មានព័ត៌មាន និងការសិក្សាជាច្រើនប្រាប់យើងឲ្យដឹងថា ស្មាតហ្វូនបានបង្កផលប៉ះពាល់ដល់ក្មេងៗជំនាន់ក្រោយ ខណៈដែលបណ្តាញសង្គមបង្កឲ្យមានការបែងចែកគ្នាក្នុងសង្គមជាដើម ។ ហើយការស្រាវជ្រាវពិតជាបង្ហាញមកថាស្មាតហ្វូនពិតជាបង្កបញ្ហាច្រើនដល់ទំនាក់ទំនងជាមួយអ្នកជាទីស្រលាញ់ដែរ ។ តើអ្នកគួរធ្វើដូចម្តេចដើម្បីជៀសវាងមិនឲ្យស្មាតហ្វូនរបស់អ្នកបង្កផលប៉ះពាល់ដល់ទំនាក់ទំនងរបស់អ្នកជាមួយអ្នកដទៃ?
១. កុំជំនួសការប្រាស្រ័យទាក់ទំនងផ្ទាល់មុខ
ពេលវេលាដែលពួកយើងចំណាយលើការទាក់ទងគ្នាតាមប្រព័ន្ធអេឡិចត្រូណិចបានកើនឡើងយ៉ាងខ្លាំងតាំងពីការបង្កើតឲ្យមានស្មាតហ្វូនមកដែលអាចបង្កឲ្យយើងចំណាយពេលវេលាកាន់តែតិចក្នុងការជួបគ្នាផ្ទាល់។
ការស្រាវជ្រាវបានបង្ហាញមកថា ការប្រាស្រ័យទាក់ទងគ្នាផ្ទាល់អាចជួយជំរុញដល់អារម្មណ៍របស់យើង និងកាត់បន្ថយការបាក់ទឹកចិត្តជាដើម។ សកម្មភាពដែលមានការចូលរួមដោយអ្នកដទៃក៏ជួយដល់សុខភាពផ្លូវចិត្តរបស់យើងដែរ។
២. កុំប្រើទូរស័ព្ទពេលដែលកំពុងនៅជាមួយអ្នកដទៃ
ដើម្បីស្ថាបនាទំនាក់ទំនងរឹងមាំជាមួយមនុស្សម្នាក់ អ្នកត្រូវដឹងពីការប្រើប្រាស់ទូរស័ព្ទពេលដែលអ្នកនៅជាមួយមនុស្សម្នាក់នោះព្រោះគុណភាពនៃការប្រាស្រ័យទាក់ទងគ្នានឹងធ្លាក់ចុះប្រសិនបើនរណាម្នាក់ចាប់ផ្តើមដកទូរស័ព្ទមកប្រើប្រាស់។
៣. ទុកទូរស័ព្ទក្នុងកំឡុងពេលមានការសន្ទនាសំខាន់ៗ
ការស្រាវជ្រាវបានបង្ហាញឲ្យដឹងថាស្មាតហ្វូនអាចបង្វែរចំណាប់អារម្មណ៍អ្នកប្រើប្រាស់បានយ៉ាងងាយ ហើយការស្រាវជ្រាវមួយចំនួនទៀតបង្ហាញមកថាពេលដែលមានទូរស័ព្ទលើតុ វាអាចកាត់បន្ថយជំនឿទុកចិត្ត និងគុណភាពនៃទំនាក់ទំនងរវាងមនុស្សពេលដែលកំពុងមានការសន្ទនាសំខាន់ៗ។
៤. កុំឲ្យទូរស័ព្ទអ្នកបញ្ឈប់អ្នកពីការប្រាស្រ័យទាក់ទងជាមួយមនុស្សដែលអ្នកមិនស្គាល់
ការស្រាវជ្រាវជាច្រើនបានឲ្យដឹងថា ការទំនាក់ទំនងជាមួយនឹងមនុស្សដែលអ្នកមិនស្គាល់ ដូចជាការនិយាយជាមួយអ្នកលក់ ឬអ្នកគិតលុយ អាចជួយដល់អារម្មណ៍របស់អ្នកបានដែរ។ ប៉ុន្តែស្មាតហ្វូនអាចធ្វើឲ្យអ្នកប្រើប្រាស់ចាប់ផ្តើមពឹងផ្អែកលើទូរស័ព្ទខ្លួនច្រើនជាងអ្នកដទៃដែលអាចបញ្ឈប់អ្នកប្រើប្រាស់មិនឲ្យប្រាស្រ័យទាក់ទងជាមួយអ្នកដទៃ។
ចែករំលែកព័តមាននេះ