រាជធានីភ្នំពេញ ៖ ថ្លែងក្នុងពេលបញ្ចប់បេសកកម្មការទូតរយៈពេលជាង៣ឆ្នាំនៅកម្ពុជាលោក George Edgar ឯកអគ្គរដ្ឋទូតសហភាពអឺរ៉ុប(EU)ប្រចាំកម្ពុជា មានប្រសាសន៍ពីការកត់សម្គាល់ថា ប្រទេសកម្ពុជាមានការរីកចម្រើនលើគ្រប់វិស័យ បើប្រៀបធៀបនឹងកាល២០ឆ្នាំមុន ។…
រាជធានីភ្នំពេញ ៖ ថ្លែងក្នុងពេលបញ្ចប់បេសកកម្មការទូតរយៈពេលជាង៣ឆ្នាំនៅកម្ពុជាលោក George Edgar ឯកអគ្គរដ្ឋទូតសហភាពអឺរ៉ុប(EU)ប្រចាំកម្ពុជា មានប្រសាសន៍ពីការកត់សម្គាល់ថា ប្រទេសកម្ពុជាមានការរីកចម្រើនលើគ្រប់វិស័យ បើប្រៀបធៀបនឹងកាល២០ឆ្នាំមុន ។ នេះបើយោងតាមលោក កេត សោផាន់ អ្នក នាំពាក្យក្រសួងការបរទេសនិងសហប្រតិបត្តិការអន្តរជាតិ ថ្លែងប្រាប់ ក្រោយពីលោកGeorge Edgar បានចូលជួបលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ ដើម្បីជម្រាបលា កាលពីរសៀលថ្ងៃទី១២ ខែមីនា នៅទីស្តីការក្រសួង ។
លោក George Edgar បានអរគុណលោកឧបនាយករដ្ឋមន្ត្រី ដែលផ្តល់ឱកាសដល់រូបលោកក្នុងការពិភាក្សាដោយបើកចំហ និងស្មោះ ត្រង់នៅលើកិច្ចការជាច្រើន ។ រយៈពេលជាង៣ឆ្នាំកន្លងមកនេះ លោករីករាយដែលបានធ្វើការងារយ៉ាងល្អជាមួយក្រសួងការបរទេសនិងសហប្រតិបត្តិការអន្តរជាតិ ។
លោក George Edgar លើកឡើងថា លោកមានការកត់សម្គាល់ពីការរីកចម្រើនរបស់ប្រទេសកម្ពុជាក្នុងការអភិវឌ្ឍសេដ្ឋកិច្ច ខុសពីកាល២០ឆ្នាំមុនដែលលោកមានវត្តមាននៅកម្ពុជា គឺពេលនេះបានឃើញនូវការរីកចម្រើននៃសេដ្ឋកិច្ចកម្ពុជា ។ កម្ពុជាជាប្រទេសដែលមានប្រសិទ្ធភាពក្នុងការអនុវត្តជំនួយរបស់សហភាពអឺរ៉ុប(EU) ។ សហភាពអឺរ៉ុប ក៏បានតម្រង់ទិសកម្មវិធីអភិវឌ្ឍន៍របស់ខ្លួន ស្របតាមកម្មវិធីអភិវឌ្ឍន៍នានារបស់កម្ពុជា តែសហភាពអឺរ៉ុបមិនបានយកកម្មវិធីរបស់ខ្លួនមកឲ្យកម្ពុជាអនុវត្តនោះទេ ។
លោក George Edgar ថ្លែងថា សហភាពអឺរ៉ុបបានតម្រង់ទិសតាមផែនការយុទ្ធសាស្ត្រអភិវឌ្ឍន៍ប្រទេសរបស់កម្ពុជា ដែលជាហេតុជៀសផុតពីការជាន់គ្នានៃកម្មវិធីអភិវឌ្ឍន៍ រវាងសហភាពអឺរ៉ុប(EU) និងរាជរដ្ឋាភិបាលកម្ពុជា ។ EUបានសម្តែងការសប្បាយរីករាយ ដែលបានរួមចំណែកក្នុងការអនុវត្តយុទ្ធសាស្ត្រ និងរបៀបវារៈនៃការប្រែប្រួលអាកាសធាតុ ដោយសហការជាមួយក្រសួងបរិស្ថាន ។
លោកឯកអគ្គរដ្ឋទូតបានលើកឡើងថា សហភាពអឺរ៉ុប ក៏ធ្លាប់បានជួយដល់ដំណើរការបោះឆ្នោតនៅកម្ពុជានាឆ្នាំ២០១៧ ជួយដល់ប្រព័ន្ធរៀបចំការបោះឆ្នោតឃុំ សង្កាត់ ។ លោកប្តេជ្ញាបន្តកិច្ចសហប្រតិបត្តិការជាមួយកម្ពុជាឲ្យបានកាន់តែខ្លាំងថែមទៀត ។
លោកឧបនាយករដ្ឋមន្ត្រី ប្រាក់ សុខុន បានសម្តែងនូវការអបអរសាទរចំពោះការបំពេញការងារដែលបញ្ចប់ដោយជោគជ័យនៅកម្ពុជា ។ លោកបានលើកឡើងការងាររបស់លោកឯកអគ្គរដ្ឋទូតសហភាពអឺរ៉ុប ដែលបានខិតខំក្នុងកិច្ចសហប្រតិបត្តិការរវាងកម្ពុជានិងសហភាពអឺរ៉ុប ។
ជាការឆ្លើយតប ក្នុងនាមរាជរដ្ឋាភិបាលកម្ពុជា និងប្រជាជនកម្ពុជា លោកឧនាយករដ្ឋមន្ត្រី ប្រាក់ សុខុន បានថ្លែងអំណរគុណសហភាពអឺរ៉ុប ដែលបានគាំទ្រនិងផ្តល់ជំនួយដល់ការអភិវឌ្ឍសេដ្ឋកិច្ច និងសង្គម បានរួមចំណែកធំធេងក្នុងការកាត់បន្ថយភាពក្រីក្រ ការលើកកម្ពស់អភិបាលកិច្ច លើកកម្ពស់នីតិរដ្ឋ ការលើកកម្ពស់ប្រជាធិបតេយ្យនិងសិទ្ធិមនុស្សនៅកម្ពុជារយៈពេល២៥ឆ្នាំកន្លងមក ។
លោកឧបនាយករដ្ឋមន្ត្រីបន្តថា ក្រសួងការបរទេសក៏ដូចជារូបលោកផ្ទាល់ បានត្រៀមសហការជាមួយឯកអគ្គរដ្ឋទូតថ្មីតំណាងសហភាពអឺរ៉ុប ដែលនឹងបំពេញការងារបន្តនៅប្រទេសកម្ពុជា ។ ជាការពិត ទំនាក់ទំនងពាណិជ្ជកម្មរវាងកម្ពុជានិងសហភាពអឺរ៉ុ បានផ្តល់ផលទាំងសងខាង ។
លោកឧបនាយករដ្ឋមន្ត្រីអះអាងថា «ចំពោះបញ្ហាEBAវិញ រាជរដ្ឋាភិបាលនឹងបន្តអនុវត្តការងារតាមសេចក្តីប្រកាសរបស់ខ្លួន»ដដែល ។ លោកឧបនាយករដ្ឋមន្ត្រី គ្រោងជួបជាមួយប្រតិភូEU ដែលនឹងមកបំពេញការងារទាក់ទងនឹងបញ្ហាEBAនៅកម្ពុជា ពីថ្ងៃទី១៩ដល់ទី២០ ខែមីនា ខាងមុខ ៕
ចែករំលែកព័តមាននេះ