ទីក្រុងវ៉ាស៊ីនតោន៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានរិះគន់ទំនាក់ទំនងរវាងសហរដ្ឋអាម៉េរិក និងអង្គការណាតូ (NATO) ដោយចាត់ទុកថា ជា «ទំនាក់ទំនងម្ខាង» និង «គួរឱ្យអស់សំណើច» ខណៈកិច្ចប្រជុំកំពូល NATO គ្រោងនឹងប្រព្រឹត្តទៅនៅសប្តាហ៍ក្រោយ ក្នុងទីក្រុងអង់ការ៉ា ប្រទេសតួកគី។ នេះបើយោងតាមការចុះផ្សាយរបស់សារព័ត៌មាន ស៊ីនហួ នៅថ្ងៃទី៣ ខែកក្កដានេះ។

លោក ត្រាំ បានសរសេរនៅលើបណ្តាញសង្គម Truth Social ថា វាជារឿង «គួរឱ្យអស់សំណើច» ដែលសហរដ្ឋអាម៉េរិកបន្តរក្សាទំនាក់ទំនងដែលមិនមានភាពទៅវិញទៅមកជាមួយ NATO ដោយលោកអះអាងថា សម្ព័ន្ធមិត្ត «មិនបានឈរនៅខាងសហរដ្ឋអាម៉េរិកទេ»។

ការលើកឡើងរបស់លោក ត្រាំ ធ្វើឡើងមុនកិច្ចប្រជុំកំពូល NATO ឆ្នាំ២០២៦ ដែលនឹងរៀបចំឡើងនៅថ្ងៃទី៧-៨ ខែកក្កដា ក្នុងទីក្រុងអង់ការ៉ា ដោយមេដឹកនាំប្រទេសសមាជិកនឹងពិភាក្សាអំពីការពង្រឹងសមត្ថភាពការពារជាតិ ការចែករំលែកបន្ទុក និងបញ្ហាសន្តិសុខក្នុងតំបន់ និងពិភពលោក៕