ទីក្រុងកៀវ៖ ថ្ងៃនេះ យោធារុស្ស៊ីវាយប្រហារប្រទេសអ៊ុយក្រែនយ៉ាងខ្លាំងក្លា ជាពិសេសរដ្ឋធានីកៀវរងគ្រោះយ៉ាងដំណំស្លាប់មនុស្សរហូតដល់១៧នាក់។ ចំណែកអ្នករបួសក៏កើនឡើងជាបន្តបន្ទាប់ផងដែរ។ គេស្ដាប់ឮសំឡេងផ្ទុះយ៉ាងកងរំពងនៅទីក្រុងនេះអស់រយៈពេលជាច្រើនម៉ោង។ រុស្ស៊ីប្រើប្រាស់មីស៊ីលផ្លោង មីស៊ីលបណ្ដែត និងដ្រូនវាយប្រហារខ្ទេចអគារជាច្រើនខ្នង និងទីជម្រករបស់ប្រជាជននៅទូទាំងរដ្ឋធានី។ នៅអំឡុងពេលវាយប្រហារនោះ ប្រជាជនរត់ទៅសម្ងំលាក់ខ្លួននៅក្នុងស្ថានីយរថភ្លើងក្រោមដីបន្ទាប់ពីលោកហ្សេឡិនស្គី និងអាជ្ញាធរអ៊ុយក្រែនចេញសេចក្ដីប្រកាសអាសន្នជាលើកទី១។
អភិបាលក្រុងកៀវថ្លែងថាក្រៅពីមនុស្សស្លាប់ដូចរៀបរាប់ខាងលើ មនុស្ស៨៨នាក់ទៀតរងរបួស។ នៅទូទាំងទីក្រុងកៀវ ទីតាំង៣០កន្លែងរងការខូចខាត។ ភាគច្រើនជាអគារស្នាក់នៅរបស់ប្រជាជន និងសំណង់ស៊ីវិល។ រដ្ឋមន្ត្រីក្រសួងមហាផ្ទៃអ៊ុយក្រែនថ្លែងថាអគារ២០កន្លែងរងការខូចខាតនៅទីក្រុងកៀវ។ ទីភ្នាក់ងារសង្គ្រោះបន្ទាន់ថ្លែងថាខ្លួនបានបញ្ជូនក្រុមការងារជិត៥០០នាក់, រថយន្ត១០០និងឧទ្ធម្ភាគចក្រមួយគ្រឿងដើម្បីចាត់ការនឹងភ្លើងឆេះក្រោយការវាយប្រហារនោះ។
រដ្ឋមន្ត្រីការបរទេសអ៊ុយក្រែន លោកអានឌ្រី ស៊ីប៊ីហា បានអំពាវនាវឱ្យក្រុមប្រទេសសម្ព័ន្ធមិត្តរបស់អ៊ុយក្រែនខិតខំពង្រឹងប្រព័ន្ធការពារដែនអាកាសរបស់ប្រទេសនេះក្រោយការវាយប្រហារដែលលោកពិពណ៌នាថាជា «រាត្រីរន្ធត់» នៅទីក្រុងកៀវ។ លោកជំរុញយ៉ាងទទូចទៅក្រុមប្រទេសជាដៃគូសូមកុំបង្អែបង្អង់តទៅទៀតក្នុងការផ្ដល់ប្រព័ន្ធការពារដែនអាកាស និងមីស៊ីល។ លោកយល់ថាចំនួនអ្នកស្លាប់អាចនឹងកើនឡើងបន្ថែមទៀតនៅពេលក្រុមអ្នកជួយសង្គ្រោះរកឃើញសាកសពជនរងគ្រោះជាបន្តបន្ទាប់។
គួរកត់សម្គាល់ថាប៉ុន្មានអាទិត្យចុងក្រោយនេះ រុស្ស៊ីសម្រុកវាយប្រហារទីក្រុងកៀវកាន់តែខ្លាំងឡើងៗទោះបីអ៊ុយក្រែនបញ្ជូនដ្រូនរយៈចម្ងាយឆ្ងាយទៅវាយប្រហារទីតាំងយោធា និងដេប៉ូប្រេងរបស់រុស្ស៊ីធ្វើឱ្យរុស្ស៊ីខ្វះខាតប្រេង និងមានបញ្ហារអាក់រអួលក្នុងការផ្គត់ផ្គង់កងទ័ពនៅសមរភូមិមុខយ៉ាងណាក្ដី។ លោកស៊ីប៊ីហាសូមចេញមុខបដិសេធការអះអាងដែលថារុស្ស៊ីវាយប្រហារកាន់តែខ្លាំងដោយសារអ៊ុយក្រែនក៏សម្រុកវាយប្រហាររុស្ស៊ីដែរ។ លោកថាអ៊ុយក្រែនត្រូវតែមានសិទ្ធិការពារខ្លួនតាមមាត្រា៥១នៃធម្មនុញ្ញអង្គការសហប្រជាជាតិ៕ ប្រភព៖ AP
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ