រាជធានីភ្នំពេញ ៖ ចោរជើងចាស់២នាក់ ជំនាញខាងកាច់កម៉ូតូយ៉ាងសកម្ម ដែលកន្លងមកធ្លាប់ធ្វើសកម្មភាពលួចបានម៉ូតូជាច្រើនគ្រឿង រួចមកហើយនោះ បានបន្តចេញធ្វើសកម្មភាពកាច់កម៉ូតូនៅក្នុងភូមិសាស្ត្រខណ្ឌពោធិ៍សែនជ័យបន្តទៀត ប៉ុន្តែសំណាងអាក្រក់ ជួបកម្លាំងប៉ុស្តិ៍នគរបាលរដ្ឋបាលចោមចៅទី៣ និងកម្លាំងអធិការដ្ឋាននគរបាលខណ្ឌពោធិ៍សែនជ័យ កំពុងល្បាតតាមផ្លូវ។ ភ្លាមៗនោះ គ្រាន់តែឃើញនគរបាលជនសង្ស័យក៏បានបើកម៉ូតូគេចខ្លួនជ្រុលទៅបុកម៉ូតូអ្នកដឹកអីវាន់ Grep ១គ្រឿងពេញទំហឹង ទើបនគរបាលឃាត់ខ្លួនបានតែម្ដង ។
ហេតុការណ៍នោះបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី២៦ ខែសីហា ឆ្នាំ២០២៦ នៅតាមផ្លូវបេតុង ស្ថិតនៅក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
នគរបាលពុំទាន់បានប្រាប់ឲ្យដឹងពីអត្តសញ្ញាណជនសង្ស័យទាំង២នាក់នោះនៅឡើយទេ ដោយគ្រាន់តែប្រាប់ថា ជនខាងលើគឺជាមុខសញ្ញាចាស់ (ជាចោរជើងចាស់ជំនាញខាងកាច់កម៉ូតូ) ហើយធ្លាប់ធ្វើសកម្មភាពលួចម៉ូតូបានសម្រេចមិនតិចដងនោះទេ ។
ដោយឡែកនៅវេលាព្រឹកថ្ងៃកើតហេតុ ជនសង្ស័យខាងលើបានជិះម៉ូតូ ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខភ្នំពេញ 1LQ-7601 ជិះឌុបគ្នាចេញធ្វើសកម្មភាពកាច់កម៉ូតូនៅក្នុងភូមិសាស្ត្រខណ្ឌពោធិ៍សែនជ័យ បន្តទៀត ។
នគរបាលបានប្រាប់ឲ្យដឹងបន្តថា ខណៈពលទៅដល់ត្រង់ចំណុចកើតហេតុខាងលើ បានជួបកម្លាំងប៉ុស្តិ៍នគរបាលរដ្ឋបាលចោមចៅទី៣ និងកម្លាំងអធិការដ្ឋាននគរបាលខណ្ឌពោធិ៍សែនជ័យ កំពុងល្បាតតាមផ្លូវបេតុងភូមិព្រៃទា១ ។
ខណៈនោះ ដោយសារតែដឹងខ្លួនឯងជាចោរ (គេហៅថាមនុស្សមានខ្លួន) ជនសង្ស័យក៏បានបើកម៉ូតូគេចខ្លួនចេញពីនគរបាល ហើយនគរបាល ក៏បានដេញតាមប្រកៀកប្រកិត ធ្វើឲ្យជនសង្ស័យភ័យក៏ជ្រុលទៅបុកពីក្រោយម៉ូតូអ្នកដឹកអីវាន់ Grep ១គ្រឿងម៉ាកហុងដាឌ្រីមសេ១២៥ ពណ៌ខ្មៅពាក់ស្លាកលេខព្រៃវែង 1Q-9709 ពេញទំហឹង ។
នគរបាលបានប្រាប់ឲ្យដឹងបន្ថែមថា ពេលនោះបណ្ដាលឲ្យម៉ូតូដឹកអីវាន់ Grep បាក់កន្លុយ និងស្លាកលេខដាច់ជ្រុះមកដី ហើយជនសង្ស័យបានដួលម៉ូតូ ទើបត្រូវនគរបាលឃាត់ខ្លួនបានទាំង២នាក់ភ្លាមៗតែម្ដង ។ បន្ទាប់មកនគរបាលបានបញ្ជូនជនសង្ស័យខាងលើទៅកាន់ផ្នែកនគរបាលព្រហ្មទណ្ឌ ខណ្ឌពោធិ៍សែនជ័យ ដើម្បីសួរនាំ និងកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ