រដ្ឋធានីវ៉ាស៊ីនតោន ៖ ប្រភពពីរបានប្រាប់ដល់ភ្នាក់ងារសារព័ត៌មាន Reuters កាលពីថ្ងៃទី១៤ មីនា កន្លងមកថា សហរដ្ឋអាមេរិកមានគម្រោងកាត់បន្ថយការនាំចេញប្រេងឆៅអ៊ីរ៉ង់ប្រមាណ ២០% មកស្មើក្រោម១លានធុងក្នុងមួយថ្ងៃ ចាប់ពីខែឧសភា ទៅដោយតម្រូវឲ្យប្រទេសនាំចូលប្រេងកាត់បន្ថយការទិញដើម្បីចៀសវាងការដាក់ទណ្ឌកម្មពីសហរដ្ឋអាមេរិក ។
លោកប្រធានាធិបតី ដូណាល់ ត្រាំ (Donald Trump) របស់សហរដ្ឋអាមេរិកមានគោលដៅផ្អាកការនាំចេញប្រេងរបស់អ៊ីរ៉ង់និងបញ្ឈប់ប្រភពចំណូលធំជាងគេរបស់ប្រទេសនេះ។ សហរដ្ឋអាមេរិកកំពុងតែដាក់សម្ពាធលើអ៊ីរ៉ង់ឲ្យបោះបង់កម្មវិធីអាវុធនុយក្លេអ៊ែររបស់ខ្លួន និងបញ្ឈប់ការគាំទ្រក្រុមយោធាក្នុងមជ្ឈឹមបូព៌ា។
សហរដ្ឋអាមេរិកអាចនឹងអនុគ្រោះការដាក់ទណ្ឌកម្មសាជាថ្មីសម្រាប់ប្រទេសភាគច្រើនដែលទិញប្រេងឆៅអ៊ីរ៉ង់ដែលរួមមានអតិថិជនធំៗដូចជាប្រទេសចិន និងឥណ្ឌាជាដើមប៉ុន្តែពួកគេត្រូវសន្យាថានឹងកាត់បន្ថយការនាំចូលមកស្មើក្រោម ១លានធុងក្នុងមួយថ្ងៃ។
ប្រភពមួយបាននិយាយថា «គោលដៅបច្ចុប្បន្ននេះគឺកាត់បន្ថយការនាំចេញរបស់អ៊ីរ៉ង់មកស្មើក្រោម១លានធុងក្នុងមួយថ្ងៃ»។
គួរបញ្ជាក់ដែរថា កាលពីខែវិច្ឆិកា សហរដ្ឋអាមេរិកបានដាក់ទណ្ឌកម្មសេដ្ឋកិច្ចលើអ៊ីរ៉ង់សាជាថ្មី និងបានដកសហរដ្ឋអាមេរិកចេញពីកិច្ចព្រមព្រៀងអាវុធនុយក្លេអ៊ែរឆ្នាំ ២០១៥ រវាងអ៊ីរ៉ង់និងប្រទេសធំៗទាំង ៦។ ទណ្ឌកម្មសេដ្ឋកិច្ចទាំងនោះបានកាត់បន្ថយការនាំចេញប្រេងអ៊ីរ៉ង់ប្រមាណពាក់កណ្តាលមកហលយ។
ដើម្បីផ្តល់ពេលវេលាគ្រប់គ្រាន់ដល់អ្នកនាំចូលឲ្យស្វែងរកអ្នកផ្គត់ផ្គង់ថ្មី និងចៀសវាងកំណើនតម្លៃប្រេង សហរដ្ឋអាមេរិកបានអនុគ្រោះដល់អ្នកនាំចូលមួយចំនួនឲ្យបន្តទិញប្រេងអ៊ីរ៉ង់ប៉ុន្តែពួកគេត្រូវសន្យាថានឹងទិញក្នុងចំនួនតិចជាងមុននាពេលអនាគត ។
លោក Brian Hook ដែលជាអ្នកតំណាងពិសេសរបស់ក្រសួងការបរទេសសហរដ្ឋអាមេរិកប្រចាំអ៊ីរ៉ង់បាននិយាយកាលពីថ្ងៃពុធមកថា សហរដ្ឋអាមេរិកកំពុងតែអនុវត្តគម្រោងកាត់បន្ថយការនាំចេញប្រេងអ៊ីរ៉ង់ដល់កម្រិតសូន្យ ។
លោកបានបន្ថែមថា លោកប្រធានាធិបតីត្រាំបាននិយាយច្បាស់ហើយថាពួកយើងមានយុទ្ធនាគារដាក់សម្ពាធសេដ្ឋកិច្ច ប៉ុន្តែលោកក៏មិនចង់ឲ្យតម្លៃប្រេងកើនឡើងខ្លាំងពេកដែក ៕
ចែករំលែកព័តមាននេះ