ឡុង ណងសាវ ចំណាយពេលត្រឹម1ទឹក ផ្ដួលគូប្រកួតយកបានកៅអី16នាក់
- ភ្នំពេញ
រាជធានីភ្នំពេញ ៖ ស្ទើរមិនគួរឲ្យជឿនៅលើសង្វៀនទូរទស្សន៍ប៉ុស្តិ៍៥ កាលពីល្ងាចថ្ងៃសៅរ៍ ទី៩ មីនា កន្លងមកនេះ កីឡាករ ឡុង ណងសាវមកពីក្លិបសាលវ័ន្តកីឡា…
រាជធានីភ្នំពេញ ៖ ស្ទើរមិនគួរឲ្យជឿនៅលើសង្វៀនទូរទស្សន៍ប៉ុស្តិ៍៥ កាលពីល្ងាចថ្ងៃសៅរ៍ ទី៩ មីនា កន្លងមកនេះ កីឡាករ ឡុង ណងសាវមកពីក្លិបសាលវ័ន្តកីឡា ដែលមានតួលេខប្រកួតតិចមែនទែនបែរជាអាចផ្ដួលគូប្រកួតឱ្យសន្លប់ស្តូកស្តឹងត្រឹម១ទឹកយ៉ាងផុយយកបានកៅអី១៦នាក់ ក្នុងព្រឹត្តិការណ៍ដែល
មានឈ្មោះថាកំពូលជើងឯក TV5 BOXING KNOCK OUT SERIES (K-Cement)
ក្នុងប្រភេទទម្ងន់៥៤គីឡូក្រាមសម្រាប់រដូវកាលទី៥។
ឡុង ណងសាវ ត្រូវប៉ះជាមួយកីឡាករប្រាក់ សុីណាត មកពីក្លិបតាឯកដំបងដែកមានរិទ្ឋ ខេត្តព្រៃវែង ។ បើមើលទៅលើប្រវត្តិឡុង ណង សាវ ប្រកួតបានត្រឹមតែ៩ដងប៉ុណ្ណោះ ខណៈប្រាក់ សុីណាត ប្រកួតបាន៥៤ដងឯណោះ។គ្រាន់តែការប្រកួតចាប់ផ្តើមភ្លាម អ្នកទស្សនា១០០ទាំង១០០ទាយថា ឡុង ណងសាវ ចាញ់បើក្រឡេកមើលបទពិសោធន៍ប្រកួត ។ ប៉ុន្តែផ្ទុយពីការគិតទុក ឡុង ណងសាវ បែរជាខំប្រើស្នៀតគុនល្អៗរហូតចំគោលដៅបង្កឱ្យសុីណាតចុកឆ្អល់ដេកដួលនៅលើរេញ ។ ការចាញ់នេះបានធ្វើឱ្យគេស្រឡាំងកាំងនិងស្តាយគ្រប់គ្នានូវការបាត់ឱកាសរបស់សុីណាត ។ យ៉ាងណាក៏ដោយ ណងសាវបានតាំងចិត្តពេលឈ្នះថា ខ្លួននឹងព្យាយាមខិតខំហាត់និងស្តាប់តាមគ្រូបង្វឹកធ្វើយ៉ាងណាឱ្យកាន់តែល្អនៅពេលខាងមុខ។
គួរបញ្ជាក់ផងដែរថា ព្រឹត្តិការណ៍នេះ ទើបបើកការប្រកួតផ្លូវការកាលពីសប្ដាហ៍មុនប៉ុណ្ណោះ ដោយមានកីឡាករ៣២រូបក្នុងប្រភេទទម្ងន់៤៥គីឡូក្រាម ។ កីឡាករទាំង៣២រូប ដែលត្រូវបានប្រកាសឱ្យឡើងប្រកួតនៅក្នុងរដូវកាលថ្មីនេះមិនត្រូវបានប្រកាសឱ្យបង្ហាញខ្លួននៅថ្ងៃបើកការប្រកួត និងធ្វើសន្និសីទបង្ហាញកាលពីថ្ងៃទី២ មីនា នៅប៉ុស្ដិ៍លេខ៥ព្រែកកំពិសនោះទេ ដោយបង្ហាញតែតំណាង៤រូបដែលមានឈ្មោះជម្រុះគ្នាក្នុងសប្ដាហ៍ដំបូងប៉ុណ្ណោះ ។ អ្នកគាំទ្រជាច្រើនបានសម្ដែងការអបអរដោយសារតែសមាសភាពរបស់កីឡាករក្នុងប្រភេទទម្ងន់៥៤គីឡូក្រាម គឺភាគច្រើនជាកីឡាករថ្មីៗ ដែលមានកម្លាំងចិត្តប្រកួតច្រើនជាងបទពិសោធន៍ ហើយច្រើនប្រកួតល្អមើលបើធៀបនឹងកីឡាករល្អៗដែលមានឈ្មោះស្រាប់ ដែលភាគច្រើនរយាលកម្លាំងដៃទៅវិញនោះ ។ ក្នុងនោះ កីឡាករក្នុងប្រភេទទម្ងន់៥៤គីឡូក្រាម ក៏មានចំនួនគ្រប់គ្រាន់ងាយនឹងប្រមូលបានដល់៣២រូប ដើម្បីបើកការប្រកួតក្នុងរូបមន្ត៣២នាក់ប្រកួតចាញ់ធ្លាក់។
លោក សេង កដិកា អ្នករៀបចំការប្រកួត បានថ្លែងបញ្ជាក់ថា ការប្រកួតរដូវកាលនេះ លោកសម្រេចចិត្តយកសមាសភាពស្ថិតក្នុងប្រភេទស្រាលវិញម្ដង ដោយលោកយល់ថាការប្រកួតជម្រើសជើងឯកចេញពីកីឡាករទម្ងន់ស្រាល គឺងាយរកបានកីឡាករថ្មីៗល្អៗ ហើយអាចបណ្ដុះឱ្យក្លាយជាកីឡាករស្នូលសម្រាប់វិស័យប្រដាល់ ។ លោកថា ការប្រកួតចាប់ពីទម្ងន់៦០គីឡូឡើងច្រើនតែត្រូវសម្រាប់កីឡាករដែលមានកេរ្តិ៍ឈ្មោះបោះសំឡេងរួចហើយ ហើយដំណើរស្វែងរកអ្នកស្ថិតក្នុងប្រភេទទម្ងន់ធ្ងន់បែបហ្នឹងក៏ពិបាករកផងដែរសម្រាប់៣២រូប ដោយសារតែស្ថិតក្នុងប្រភេទទម្ងន់នេះគឺស្ទើរមាននិងស្ទើរមិនមាន ដែលពិបាកឱ្យគណៈកម្មការធ្វើការជ្រើសរើស ។ ជាក់ស្ដែងវត្តមានកីឡាករកាលពីរដូវកាលមុនៗ ដែលស្ថិតក្នុងប្រភេទទម្ងន់៦៥ និង៦៣,៥គីឡូក្រាម លោកថាប៉ុស្ដិ៍លេខ៥ស្វែងរកបាន៣២រូបយ៉ាងលំបាកបំផុត ដោយមានកីឡាករខ្លះត្រូវបង្ខំឱ្យសម្រកទម្ងន់ និងខ្លះឱ្យឡើងទម្ងន់ដើម្បីឱ្យគ្រប់៣២រូបនោះ ។ លោកអះអាងថា ខ្លួនមិនចង់បានសមាសភាពដែលខ្វះតុល្យភាពបែបហ្នឹងនោះទេ ទើបសម្រេចចិត្តបើកការប្រកួតក្នុងប្រភេទទម្ងន់៥៧គីឡូក្រាមកាលពីរដូវកាលទី៤ និងសម្រាំងយកក្នុងប្រភេទទម្ងន់៥៤គីឡូក្រាមដែលជាប្រភេទស្រាលទៀតនៅក្នុងរដូវកាលនេះ។ លោកនិយាយថា៖«យើងចំណាយលុយជ្រើសរើសជើងឯក អ៊ីចឹងអត់ចង់យកកីឡាករដែលមានឈ្មោះហើយមកប្រកួតដណ្ដើមពានទេទើបយើងសម្រេចចិត្តធ្វើការប្រកួតក្នុងប្រភេទ
ទម្ងន់៥៤គីឡូក្រាមវិញ ។ យើងធ្វើអ៊ីចឹងដូចជួយបណ្ដុះពួកក្មេងៗអស់ហ្នឹងឱ្យមានមុខនៅក្នុងវិស័យកីឡាផង»។ យ៉ាងណាមិញ លោកថាកីឡាករទាំងអស់មិនបានបង្ហាញខ្លួនទាំង៣២រូបក្នុងថ្ងៃប្រកាសវគ្គថ្មីនោះទេ ដោយមានតែប៉ុន្មានរូបប៉ុណ្ណោះ ធ្វើការបង្ហាញខ្លួន ។ ក្នុងចំណោមកីឡាករថ្មីៗ ក៏មានកីឡាករដែលមានកេរ្តិ៍ឈ្មោះបោះសំឡេងមួយចំនួនក្នុងវិស័យប្រដាល់ស្រាប់ចូលប្រកួតផងដែរ ដោយគ្រាន់តែលោករំពឹងថាសមាសភាពកីឡាករថ្មីៗគឺជាទិសដៅដែលប៉ុស្ដិ៍លេខ៥គិតថាប្រឹងប្រកួតល្អជាងបើធៀបនឹងកីឡាករចាស់ៗ។ លោកឧត្តមសេនីយ៍ទោ សិន សុផាត តំណាងស្ថានីយទូរទស្សន៍ប៉ុស្ដិ៍លេខ៥ ក៏ធ្លាប់លើកឡើងដែរថា សម្រាប់រដូវកាលទី៥នេះ សមាសភាពកីឡាករថ្មីៗក្រុមការងារប៉ុស្ដិ៍លេខ៥ និងសហព័ន្ធប្រដាល់ បានជ្រើសចេញពីបណ្ដាក្លិបនៅទូទាំងប្រទេសតែម្ដង ដោយក្នុងចំណោមកីឡាករដែលជ្រើសបានទាំង៣២រូប គឺភាគច្រើនជាសមាសភាពកីឡាករជើងថ្មី។ យ៉ាងណាមិញលោកថា កីឡាករជើងចាស់មិនអាចមើលស្រាលកីឡាករថ្មីៗនោះទេ ដោយសារតែការប្រកួតកាលពីរដូវកាលមុន កីឡាករជើងថ្មីសុទ្ធតែបានគ្រងតំណែងលេខ១ និងលេខ២ជាដើម ខណៈដែលកីឡាករចាស់ៗត្រូវគេទម្លាក់ចេញឱ្យហាលអាវគ្មានសល់រួចបាត់ទៅហើយ៕
ចែករំលែកព័តមាននេះ