ខេត្តព្រៃវែង ៖ កសិករជាច្រើនគ្រួសារនៅភូមិតាំងស្នាយ ឃុំរកា ស្រុកពារាំង ខេត្តព្រៃវែង កំពុងតែស្រស់ស្រាក់សស្រាំក្នុងការប្រកបរបរកសិកម្មឡើងវិញបន្ទាប់ពីទឹកស្រក ដោយអ្នកខ្លះធ្វើស្រែ ហើយអ្នកខ្លះទៀតដាំឈូក។ កសិករទាំងនោះបានរៀបរាប់ថា…
ខេត្តព្រៃវែង ៖ កសិករជាច្រើនគ្រួសារនៅភូមិតាំងស្នាយ ឃុំរកា ស្រុកពារាំង ខេត្តព្រៃវែង កំពុងតែស្រស់ស្រាក់សស្រាំក្នុងការប្រកបរបរកសិកម្មឡើងវិញបន្ទាប់ពីទឹកស្រក ដោយអ្នកខ្លះធ្វើស្រែ ហើយអ្នកខ្លះទៀតដាំឈូក។
កសិករទាំងនោះបានរៀបរាប់ថា ជារៀងរាល់ឆ្នាំបន្ទាប់ពីទឹកស្រកវិញ គឺធ្វើស្រែបានផលល្អហើយមិនសូវចំណាយលុយច្រើនទិញជីនោះទេ ព្រោះថាពេលទឹកជន់ឡើង ដូចនាំជីមកដាក់ស្រែអញ្ចឹង មិនថាដាំអ្វីក៏ទទួលបានផលច្រើនដែរ។
កសិករនៅភូមិតាំងស្នាយបានបញ្ជាក់ថា ពួកគាត់ភាគច្រើនប្រកបមុខរបរពីរ គឺធ្វើស្រែ៦ខែ ហើយ៦ខែទៀតពួកគាត់ដាំឈូក។ ចំពោះការដាំឈូក ត្រូវចំណាយដើមទន់ច្រើនជាងធ្វើស្រែ តែឈូកមានតម្លៃថ្លៃជាងស្រូវ រីឯការធ្វើស្រែវិញចំណាយដើមទន់តិចជាងឈូកក៏ពិតមែន តែតម្លៃស្រូវថោក ហើយជីថ្លៃ បើសិនជាជីថោកវិញពួក គាត់ធ្វើស្រែ មិនដឹងជាសប្បាយចិត្តយ៉ាងណាទេ។
ប្រជាកសិករនៅឃុំរកា ស្រុកពារាំង បានលើក ឡើងថា ប្រសិនបើមានរោងចក្រផលិតជីក្នុងស្រុកច្រើន ប្រហែលជាតម្លៃជីថោកជាងជីដែលនាំចូលពីប្រទេសជិតខាង ដូច្នេះពួកគាត់សង្ឃឹមថា ថ្ងៃ ក្រោយ នឹងមានរោងចក្រផលិតជីក្នុងស្រុកច្រើន ដែលអាចជួយដល់កសិករ មានលទ្ធភាពខាងក្នុងការធ្វើស្រែចំការ ទទួលបានផលចំណេញជាងសព្វថ្ងៃនេះ។
គួរបញ្ជាក់ផងដែរថានៅក្នុងស្រុកពារាំងមានតំបន់ខ្លះត្រូវទឹកជំនន់ជន់លិច បណ្ដាលឲ្យផលដំណាំស្រែចំការប្រជាកសិករ រងការខូចខាតរាប់រយហិចតា តែស្របពេលជាមួយគ្នានោះក៏មានតំបន់ខ្លះ មិនត្រូវបានទឹកជន់លិច និងតំបន់ខ្លះមានទឹកចូលបន្តិចបន្តួច ធ្វើអោយដំណាំស្រូវទទួលបានផលល្អជាងឆ្នាំមុនៗ ដោយកន្លែងខ្លះស្រូវកំពុងតែលូត លាស់ល្អ និងកន្លែងខ្លះទៀតក៏ត្រៀមច្រូតកាត់ប្រមូលផលផងដែរ ៕
ចែករំលែកព័តមាននេះ