តើនរណាខ្លះមិនចង់ធ្វើជាថៅកែគេ? ការធ្វើជាថៅកែគេតែម្យ៉ាងគឺមិនគ្រប់គ្រាន់ទេ។ ពោលគឺយើងត្រូវតែធ្វើជាថៅកែ ដែលដឹកនាំមុខជំនួញឱ្យជោគជ័យ។ តែគ្រប់គ្នាមិនមែនសុទ្ធតែអាចទទួលបានភាពជោគជ័យក្នុងមុខជំនួញរបស់ខ្លួនឡើយ។ យើងគួរតែរៀនពីភាពជោគជ័យរបស់អ្នកដើរមុន ហើយជាពិសេសគឺត្រូវដឹងពីមូលហេតុនៃការបរាជ័យ ដើម្បីចៀសឱ្យផុតពេលយើងដើរតាមក្រោយ។ ខាងក្រោមនេះ គឺជាមូលហេតុទាំង៥យ៉ាង…
តើនរណាខ្លះមិនចង់ធ្វើជាថៅកែគេ? ការធ្វើជាថៅកែគេតែម្យ៉ាងគឺមិនគ្រប់គ្រាន់ទេ។ ពោលគឺយើងត្រូវតែធ្វើជាថៅកែ ដែលដឹកនាំមុខជំនួញឱ្យជោគជ័យ។ តែគ្រប់គ្នាមិនមែនសុទ្ធតែអាចទទួលបានភាពជោគជ័យក្នុងមុខជំនួញរបស់ខ្លួនឡើយ។ យើងគួរតែរៀនពីភាពជោគជ័យរបស់អ្នកដើរមុន ហើយជាពិសេសគឺត្រូវដឹងពីមូលហេតុនៃការបរាជ័យ ដើម្បីចៀសឱ្យផុតពេលយើងដើរតាមក្រោយ។
ខាងក្រោមនេះ គឺជាមូលហេតុទាំង៥យ៉ាង ដែលធ្វើឱ្យការរកស៊ីមិនជោគជ័យ បើតាមគេហទំព័រ Alux.com៖
១. គ្មានអ្វីដែលខុសពិសេសពីគេ ៖ ដោយសារតែឃើញគេបើកហាងកាហ្វេទៅជោគជ័យ អ្នកក៏គិតចង់បើកហាងកាហ្វេដែរ។ តែមុននឹងបើក អ្នកគួរតែគិតដែរថា តើកត្តាអ្វីខ្លះដែលអាចឱ្យភ្ញៀវមកផឹកនៅហាងរបស់អ្នក ហើយមិនទៅហាងរបស់អ្នកដទៃ។ តើអ្នកមានអ្វីដែលហាងគេផ្សេងគ្មានដែរឬទេ?ប្រសិនបើអ្នកគ្រាន់តែលក់កាហ្វេដែលមានរសជាតិដូចគេដូចឯង ឬ ក៏មានសេវាដូចតែគេ នោះអ្នកផឹកក៏អាចទៅទិញនៅហាងផ្សេងក៏បានដែរ។ នេះគឺហៅថា “ការរកស៊ីតាមគ្នា”។
២. គ្មានយុទ្ធសាស្ត្រ ៖ អ្នកត្រូវតែដឹងថា ការរកស៊ីគឺធ្វើឡើងពីមួយដំណាក់ទៅមួយដំណាក់។ វាប្រដាក់គ្នាដូចច្រវ៉ាក់អ៊ីចឹង។ ប្រសិនបើអ្នកធ្វើដូចនេះ អ្នកនឹងបានផលដូចនេះ ហើយបន្ទាប់មកគឺត្រូវធ្វើអ្វីបន្តទៀត។ នេះគឺជាយុទ្ធសាស្ត្រ ដែលអ្នកត្រូវគិតដល់ពេលធ្វើការប្រកបជំនួញ។
៣. ខ្វះការយល់ដឹងពីតម្រូវការទីផ្សារ ៖ មូលហេតុដ៏សាមញ្ញបំផុត ដែលធ្វើឱ្យមុខជំនួញបរាជ័យ គឺការមិនខ្វល់ពីអតិថិជន។ ការស្តាប់មតិយោបល់របស់អ្នកទិញ ហើយគិតគូរកែតម្រូវ គឺជាអ្វីដែលអ្នកទិញចង់បាន។ នេះក៏ព្រោះតែដូចពាក្យមួយគេនិយមនិយាយថា៖ “អ្នកទិញគឺជាស្តេច”។
៤.ចាប់ដៃគូខុស ៖ នេះគឹមិនខុសអ្វីពីការរើសគូស្រករដែរ។ ការចាប់ដៃគូជំនួញគឺពិតជាសំខាន់ ព្រោះតែបើរើសខុស នោះជីវិតអាជីវកម្មរបស់អ្នកនឹងក្លាយទៅជាមូលហេតុនៃការឈឺក្បាលរាល់ថ្ងៃហើយ។ សាកស្រមៃទៅមើលថា បើថ្ងៃណាមួយដៃគូអាជីវកម្មរបស់អ្នកចាប់ផ្តើមខ្ជិលរវីរវល់ នោះអ្នកនឹងត្រូវខំធ្វើតែឯង ឬក៏ ត្រូវបែងចែកហ៊ុនជាមិនខាន។
៥. រើសបុគ្គលិកខុស ៖ ការរើសមនុស្សយកមកធ្វើការ គឺទាមទារការចេះមើលមនុស្សឱ្យបានត្រឹមត្រូវ។ បុគ្គលោកដែលមានតម្លៃ នឹងជួយឱ្យអាជីវកម្មរបស់អ្នករីកទៅមុខដូចផ្សិតអ៊ីចឹង។ បើមនុស្សគ្រប់គ្នាលើទូកសុទ្ធតែខំអុំស្មើដៃគ្នា នោះទូកនឹងទៅមុខលឿន។ តែបើមានអ្នកយកជើងរាទឹក នោះប្រាកដជាវិលមុខជាមិនខានទេ សម្រាប់ថៅកែ។
នេះគឺគ្រាន់តែជាចំណុចខ្លះៗប៉ុណ្ណោះ ដែលជាញឹកញយធ្វើឱ្យការរកស៊ីបរាជ័យ។ ការបរាជ័យគឺជាការចាប់ផ្តើមនៃភាពជោគជ័យ ព្រោះវាគឺជាមេរៀនសម្រាប់ទៅថ្ងៃមុខ។ តែពេលខ្លះ បើយើងអាចរៀនភាពបរាជ័យនោះពីអ្នកដទៃបាន យើងគួរតែធ្វើយ៉ាងណាចៀសឱ្យឆ្ងាយទៅ ព្រោះអ្នកមិនមែនមានលុយវាល់លានមកឱ្យខាតបង់រហូតនោះទេ៕
ចែករំលែកព័តមាននេះ