តាមប្រភពព័ត៌មាន Mirrorឱ្យដឹងថា ទារិកាម្នាក់ដែលមានអាយុប្រហែលជា១ម៉ោងប៉ុណ្ណោះ ត្រូវបានគេរកឃើញនៅក្នុងព្រៃ ជាមួយនឹងស្រមោចរោមពេញខ្លួន នៅលើកោះ Olango ប្រទេសហ្វីលីពីន កាលពីព្រឹកថ្ងៃអង្គារ។ ការយំរបស់ទារិកាកំសត់ម្នាក់នេះ បានធ្វើឱ្យស្ត្រីម្នាក់ដែលដើរកាត់តាមព្រៃខាងលើឮសូរ ហើយក៏ដើរតាមរក រហូតទាល់តែឃើញ ។ គាត់ឃើញទារិកានោះ ដេកទាំងគ្មានខោអាវអ្វីទាំងអស់ ហើយមុខត្រូវបានរលាកដោយសារតែកម្តៅថ្ងៃ។
អ្នកនៅម្តុំនោះ បាននាំគ្នាទៅជួយម្នាក់មួយដៃមួយជើង ក្រោយពេលដឹងដំណឹងនេះ។ លោក Eliezer Rosalejos ដែលម្នាក់ក្នុងចំណោមអ្នកទៅជួយបានប្រាប់ថា «ពិតជាអរគុណព្រះមែនទែន ដែលក្មេងនោះនៅរស់ពេលដែលយើងរកឃើញ ។ ខ្ញុំសង្ឃឹមថា ម្តាយឪពុករបស់ក្មេងនេះ នឹងមានអារម្មណ៍ដឹងខុស ក្រោយពេលធ្វើបែបនេះ។ ក្មេងៗពិតជាមានតម្លៃណាស់។ ខ្ញុំនៅមិនយល់ទាល់តែសោះថាហេតុអ្វីបានជានៅតែមានអ្នកហ៊ានយកកូនបោះចោលបែបនេះ» ។
ខណៈនេះ ទារិកាខាងលើកំពុងតែសម្រាកព្យាបាលនៅក្នុងមន្ទីរពេទ្យ ក្រោមការការពាររបស់ច្បាប់។ ក្រុមអាជ្ញាធរកំពុង ធ្វើការស្រាវជ្រាវវែករកមុខរបស់ម្តាយក្មេង ដែលយកកូនទៅបោះចោលឱ្យរងទុក្ខវេទនាបែបនេះ៕
ចែករំលែកព័តមាននេះ