ខេត្តរតនគិរី ៖ ស្រុកចំនួន៣ដែលស្ថិតនៅតាមបណ្តោយដងទន្លេសេសានកំពុងប្រឈមទៅនឹងភាពជន់លិច ក្រោយពីប្រទេសវៀតណាមបានបើកទ្វារទំនប់ទឹក ក្នុងនោះមានដូចជាស្រុកអណ្តូងមាស ស្រុកតាវែង ស្រុកវ៉ឺនសៃ ។ ចំណែកស្រុកលំផាត់វិញ ក៍ត្រូវបានទឹកទន្លេស្រែពកជន់លិចគ្របដណ្តប់ស្ទើរទាំងស្រុង ខណៈប្រជាជនជាច្រើនគ្រួសារ
ខេត្តរតនគិរី ៖ ស្រុកចំនួន៣ដែលស្ថិតនៅតាមបណ្តោយដងទន្លេសេសានកំពុងប្រឈមទៅនឹងភាពជន់លិច ក្រោយពីប្រទេសវៀតណាមបានបើកទ្វារទំនប់ទឹក ក្នុងនោះមានដូចជាស្រុកអណ្តូងមាស ស្រុកតាវែង ស្រុកវ៉ឺនសៃ ។
ចំណែកស្រុកលំផាត់វិញ ក៍ត្រូវបានទឹកទន្លេស្រែពកជន់លិចគ្របដណ្តប់ស្ទើរទាំងស្រុង ខណៈប្រជាជនជាច្រើនគ្រួសារ និងសត្វចិញ្ចឹមគ្រប់ប្រភេទបាននិងកំពុងភៀសខ្លួនទៅកាន់ទីទួលសុវត្ថិភាព ។ ភ្លៀងបានចាប់ផ្តើមធ្លាក់តាំងពីដើមសប្តាហ៍មុន រហូតដល់រសៀលថ្ងៃទី១៩ កញ្ញានេះ នៅតែបន្តធ្លាក់យ៉ាងជោគជាំដដែល ។
អាជ្ញាធរប្រទេសវៀតណាម ដែលមានទីតាំងនៅជិតខេត្តរតនគិរី បានជូនដំណឹងមកថា ភាគីវៀតណាមនឹងបើកទំនប់វារីអគ្គិសនីពីតំបន់ខ្សែទឹកខាងលើ ចាប់ពីថ្ងៃទី១៣ ដល់ថ្ងៃទី៣០ កញ្ញា ហេតុនេះធ្វើឱ្យកម្ពស់ទឹកទន្លេស្រែពកមានការកើនឡើង ។
ជនជាតិភាគតិចជាច្រើនគ្រួសារ ដែលរស់នៅតាមដងទន្លេសេសានបាននាំគ្នាមកកាន់ទីទួលសុវត្ថិភាព កាលពីវេលាម៉ោង៣ទៀបភ្លឺថ្ងៃទី១៩ កញ្ញា ចំណុចភូមិល្វែងក្រោម ស្រុកតាវែង ដោយឡែកប្រជាពលរដ្ឋប្រមាណជាង១០០គ្រួសារទៀត ក៏ត្រូវបានអាជ្ញាធរស្រុកលំផាត់ កំពុងប្រឹងប្រែងក្នុងការជួយសង្គ្រោះជាបន្ទាន់ផងដែរ ដោយសារមានភ្លៀងធ្លាក់ប៉ុន្មានថ្ងៃជាប់គ្នា ធ្វើឱ្យកម្ពស់ទឹកទន្លេឡើង ដែលបង្កឱ្យមានឱ្យប្រជាពលរដ្ឋមានការភ័យខ្លាចយ៉ាងខ្លាំង ។
អភិបាលស្រុកលំផាត់ លោកគង់ ស្រ៊ុន បានឱ្យកោះសន្តិភាពដឹងនៅរសៀលថ្ងៃទី១៩ កញ្ញា នេះថា ក្នុងស្រុកលំផាត់មានឃុំសរុបចំនួន៦ និងភូមិ២៤ តែមាន៤ឃុំប៉ុណ្ណោះ ដែលទឹកបានជន់លិចធ្ងន់ធ្ងរ និងធ្វើឱ្យប៉ះពាល់ដល់ប្រជាពលរដ្ឋចំនួន១៧០គ្រួសារ ៕
ចែករំលែកព័តមាននេះ