ទីក្រុងតូក្យូ៖ ជារឿងគួរឱ្យភ្ញាក់ផ្អើលដែលនាយករដ្ឋមន្ត្រីជប៉ុន លោកអ៊ីស៊ីបា នៅសុខៗស្រាប់តែប្រកាសអំពីគម្រោងលាលែងពីតំណែងទាំងកណ្ដាលទី។ លោកសម្រេចចិត្តបែបនេះតបតាមការស្នើសុំពីមន្ត្រីធំៗនៅក្នុងគណបក្សជាមួយគ្នាដែលយល់ថាលោកគួរតែទទួលស្គាល់អសមត្ថភាពរបស់ខ្លួនដែលទទួលបរាជ័យនៅក្នុងការបោះឆ្នោតសភាខែកក្កដា ឆ្នាំ២០២៥។
ដំណឺងស្ដីពីគម្រោងចុះពីតំណែងនេះត្រូវបានផ្សព្វផ្សាយមុនគេដោយទូរទស្សន៍ជប៉ុន អឹនអេចខេ (NHK)។ មុនដំបូង លោកអ៊ីស៊ីបាប្រកែកអត់ចង់ចុះពីតំណែងទេទោះបីមន្ត្រីគណបក្សរបស់គាត់ស្នើសុំយ៉ាងទទូចអស់រយៈពេលជាងមួយខែមកហើយក៏ដោយ។ លោកអះអាងថាបើលោកចុះពីតំណែងអាចធ្វើឱ្យមានវិបត្តិនយោបាយព្រោះប្រទេសជាតិកំពុងប្រឈមនឹងបញ្ហាច្រើនណាស់ទាំងនៅក្នុងប្រទេស និងក្រៅប្រទេស។
ការប្រកាសអំពីគម្រោងលាលែងពីតំណែងនេះកើតឡើង១ថ្ងៃមុនពេលគណបក្សប្រជាធិបតេយ្យសេរីរបស់លោកត្រៀមប្រកាសសេចក្ដីសម្រេចថាតើត្រូវបោះឆ្នោតជ្រើសរើសប្រធានគណបក្សថ្មីឬយ៉ាងណា។ បើនិយាយម៉្យាងទៀតថា វាជាសញ្ញានៃការដកតំណែងរបស់លោកពីប្រធានបក្ស ហើយក៏ដកតំណែងពីនាយករដ្ឋមន្ត្រីផងដែរ។ ទូរទស្សន៍អឹនអេចខេផ្សាយថាលើកនេះលោកអ៊ីស៊ីបាឈប់ប្រកែកទៀតហើយព្រោះគាត់មិនចង់ឱ្យបែកបាក់គ្នាកាន់ខ្លាំងនៅក្នុងគណបក្ស។
បើសិនគាត់នៅតែជម្នះចិត្តជាបន្តទៀត គាត់ពិបាកនឹងគ្រប់គ្រងសណ្ដាប់ធ្នាប់នៅក្នុងបក្សផង និងក៏ពិបាកគ្រប់គ្រងរដ្ឋាភិបាលសំឡេងភាគតិចផងដែរ។ សូមរំលឹកថានៅក្នុងការបោះឆ្នោតជ្រើសតាំងអ្នកតំណាងរាស្ត្រកាលពីខែកក្កដា គណបក្សរបស់លោកអ៊ីស៊ីបាទទួលបានអាសនៈមិនគ្រប់គ្រាន់ដើម្បីបង្កើតរដ្ឋាភិបាលម្នាក់ឯងបានឡើយ។ ដូច្នេះត្រូវដឹកនាំរដ្ឋាភិបាលសំឡេងភាគតិចនៅក្នុងសភា៕
ចែករំលែកព័តមាននេះ