ខេត្តកំពង់ធំ ៖ អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំបានស្នើឱ្យអាជ្ញាធរបន្តចុះស្រាវជ្រាវរកអតីតយុទ្ធនិងគ្រួសារក្រីក្របន្តទៀតដើម្បីឲ្យក្រុមការងារងាយស្រួលក្នុងចុះជួយដល់ពួកគាត់ទាំងលើផ្នែកជីវភាពនិងជម្រកស្នាក់នៅឲ្យបានទាន់ពេលវេលា។
នេះជាការស្នើឡើងរបស់លោកជំទាវ ខៀវ ស៊ីណា ជា ចាន់តូ អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំ កាលពីថ្ងៃទី៩ មីនា ឆ្នាំ២០១៩ ក្នុងឱកាសដែលលោកជំទាវ និងក្រុមការងារ និងមន្ត្រីសាខាកាកបាទក្រហមកម្ពុជាខេត្តអញ្ជើញចុះប្រគល់ផ្ទះដល់គ្រួសារអតីតយុទ្ធជន១០គ្រួសារ និងគ្រួសារក្រីក្រ៥គ្រួសារ រស់នៅឃុំ ក្រយា ឃុំប្រាសាទ ឃុំព្នៅ និង ឃុំកកោះ ក្នុងស្រុកសន្ទុក ខេត្តកំពង់ធំ។
ផ្ទះថ្មីដែលក្រុមការងារដែលដឹកនាំការសាងសង់ដោយលោកជំទាវ ខៀវ ស៊ីណា ត្រូវបានសាងសង់ និងប្រគល់ជូននាពេលនេះ គឺសង់អំពីឈើប្រក់ស័ង្កសី មានទំហំ៤ម៉ែត្រគុណនឹង៦ម៉ែត្រ ហើយផ្ទះថ្មីនេះ គឺជាអំណោយដ៏ថ្លៃថ្លាប្រកបដោយទឹកចិត្តព្រហ្មវិហារធម៌ពោរពេញដោយក្ដីអាណិតស្រឡាញ់របស់សម្ដេចតេជោ ហ៊ុនសែន និងសម្ដេចកិត្តិព្រឹទ្ធប៊ុន រ៉ានី ហ៊ុន សែន ប្រធានកាកបាទក្រហមកម្ពុជាតាមរយៈលោកជំទាវ ខៀវ ស៊ីណា ជា ចាន់តូ បន្ទាប់ពីសម្ដេចទាំងទ្វេរមើលឃើញពីការខ្វះខាតរបស់អតីតយុទ្ធជននិងប្រជាពលរដ្ឋក្រីក្ររាមរយៈក្រុមការងារផ្ដល់ជូននោះមក។
នៅក្នុងឱកាសប្រគល់ផ្ទះជូនដល់គ្រួសារអតីតយុទ្ធជននិងគ្រួសារក្រីក្រនោះ លោកជំទាវខៀវ ស៊ីណាបានបញ្ជាក់ថា គ្មានពេលណាដែលថ្នាក់ដឹកនាំទាំងអស់ ពិសេសសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត រួមនឹងប្រជាជនកម្ពុជាបំភ្លេចបាននូវគុណបំណាច់ដ៏ធំធេងរបស់បងប្អូនអតីតយុទ្ធបានឡើយ ព្រោះបើគ្មានការលះបង់របស់បងប្អូនដ៏ធំធេងណាស់សម្រាប់ជាតិមាតុភូមិនិងជាជនកម្ពុជា ហើយបើគ្មានការស៊ូនិងការលះបង់ប្រកបដោយទឹកចិត្តស្នេហាជាតិរបស់យុទ្ធយើងទេនោះគឺប្រជាជន និងប្រទេសជាតិក៏គ្មានសេចក្ដីសុខ និងមានការអភិវឌ្ឍរីកចម្រើនដូចសព្វថ្ងៃនេះដែរ ។
ដូចនេះសុខទុក្ខបងប្អូនអតីតយុទ្ធក៏ដូចប្រជាពលរដ្ឋក្រីក្រគឺជាសុខទុក្ខរបស់ថ្នាក់ដឹកនាំគ្រប់ៗរូបដែលត្រូវតែមានការគាំពារ យកចិត្តទុកដាក់និងជួយឧបត្ថម្ភ ហើយបងប្អូនត្រូវជឿជាក់លើការដឹកនាំរបស់រាជរដ្ឋាភិបាលដែលមានសម្ដេចតេជោជាប្រមុខ ក្នុងនោះរួមទាំងកាកបាទក្រហមកម្ពុជាផងគឺគ្មានថ្ងៃណាបំភ្លេចនិងបោះបង់បងប្អូនចោលនោះឡើយ។
ដើម្បីជាចំណងដៃក្នុងថ្ងៃឡើងផ្ទះថ្មីនេះដែលតាមរយៈលោកជំទាវ ខៀវ ស៊ីណា ជា ចាន់តូ សម្ដេចតេជោ ហ៊ុន សែន និងសម្ដេចកិត្តិព្រឹទ្ធប៊ុន រ៉ានី ហ៊ុន សែន បានផ្ដល់ជូននូវសម្ភារៈប្រើប្រាស់ និងថវិកាមួយចំនួនជូនដល់គ្រួសារដែលទទួលបានផ្ទះថ្មីទាំង១៥គ្រួសារផងដែរ៕
ចែករំលែកព័តមាននេះ