊ុន Century 21 Fortuna Investment «ដីធ្លីនៅតំបន់ក្រុងព្រះសីហនុ ក្រៅពីជនជាតិចិន គ្មានជនជាតិណាផ្សេងទៀតហ៊ានទិញក្នុងតម្លៃថ្លៃនិងមានទំហំដីធំនោះទេ ដោយសារសម័យនេះអ្នកដែលសំបូរលុយច្រើនមានតែជនជាតិចិន ព្រោះកំណើនសេដ្ឋកិច្ចចិនរយៈពេលជាង៣០ឆ្នាំកន្លងមកនេះមានកំណើនខ្ពស់។ ដូចនេះជនជាតិចិន ក្រុមហ៊ុន និងវិនិយោគិនចិនភាគច្រើនមានលុយច្រើន។លើសពីនេះតំបន់ព្រះសីហនុ ជាតំបន់មួយល្អស្ថិតនៅលើគម្រោងផ្លូវសូត្ររបស់ចិន(ផ្លូវ១ខ្សែក្រវាត់១) ដែលចិនចាត់ទុកជាតំបន់យុទ្ធសាស្ត្រ»។
ជាមួយនឹងកំណើននៃវិនិយោគិនចិននៅកម្ពុជា សម្រុកវិនិយោគលើវិស័យសំណង់ ក៏ដូជាអចលទ្រព្យនៅខេត្តព្រះសីហនុ ក្រុងភ្នំពេញនិងបណ្តាខេត្តផ្សេងៗទៀតនោះ ក៏មានមតិជាច្រើនបង្ហាញការព្រួយបារម្មណ៍ពីឥទ្ធិពលរបស់ចិននៅកម្ពុជា ។ យ៉ាងណាមិញ សម្តេចតេជោបានមានប្រសាន៍បញ្ជាក់កាលពីម្សិលមិញថា កម្ពុជាមិនបានបដិសេធក្រុមហ៊ុនវិនិយោគបរទេសណាដែលមានបំណងចង់មកវិនិយោគក្នុងប្រទេសកម្ពុជាឡើយ ផ្ទុយទៅវិញសម្តេចតេជោនៅតែបន្តអំពាវនាវអោយវិនិយោគិនបរទេសទាំងអស់អាចមកវិនិយោគនៅក្នុងប្រទេសកម្ពុជាគ្រប់ពេលវេលាទាំងអស់ ៕
ចែករំលែកព័តមាននេះ