ជំនន់ទឹកភ្លៀងនៅតាមដងអូរ នៅស្រុកសំឡូតថមថយហើយបន្សល់ទុកការខូចខាតហេដ្ឋារចនាសម្ព័ន្ធផ្លូវថ្នល់មួយចំនួន
- បាត់ដំបង
ខេត្តបាត់ដំបង៖ ជំនន់ទឹកភ្លៀងដែលហក់ឡើងមួយប្រាវកាលពីម្សិលម៉ិញ នៅក្នុងភូមិសាស្ត្រស្រុកសំឡូត បើគិតត្រិមម៉ោង១១និង៣០នាទីថ្ងៃត្រង់ថ្ងៃទី ០៥ កក្កដា បានថមថយវិញហើយ។ នេះបើតាមសេចក្ដីរាយការណ៏ពីអធិការស្រុកសំឡូត ដែលកំពុងតាមដានអំពីស្ថានភាពជំនន់ទឹកភ្លៀង ដែលធ្វើឲ្យខូចខាតខ្លះៗ ដល់ប្រព័ន្ធលូ និង ផ្លូវថ្នល់ ក្នុងមូលដ្ឋាន។
អធិការស្រុកសំឡូត លោក ម៉ែន រីម បានប្រាប់កោះសន្តិភាព តាមទូរស័ព្ទនៅ ព្រឹកថ្ងៃទី ០៥ កក្កដា នេះថា ជំនន់ទឹកភ្លៀងបានហក់ឡើងមួយប្រាវគួឲ្យបារម្ភ កាលពីថ្ងៃទី ០៤ កក្កដា ប៉ុន្តែមកទល់និងវេលាថ្ងៃត្រង់ ថ្ងៃទី ០៥ កក្កដា នេះ ស្ថានភាពទឹកបានថមថយច្រើនហើយ។
លោកថា នៅតាមដងអូរនានា ជំណន់ទឹកភ្លៀងបានថយចុះទៅកាន់ដងស្ទឹង ហើយនៅតាមដងស្ទឹង ក៏ថយចុះច្រើនដែរនោថ្ងៃនេះ។ ប៉ុន្តែជំនន់ទឹកភ្លៀងឲកាលពីម្សិលមិញនេះ បានធ្វើឲ្យប៉ះពាល់តិចទូចដល់ស្ពានថ្នល់ តែប្រជាពលរដ្ឋអាចធ្វើដំណើរបាននៅឡើយទេ។ ជំនន់ទឹកភ្លៀង បានហក់ឡើងមួយប្រាវកាលពីថ្ងៃទី ០៤ កក្កដា ដែលនាំឲ្យប្រជាពលរដ្ខមួយចំនួនជួបការលំបាកក្នុងការធ្វើដំណើរឆ្លងកាត់ស្ពាន ឬ កំណាត់ផ្លូវនានា ក្នុងស្រុកសំឡូត។
រដ្ឋបាលស្រុកសំឡូត បានសង្កេតឃើញជំនន់ទឹកភ្លៀង ដែលហកឡើងខ្លាំងតាមដងអូរនានា បានលិចកំណាត់ផ្លូវ ស្ពាន និង ប្រព័ន្ធលូ មួយចំនួន នៅក្នុងភូមិសាស្ត្រ ឃុំតាសាញ ឃុំសំឡូត ឃុំតាតោក និង ឃុំមានជ័យ។ គេឃើញនៅតាមដងអូរនានា បានហក់ឡើងខ្លាំង រីឯស្ពានចាសទ្រុឌទ្រម និង ប្រព័ន្ធលូរំដោះទឹកមួយចំនួនដែលឆ្លងកាត់អូរ ក័ប្រឈមនឹងជំនន់ទឹកភ្លៀងលើកដំបូងនេះដែរ។ ប្រជាពលរដ្ឋដែលត្រូវធ្វើដំណើរឆ្លងកាត់ស្ពាន និង ប្រព័ន្ធលូទាំងនោះ ជួបការលំបាក និង ព្រួយបារម្ភ ព្រោះខ្លាចក្រែងកម្លាំងទឹកវាយប្រហារផ្ដាច់មិនអាចឆ្លងកាត់បាន ប្រសិនបើភ្លៀងមិនព្រមស្រាកស្រាន្ត។
មន្ទីរធនធានទឹកនិងឧតុនិយមខេត្តបាត់ដំបង បានប្រកាសជូនដំណឹងអំពី«ព្រឹត្តិបត្រព្យាករណ៏អាកាសធាតុ» ក្នុងខេត្តបាត់ដំបង នៅថ្ងៃទី ០៤ កក្កដា ដោយបានជូនដំណឹងថា ចាប់ពីថ្ងៃទី ០៥ ដល់ថ្ងៃទី ០៧ កក្កដា ខេត្តបាត់ដំបង បានទទូលរងនូវឥទ្ធិពលពីជ្រលង នៃកូនព្យុះលើកទី១០ ឈ្មោះ «ម៉ៃស័ក»។ ឥទ្ធិពលកូនព្យុះនេះ បានធ្វើឲ្យមានខ្យល់កន្ត្រាក់ក្នុងល្បឿន ៧-១១ ម៉ែត្រ/វិនាទី និង មានភ្លៀង ផ្គររន្ទះ ក្នុងកម្រិតខ្យោយ។
យ៉ាងណាក៏ដោយ បើតាមលោក ម៉ែន រីម អធិការស្រុកសំឡូត បានឲ្យដឹងបន្ថែមថា អាកាសធាតុនៅស្រុកសំឡូត ក្នុងព្រឹកថ្ងៃនេះ (០៥.០៧.២៦) ហាក់បានធូរស្រាលដូចប្រក្រតីវិញហើយ ។ ជំនន់ទឹកភ្លៀងនៅតាមដងអូរ ដែលកកស្ទះខ្លាំង កាលពីម្សិលមុំិញ ក៏បានស្រកចុះច្រើនដែរ រួមទាំងជំនន់ទឆឹកនៅតាមដងស្ទឹងផង។ ប៉ុន្តែលោកអធិការ បានបញ្ជាក់ថា ក្រោយជំនន់ទឹកភ្លៀងបានថយចុះ បានបន្សល់ទុកនូវផលប៉ះពាល់មួយចំនួន។ ដូចជា៖ ស្ពាន ប្រព័ន្ធលូ និង កំណាត់ផ្លូវមួយចំនួន បានរងការខូចខាតតិចទូច តែប្រជាពលរដ្ឋនៅអាចធ្វើដំណើរឆ្លងកាត់បាននៅឡើយទេ។ ដោយឡែកចំពោះផលដំណាំមមិនមានរងការខូចខាត ហើយក៏ពុំមានមនុស្សគ្រោះថ្នាក់ដោយសារជំនន់ទឹកភ្លៀងមួយដង្ហើមចង្រិតនេះដែរ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ