អភិបាលខេត្តព្រៃវែង ណែនាំឲ្យអភិបាលស្រុក តែងតាំងថ្មី ត្រូវខិតខំអភិវឌ្ឍន៍មូលដ្ឋានរបស់ខ្លួនឲ្យកាន់តែរីកចម្រើន
ខេត្តព្រៃវែង ៖ នៅថ្ងៃទី១៣ មករា ២០២៦នេះ រដ្ឋបាលខេត្តព្រៃវែង បានធ្វើការផ្លាស់ប្ដូរអភិបាលស្រុក ចំនួន២រូប ដោយលោក វ៉ា…
ខេត្តព្រៃវែង ៖ នៅថ្ងៃទី១៣ មករា ២០២៦នេះ រដ្ឋបាលខេត្តព្រៃវែង បានធ្វើការផ្លាស់ប្ដូរអភិបាលស្រុក ចំនួន២រូប ដោយលោក វ៉ា ធីម អភិបាលស្រុកពាមជរ ត្រូវបានផ្ទេរឱ្យទៅកាន់តំណែងជាអភិបាលស្រុកពោធិ៍រៀង និងលោក យស ស៊ីណាត អភិបាលស្រុកពោធ៍រៀង ត្រូវបានផ្ទេរឲ្យទៅកាន់ជាអភិបាលស្រុកពាមជរ ។
នៅក្នុងពិធីប្រកាសផ្លាស់ប្ដូរនេះ លោក សួន សុម៉ាលីន អភិបាលខេត្ត បានណែនាំលោកអភិបាលស្រុកទាំង២ ត្រូវខិតខំប្រឹងប្រែងបំពេញតួនាទី និងភារកិច្ចរបស់ខ្លួនឱ្យបានខ្ជាប់ខ្ជួន ដើម្បីបន្តដឹកនាំអភិវឌ្ឍន៍ស្រុក ដែលខ្លួនគ្រប់គ្រង អោយកាន់តែរីកចម្រើន និងកសាងសមិទ្ធផលថ្មីៗ អូនបានច្រើនថែមទៀត ។
លោកអភិបាលខេត្ត ក៏បានណែនាំដល់មន្ត្រីគ្រប់លំដាប់ថ្នាក់ ក្នុងស្រុកទាំងពីរនេះ ត្រូវពង្រឹងការគ្រប់គ្រងការងារសន្តិសុខ និង សណ្ដាប់ធ្នាប់សាធារណៈ ពិសេសត្រូវពង្រឹងការគ្រប់គ្រងសភាពការណ៍តាមមូលដ្ឋាន ដើម្បីដាក់ចេញ នូវវិធានការនានា សំដៅទប់ស្កាត់ឲ្យបានទាន់ពេលវេលា នូវរាល់សកម្មភាពប៉ុនប៉ងបង្កឲ្យមានភាពចលាចល វឹកវរ អសន្ដិសុខ ក្នុងសង្គម និងជំរុញបំផុសចលនាឲ្យមានការចូលរួមអនុវត្ត នូវគោលនយោបាយ “ភូមិ ឃុំ សង្កាត់ មានសុវត្ថិភាព” ទាំង៧ចំណុច របស់រាជរដ្ឋាភិបាល ឲ្យកាន់តែមានប្រសិទ្ធភាពថែមទៀត ។
អភិបាលខេត្តបានសង្កាត់ធ្ងន់ថា ការផ្ដល់សេវាសាធារណៈ និងការដោះស្រាយបញ្ហាប្រឈមនៅមូលដា្ឋន គឺជាកិច្ចការអាទិភាពចម្បង ក្នុងកម្មវិធីនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា ដែលចាំបាច់ត្រូវបន្តលើកកម្ពស់ទាំងគុណភាព និងប្រសិទ្ធភាព ៕
ចែករំលែកព័តមាននេះ