ខេត្តស្ទឹងត្រែង ៖ ដំណឹងដ៏សែនរំភើប និងមហាអស្ចារ្យបានលេចឮសុះសាយពេញផ្ទៃខេត្តស្ទឹងត្រែង គឺវត្តមានដ៏មហោឡារិករបស់សេនាឯកដ៏ស្មោះត្រង់ «នរៈសឹង្ហ» ដែលបានយាងមកគង់នៅយ៉ាងតម្កល់លើទីសក្ការៈបូជានៃបូជនីយដ្ឋាន ភ្នំព្រះធាតុ ដ៏មានបារមីស័ក្តិសិទ្ធិ ស្ថិតនៅកណ្ដាលក្រុងស្ទឹងត្រែង…
ខេត្តស្ទឹងត្រែង ៖ ដំណឹងដ៏សែនរំភើប និងមហាអស្ចារ្យបានលេចឮសុះសាយពេញផ្ទៃខេត្តស្ទឹងត្រែង គឺវត្តមានដ៏មហោឡារិករបស់សេនាឯកដ៏ស្មោះត្រង់ «នរៈសឹង្ហ» ដែលបានយាងមកគង់នៅយ៉ាងតម្កល់លើទីសក្ការៈបូជានៃបូជនីយដ្ឋាន ភ្នំព្រះធាតុ ដ៏មានបារមីស័ក្តិសិទ្ធិ ស្ថិតនៅកណ្ដាលក្រុងស្ទឹងត្រែង ។ នេះបើតាមផេកផ្លូវការលោកអភិបាលខេត្ត សរ សុពុត្រា នាថ្ងៃទី៣០ ខែតុលា ឆ្នាំ ២០២៥ ។
លោកសរ សុពុត្រា បានបញ្ជាក់ថា នរៈសឹង្ហ ជាតំណាងនៃភាពអង់អាចក្លាហាន ភាពស្មោះត្រង់ និងការថែរក្សាដ៏មាំមួន នឹងក្លាយជាគ្រឿងសក្ការៈបូជាថ្មីមួយទៀត ដ៏សំខាន់សម្រាប់ពង្រីកជំនឿ និងសេចក្តីស្ងប់សុខដល់ប្រជាពលរដ្ឋ ដំណាលគ្នានេះដែរទីសក្ការៈបូជាលើបូជនីយដ្ឋានភ្នំព្រះធាតុ ត្រូវបានរៀបចំកែលម្អយ៉ាងយកចិត្តទុកដាក់ ស្ទើរតែរួចរាល់ទាំងស្រុងទៅហើយ (សម្រេចបាន ៨៥%) ។
នេះ គឺជាការឆ្លើយតបទៅនឹងសេចក្តីប្រាថ្នារបស់ពុកម៉ែ បងប្អូនប្រជាពលរដ្ឋខេត្តស្ទឹងត្រែង និងភ្ញៀវទេសចរគ្រប់ទិសទី ដែលមានជំនឿជ្រះថ្លាមកលើទីដ៏ស័ក្តិសិទ្ធិនេះ តាំងពីយូរលង់ណាស់មកហើយ ។ ពីប្រាសាទបុរាណសម័យសតវត្សរ៍ទី៦ រហូតដល់បច្ចុប្បន្ន ភ្នំព្រះធាតុនៅតែជាបង្គោលស្នូលនៃជំនឿអរូបី ជំនឿព្រះពុទ្ធសាសនា និងជាកន្លែងសុំសេចក្ដីសុខ សុំលាភសក្ការៈ និងសុំសំណាងល្អ ។
ការកែលម្អថ្មីនេះ នឹងប្រែក្លាយភ្នំព្រះធាតុឲ្យក្លាយជាតំបន់ទេសចរណ៍វប្បធម៌ និងធម្មជាតិដ៏ទាក់ទាញបំផុតដែលមានបរិស្ថានស្អាតបាត ម្លប់ឈើត្រជាក់ត្រឈៃ ព្រមទាំងមានទេសភាពដ៏ស្រស់ស្អាតគយគន់ជុំវិញក្រុងស្ទឹងត្រែង និងទន្លេមេគង្គ ។
ពីពេលនេះទៅ សូមបងប្អូនប្រជាពលរដ្ឋ និងភ្ញៀវទេសចរជាតិ និងអន្តរជាតិ អញ្ជើញទៅទស្សនាការអភិវឌ្ឍថ្មីនេះ ពិសេសទៅគោរពបូជា និងបួងសួងសុំពរជ័យពីបារមីភ្នំព្រះធាតុ និងស្នាមជើង «នរៈសឹង្ហ» ដ៏ស័ក្តិសិទ្ធិ ដើម្បីទទួលបានសេចក្តីសុខ សុភមង្គល និងលាភសំណាងគ្រប់ប្រការ ៕
ចែករំលែកព័តមាននេះ