ខេត្តកំពង់ឆ្នាំង ៖ រដ្ឋមន្ត្រីក្រសួងទេសចរណ៍បានថ្លែងនូវការអះអាងថា ការរៀបចំពិធីបុណ្យទន្លេលើកទី៥ នៅខេត្តកំពង់ឆ្នាំងនេះ គឺជាឱកាសមួយសម្រាប់ឱ្យទីក្រុងកំពង់ឆ្នាំង បំផុសចលនាទាំងឡាយ ដែលអាចឈានទៅដល់ការដណ្ដើមជ័យលាភី «ទីក្រុងទេសចរណ៍ស្អាតអាស៊ាន» លើកទី២…
ខេត្តកំពង់ឆ្នាំង ៖ រដ្ឋមន្ត្រីក្រសួងទេសចរណ៍បានថ្លែងនូវការអះអាងថា ការរៀបចំពិធីបុណ្យទន្លេលើកទី៥ នៅខេត្តកំពង់ឆ្នាំងនេះ គឺជាឱកាសមួយសម្រាប់ឱ្យទីក្រុងកំពង់ឆ្នាំង បំផុសចលនាទាំងឡាយ ដែលអាចឈានទៅដល់ការដណ្ដើមជ័យលាភី «ទីក្រុងទេសចរណ៍ស្អាតអាស៊ាន» លើកទី២ និងជួយកិត្យានុភាពជាតិលើឆាកអន្តរជាតិបន្ថែមទៀត។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងអះអាងដូច្នេះក្នុងឱកាសដែលលោកចូលរួមក្នុងសិក្ខាសាលាអបអរសាទរពិធីបុណ្យទន្លេលើកទី៥ ក្រោមប្រធានបទ «ទន្លេផ្សារភ្ជាប់៖ សន្តិភាព ប្រជាជន និងទេសចរណ៍» អមជាមួយពិធីចែកប័ណ្ណសរសើរដល់អាជីវកម្មដែលស្នាដៃក្នុងវិស័យទេសចរណ៍ នៅខេត្តកំពង់ឆ្នាំង នាថ្ងៃទី១៤ ខែមីនា ឆ្នាំ២០១៩នេះ ។
លោក ថោង ខុន បានរម្លឹកថា ក្រុងសៀមរាប និងក្រុងបាត់ដំបង បានជាប់ជ័យលាភីទីក្រុងទេសចរណ៍ស្អាតអាស៊ាន កាលពីលើកទី១រួចហើយ ប៉ុន្តែជ័យលាភីនេះមានសុពលភាពតែ៣ឆ្នាំ ទេ ហើយឥឡូវនេះ រាជរដ្ឋាភិបាលកម្ពុជាបានសម្រេចដាក់ទីក្រុងចំនួន៤ និងខណ្ឌចំនួន១ទៀត ដាក់ជាបេក្ខភាពចូលប្រកួតទីក្រុងស្អាតអាស៊ាននៅឆ្នាំ២០២០ខាងមុខ ក្នុងនោះរួមមាន ក្រុងកំពង់ចាម ក្រុងតាខ្មៅ ខណ្ឌដូនពេញ ក្រុងពោធិ៍សាត់ និងក្រុងកំពង់ឆ្នាំងផងដែរ។
លោករដ្ឋមន្ត្រីបានបញ្ជាក់ថា ការដែលខេត្តកំពង់ឆ្នាំងទទួលរៀបចំបុណ្យទន្លេនេះ ប្រៀបដូចជា រៀបចំខ្លួនសម្រាប់ត្រៀមដណ្ដើមយកជ័យលាភី «ទីក្រុងទេសចរណ៍ស្អាតអាស៊ាន» ដែរ។ លោកថ្លែងនូវការកោតសរសើរផងដែរចំពោះទីក្រុងកំពង់ឆ្នាំងថា ជាទីក្រុងស្អាត មានរចនាសម្ព័ន្ធល្អ មានវប្បធម៌ប្រវត្តិសាស្ត្រមួយដ៏ល្អ ពិសេសក៏មានអគារនៅសល់ពីសម័យអាណានិគមបារាំង មានដើមឈើធំៗត្រឈឹងត្រឈៃ ថ្វីដ្បិតតែទីក្រុងនេះរាងតូចបន្តិចក៏ដោយ។
ប៉ុន្តែលោករដ្ឋមន្ត្រីក៏បានផ្តល់នូវអនុសាសន៍មួយចំនួនសម្រាប់ត្រៀមដណ្ដើមជ័យលាភីទីក្រុងទេសចរណ៍ស្អាតអាស៊ានលើកទី២ ដែលរួមមាន ៖ គណៈកម្មការអភិវឌ្ឍទេសចរណ៍ខេត្តកំពង់ឆ្នាំង មន្ទីរទេសចរណ៍ខេត្តកំពង់ឆ្នាំង ពិសេសការីទេសចរណ៍ក្នុងស្រុក ចាប់ដៃសហការបង្កើត និងចងក្រងជាខ្សែទស្សនកិច្ចក្នុងស្រុក សម្រាប់ខេត្តកំពង់ឆ្នាំង និងជាមួយខេត្តជុំវិញឱ្យកាន់តែសម្បូរបែប សំខាន់ត្រូវរួមគ្នាអភិវឌ្ឍទីក្រុងទេសចរណ៍តាមដងទន្លេ។
ទន្ទឹមនោះត្រូវខិតខំបង្កើន លទ្ធភាពផ្គត់ផ្គង់សេវាកម្មទេសចរណ៍ឱ្យបានកាន់តែសម្បូរបែបថែមទៀត ដើម្បីឆ្លើយតបនឹង តម្រូវការរបស់ភ្ញៀវទេសចរ។ ត្រូវពង្រឹងគុណភាពសេវាកម្ម ទេសចរណ៍ អាជីវកម្មទេស
ចរណ៍ទាំងអស់ ត្រូវយកចិត្តទុកដាក់ផងដែរចំពោះគុណភាព សេវាកម្មរបស់ខ្លួន។
លោកបន្តថា ចំពោះសេវាកម្មត្រូវតែល្អស្ថិតក្នុងកម្រិតស្តង់ដា និងប្រកបដោយទំនុកចិត្តសម្រាប់ ភ្ញៀវទេសចរ ស្របតាមយុទ្ធនាការ «សេវាមួយ ស្តង់ដាមួយ ។ ដោយឡែកម្ចាស់អាជីវកម្ម ទេសចរណ៍ទាំងអស់ កុំគិតតែការពង្រឹងគុណភាពសេវាកម្ម ពេលដែលមានព្រឹត្តិការណ៍ទេសចរណ៍ ឬពិធីបុណ្យជាតិ ផ្សេងៗ គឺត្រូវធ្វើជាប្រចាំ ដើម្បីធានានូវសេវាកម្មមួយ ប្រកបដោយ ទំនុកចិត្តដល់ភ្ញៀវទេសចរ ស្របទៅតាមកម្រិតស្ដង់ដាថ្នាក់ជាតិ និងអាស៊ាន។ ទន្ទឹមនោះ ត្រូវបន្តរួមគ្នាពង្រឹងជំនាញ វិជ្ជាជីវៈទេសចរណ៍ ស្របតាមយុទ្ធនាការ «បុគ្គលិកម្នាក់ ជំនាញមួយ ។
គួរបញ្ជាក់ថា រាជរដ្ឋាភិបាលកម្ពុជាបានសម្រេចដាក់ទីក្រុងបេក្ខភាពចំនួន៦ ចូលរួមក្នុងការ ប្រកួតដណ្ដើមជ័យលាភី «ទីក្រុងទេសចរណ៍ស្អាតអាស៊ាន» លើកទី២ ក្នុងនោះរួមមាន ក្រុងកំពង់ចាម ក្រុងពោធិ៍សាត់ ក្រុងកំពង់ឆ្នាំង ក្រុងតាខ្មៅ ក្រុងកំពត និងខណ្ឌដូនពេញ។ ជ័យលាភីទីក្រុងទេសចរណ៍ស្អាតអាស៊ានលើកទី២នេះ គ្រោងនឹងប្រកាសនៅក្នុងឱកាសវេទិកាទេសចរណ៍អាស៊ាន (ATF) នៅដើមខែមករា ឆ្នាំ២០២០ នៅប្រទេសប្រ៊ុយណេដារូសាឡឹម៕
ចែករំលែកព័តមាននេះ