មន្ត្រីបរិស្ថានទប់ស្កាត់ការកាប់ទន្ទ្រានដីនៅព្រះសីហនុរាម ស្រុកព្រៃនប់

ថ្ងៃទី ១៥ ខែ មីនា ឆ្នាំ ២០១៩
ម៉ោង ១៦:១៥
សុខ សារ៉ាយ

ខេត្តព្រះសីហនុ ៖ មន្ត្រីឧទ្យានុរក្សនៃឧទ្យានជាតិព្រះសីហនុរាមនៃមន្ទីរបរិស្ថានខេត្ត កាលពីថ្ងៃទី១៣ ខែមីនាកន្លងទៅ បានចុះទប់ស្កាត់សកម្មភាពប៉ុនប៉ងកាប់រុករានទន្ទ្រានកាន់កាប់ដីរដ្ឋដោយខុសច្បាប់ក្នុងតំបន់ហាមឃាត់ ស្ថិតនៅ ចំណុចតាបិន ភូមិស្មាច់ដែង ឃុំរាម ស្រុកព្រៃនប់ ក្នុងតំបន់អភិរក្សនៃឧទ្យានជាតិព្រះសីហនុរាម ។ ប្រតិបត្តិការនេះ ធ្វើឡើងបន្ទាប់ពីមេខ្យល់ ឈ្មោះ ហេង ស៊ីថា ភេទប្រុស រស់នៅភូមិស្មាច់ដែង ឃុំរាម ស្រុកព្រៃនប់ បាននិងកំពុងដឹកនាំកម្មករចំនួន១០នាក់ចូលទៅក្នុងតំបន់ហាមឃាត់ ក្នុងបំណងកាប់រុករានទន្ទ្រានកាន់កាប់ដីនៅតំបន់នោះ ។

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានថ្លែងថា ក្រុមការងារបានណែនាំអ្នកទាំងនោះ ឱ្យចាកចេញពីតំបន់ហាមឃាត់ និងមិនអនុញ្ញាតឱ្យចូលក្នុងតំបន់ហាមឃាត់នេះទៀតឡើយ ហើយប្រសិនបើបំពាននឹងបម្រាមនេះ មន្ត្រីមានសមត្ថកិច្ចនឹងចាត់ វិធានការតាមផ្លូវច្បាប់ ។ ប៉ុន្តែក្រោយពីស្តាប់ការអប់រំណែនាំ អ្នកដែលប៉ុនប៉ងកាប់ឆ្ការរុករានកាន់កាប់ដីរដ្ឋដោយខុសច្បាប់នេះ បានចាកចេញពីតំបន់ហាមឃាត់អស់ហើយនៅល្ងាចថ្ងៃដដែល ។

លោក នេត្រ ភក្ត្រា ថ្លែងថា ការទន្ទ្រាន រុករានកាន់កាប់ដីដោយខុសច្បាប់របស់បងប្អូនប្រជាពលរដ្ឋខ្លះ ធ្វើឡើងក្រោមការបំផុសពីឈ្មួញរកស៊ីដីធ្លី ដែលពួកគេញុះញង់ឱ្យប្រជាពលរដ្ឋនៅមូលដ្ឋានរំលោភបំពានច្បាប់ និងបំផ្លាញធនធានធម្មជាតិតាមច្រើនរូបភាពដូចជា ការដាំចេក ស្វាយ ខ្នុរ អាកាស្យា ជាដើម ដើម្បីបន្លំថាជាដីនិងដំណាំដែលខ្លួនបានកាន់កាប់ និងអាស្រ័យផលជាកម្មសិទ្ធិ ឬខ្លួនបានគ្រប់គ្រងជាយូរមកហើយ ។

លោករដ្ឋលេខាធិការបញ្ជាក់ថា ល្បិចកលក្នុងការបំផ្លាញធនធានធម្មជាតិខ្លះដែលជនខិល ខូចខ្លះបានធ្វើក្នុងការទន្ទ្រានកាន់កាប់ដីព្រៃខុសច្បាប់នោះ គឺដូចជាការបោះព្រំដី ការត្រាយព្រៃតូចៗឱ្យងាប់ រួចដុតសម្អាតសម្រាប់ដាំដំណាំតាមរដូវដូចជា ពោត ដំឡូង សណ្តែក បន្លែ ។ល។ ក្នុងរូបភាពអាស្រ័យផល និងឈានទៅដាក់ស្នើសុំការវាស់វែង ផ្តល់កម្មសិទ្ធិជូនពួកគាត់ទៅអាជ្ញាធរដែនដី ស្ថាប័នជំនាញពាក់ព័ន្ធ ជាពិសេសស្នើទៅរាជរដ្ឋាភិបាលជាបន្តបន្ទាប់ ។

លោករដ្ឋលេខាធិការបន្តថា កន្លងមក ក្នុងករណីមានការបង្ក្រាបឬបដិសេធការផ្តល់កម្មសិទ្ធិ ក្រុមឈ្មួញបានញុះញង់ឱ្យមានការតវ៉ា និងពេលខ្លះឡើងមកតវ៉ានៅរាជធានីភ្នំពេញ ហើយត្រូវបានបំពងសំឡេងដោយក្រុមអង្គការសង្គមស៊ីវិលធ្វើការផ្នែកសិទ្ធិមនុស្សមួយចំនួនថា ជាការរំលោភបំពានលើសិទ្ធិមនុស្ស និងសិទ្ធិលំនៅ ឋានជាដើម។ ប៉ុន្តែតាមពិត នេះគឺជាការរំលោភច្បាប់យ៉ាងច្បាស់។

លោក នេត្រ ភក្ត្រា បានគូសបញ្ជាក់ថា ជាទូទៅនៅតាមតំបន់ការពារធម្មជាតិនីមួយៗ មន្ត្រី ឧទ្យានុរក្សមិនមានការរឹតបន្តឹង ឬហាមឃាត់ដល់បងប្អូនប្រជាពលរដ្ឋដែលរស់នៅជុំវិញតំបន់ការពារធម្មជាតិ ដែលប្រកបរបរចិញ្ចឹមជីវិត អាស្រ័យលើការប្រមូលអនុផលព្រៃឈើ មានដូចជា រកផ្តៅ វល្លិ ឫស្សី បន្លែ ផ្លែឈើ ឬអុសសម្រាប់ដុតប្រចាំថ្ងៃនោះទេ ។ ផ្ទុយទៅវិញរាជរដ្ឋាភិបាលកម្ពុជា ក៏ដូចជាក្រសួងបរិស្ថាន បានគិតគូរនិងយកចិត្តទុកដាក់បំផុតចំពោះជីវភាពបងប្អូនប្រជាពលរដ្ឋដែលរស់នៅក្នុងតំបន់ការពារធម្មជាតិនានា តាមរយៈការជួយបង្កើតមុខរបរ បង្កើតប្រភពចំណូល បង្កើនចំណូលសម្រាប់អភិវឌ្ឍជីវភាពគ្រួសារបងប្អូន ។

យ៉ាងណាក៏ដោយ លោករដ្ឋលេខាធិការបានអះអាងថា ការយកពលរដ្ឋមកធ្វើជាលេសដើម្បីទន្ទ្រានកាន់កាប់ដីរដ្ឋជារឿងខុសច្បាប់ និងមិនត្រូវបានអត់ឱនឱ្យឡើយ ។ លោកក៏បានអំពាវនាវដល់ប្រជាពលរដ្ឋទាំងអស់ ចូលរួមក្នុងការការពារ និងអភិរក្សធនធានធម្មជាតិដែលប្រទេសកម្ពុជាមាន ដើម្បីទុកសម្រាប់មនុស្សរាប់ជំនាន់ទៅមុខទៀត។ ប៉ុន្តែប្រសិនបើប្រជាពលរដ្ឋណាខ្វះដីពិតប្រាកដ សូមដាក់សំណើសុំដីសម្បទានសង្គមកិច្ចពីអាជ្ញាធរ ដើម្បីដោះស្រាយ ៕