ខេត្តសៀមរាប ៖ ពិតជាធ្វើឱ្យមានការភ្ញាក់ផ្អើលមែន ដែលជនជាតិជប៉ុន២នាក់បានក្លាយខ្លួនជាឃាតករសម្លាប់បុរសខ្មែរអ្នករ់តាក់ស៊ីប្លន់យករថយន្តហាយឡែនឌ័រមួយគ្រឿង ។ ហេតុការណ៍នេះ ធ្វើឱ្យមានការរំជួលចិត្តពីសំណាក់ជនជាតិជប៉ុនកំពុងរស់នៅកម្ពុជា ទាំងក្នុងមជ្ឈដ្ឋានអ្នកជំនួញ កីឡា និងវិស័យផ្សេងៗទៀត…
ខេត្តសៀមរាប ៖ ពិតជាធ្វើឱ្យមានការភ្ញាក់ផ្អើលមែន ដែលជនជាតិជប៉ុន២នាក់បានក្លាយខ្លួនជាឃាតករសម្លាប់បុរសខ្មែរអ្នករ់តាក់ស៊ីប្លន់យករថយន្តហាយឡែនឌ័រមួយគ្រឿង ។ ហេតុការណ៍នេះ ធ្វើឱ្យមានការរំជួលចិត្តពីសំណាក់ជនជាតិជប៉ុនកំពុងរស់នៅកម្ពុជា ទាំងក្នុងមជ្ឈដ្ឋានអ្នកជំនួញ កីឡា និងវិស័យផ្សេងៗទៀត និងបានប្រកាសអំពាវនាវដល់ជនរួមជាតិរបស់ខ្លួនឲ្យបរិច្ចាគថវិកាដើម្បីជួយដល់គ្រួសារជនរង
គ្រោះ ។
សូមរំឭកថា បុរសអ្នករត់តាក់សុីម្នាក់ឈ្មោះ ហ៊ឹម ចាន់ អាយុ៤០ឆ្នាំ រស់នៅភូមិបឹងដូនប៉ា សង្កាត់ស្លក្រាម ក្រុងខេត្តសៀមរាបបានត្រូវជនជាតិជប៉ុន២នាក់សម្លាប់ កាលពីល្ងាចថ្ងៃទី១៧ខែមីនាកន្លងទៅ នៅជិតកន្លែងជញ្ជីងថ្លឹង ក្នុងស្រុកពួក និងជាករណីឃាតកម្មដ៏កម្រនៅក្នុងទឹកដីខេត្តសៀមរាប ។
ហេតុការណ៍នេះពិតជារឿងរ៉ាវដែលមិននឹកស្មានដល់សោះឡើយ ព្រោះសម្រាប់ជនជាតិជប៉ុនតែងទទួលបានការគោរពស្រឡាញ់ពីពលរដ្ឋខ្មែរគ្រប់មជ្ឈដ្ឋាន ហើយក៏មិនភ្លេចសូម្បី១វិនាទីណាឡើយសម្រាប់ប្រទេសជប៉ុន ដែលបានជួយកម្ពុជាដ៏សន្ធឹកសន្ធាប់ដោយមិនគិតចង់បានអ្វីក្រៅពីឃើញកម្ពុជារីកចម្រើននោះ ។
សម្រាប់ជនជាតិជប៉ុននៅកម្ពុជា បានសម្តែងមតិថា នេះគឺជារឿងដ៏អាម៉ាស់បំផុត ដែលមានជនរួមជាតិរបស់ខ្លួនប្រព្រឹត្តអំពើព្រៃផ្សៃលើ លោក ហ៊ឹម ចាន់ ដែលធ្វើឱ្យភរិយារបស់អ្នកបើកបរតាក់ស៊ីរូបនេះ ក្លាយជាស្ត្រីមេម៉ាយក្នុង១ប៉ប្រិចភ្នែក ត្រូវទទួលបន្ទុកចិញ្ចឹមកូនកំព្រាប្រុសស្រី៤នាក់ ។
ស្ថានទូតជប៉ុនបានផ្ញើសាររំលែកទុក្ខរបស់លោកឯកអគ្គរាជទូតជប៉ុនប្រចាំកម្ពុជា ដោយលោកបានសរ សេរមានខ្លឹមសារយ៉ាងជ្រាលជ្រៅថា «ខ្ញុំពិតជាក្រៀមក្រំ នៅពេលបានឮដំណឹងថា អ្នកបើកបររថយន្ត ឈ្នួលលោក ហុឹមចាន់ ត្រូវជនជាតិជប៉ុន២នាក់សម្លាប់កាលពីថ្ងៃទី១៧ ខែមីនា ឆ្នាំ២០១៩ ។ ខ្ញុំសូមចូលរួមរំលែក ទុក្ខយ៉ាងក្រៀមក្រំចំពោះក្រុមគ្រួសារជនរងគ្រោះ» ។
ចំណែកលោក Akihiro Kato ប្រធានក្លិបកីឡាបាល់ទាត់អង្គរថាយហ្គឺរ ដែលរស់នៅខេត្តសៀមរាប បានចេញមុខសុំទោសមូយលើកជាពីរលើក ចំពោះពលរដ្ឋខ្មែរទូទាំងប្រទេសកម្ពុជាផងដែរ ។ លោកបានប្រកាសផ្តល់ថវិកា១.០០០ដុល្លារដល់គ្រួសារជនរងគ្រោះ ។ ចំពោះរូបលោកផ្ទាល់ដែលជាថ្នាក់ដឹកនាំបាល់ទាត់ និងក្រុមកីឡាករបាល់ទាត់ជប៉ុននៅកម្ពុជា បានកៀរគរប្រមូលថវិកាយកមកផ្តល់ជូនក្រុមគ្រួសារនៃសពលោក ហ៊ឹម ចាន់ នាថ្ងៃទី២០ ខែមីនា ឆ្នាំ២០១៩ ចំនួន៤.០៤៥ដុល្លារអាមេរិក ។
ជាមួយនេះលោកឧត្តមសេនីយ៍ត្រី ហួត សុធី ស្នងការរងនគរបាលខេត្ត ទទួលផែនសន្តិសុខ ក៏បានឧបត្ថម្ភថវិកាផ្ទាល់ខ្លួនមួយចំនួនផងដែរ ។ លោកស្នងការរង ហួត សុធី ក្នុងនាមតំណាងឱ្យក្រុមគ្រួសារសព និងក្នុងនាមរូបលោកផ្ទាល់ សូមថ្លែងអំណរគុណយ៉ាងជ្រាលជ្រៅបំផុត ដល់ក្លិបបាល់ទាត់អង្គរថាយហ្គឺរសៀមរាប និងសូមជូនពរម្ចាស់ក្លិប និងសមាជិកទាំងអស់ជួបតែសេចក្តីសុខ និងជោគជ័យជារៀងរហូត ។
សូមបញ្ជាក់ថា ជនសង្ស័យជាជនជាតិជប៉ុន២នាក់ ត្រូវបានតុលាការសម្រេចឃុំខ្លួនជាបណ្តោះអាសន្ននៅពន្ធាគារខេត្ត កាលពីរសៀលថ្ងៃទី១៩ មីនា ។ ជនជាតិជប៉ុនទាំង២នាក់ ដែលពេលនេះក្លាយជាពិរុទ្ធជន បានសារភាពជុំវិញទង្វើរបស់ខ្លួនថា មូលហេតុចាញ់ល្បែង និងជំពាក់លុយគេច្រើនផង ទើបបែកគំនិតប្លន់យករថយន្តទៅលក់ ។ ជាការពិត ល្បែងតែងធ្វើឱ្យវិនាស មិនថាជាតិសាសន៍ណាទេដែលលង់ខ្លួនចាញ់ល្បែង ហើយ គ្មានអ្វីសេសសល់នោះទេ ៕
ចែករំលែកព័តមាននេះ