ខេត្តបាត់ដំបង ៖ សហភាពសហព័ន្ធយុវជនកម្ពុជាខេត្តបាត់ដំបង (ស.ស.យ.ក) នាព្រឹកថ្ងៃទី០៦ មីនា
នេះបានប្រារព្ធពិធីក្រុងពាលីបួងសួងនៅខាងមុខរូបសំណាកលោកតាដំបងគ្រញូង ដើម្បីសុំសេចក្ដីសុខសប្បាយ ក្នុងឱកាសរៀបចំបើកការដ្ឋានសាងសង់កន្លែងប្រារព្ធមហាសង្ក្រានឆ្នាំថ្មីប្រពៃណីខ្មែរ នាពេល
ខាងមុខនេះ ។
ពិធីនេះ បានប្រព្រឹត្តទៅក្រោមអធិបតីភាពលោកច័ន្ទ សុផល តំណាងរាស្ត្របាត់ដំបង លោកសឿម ប៊ុនរិទ្ធ អភិបាលរងខេត្តបាត់ដំបង និងលោកស រដ្ឋា ប្រធានសហភាពសព័ន្ធយុវជនកម្ពុជាខេត្តបាត់ដំបង រួមទាំងសមាជិក សមាជិកាជាច្រើនរូបទៀត ។ អ្នករៀបចំពពិធីនេះបានឲ្យដឹងថា នេះជាពិធីក្រុងពាលីបួងសួងសុំសេចក្ដីសុខចំរើន ក្នុងឱកាសរៀបចំកន្លែងប្រារព្ធសង្ក្រានឆ្នាំថ្មីនេះ ។ ទីតាំងរៀបចំសង្ក្រានឆ្នាំថ្មីប្រពៃណីខ្មែរនាពេលខាងមុននេះ នឹងធ្វើឡើងនៅក្នុងបរិវេណវិទ្យាល័យនេតយ៉ង់ និងផ្នែកខាងមុខក្បែររង្វង់មូលរូបសំណាកលោកតាដំបងគ្រញូង ដែលនឹងចាប់ផ្ដើមរៀបចំ នាពេលខាងមុខនេះហើយ។
បើតាមអ្នករៀបចំកម្មវិធីបានប្រាប់ថា នេះជាលើកទី២ហើយដែលស.ស.យ.ក ខេត្តបាត់ដំបង បានរៀបចំសង្ក្រានជូនបងប្អូនប្រជាពលរដ្ឋខេត្តបាត់ដំបងចូលរួមកំសាន្តសប្បាយ ។ ប៉ុន្តែ សង្ក្រានបាត់ដំបាត់ដំបងឆ្នាំនេះ នឹងមានលក្ខណ:ធំដុំជាងឆ្នាំមុន ល្អប្រសើរជាងឆ្នាំមុន ហើយថែមទាំងមានការរៀបចំលេងល្បែងប្រជាប្រិយគ្រប់ប្រភេទ គ្រប់បែប នៅតាមកន្លែងផ្សេងៗគ្នា ហើយសង្ឃឹមថា នឹងមានពលរដ្ឋចូលរួមច្រើនក្នុងពិធីចូលឆ្នាំថ្មីប្រពៃណីខ្មែរនាពេលខាងមុខនេះ ៕
ចែករំលែកព័តមាននេះ