រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានមានប្រសាសន៍កាលពីថ្ងៃទី១៩ មីនា ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបលទ្ធផលការងារអប់រំយុវជន និងកីឡាឆ្នាំសិក្សា២០០៨-២០០៩ និងលើកទិសដៅឆ្នាំសិក្សាឆ្នាំ២០០៩-២០១០ នៅវិទ្យាស្ថានជាតិអប់រំ ឱ្យបន្ដជំរុញការប្រលងប្រជែងលើកិច្ចការស្រាវជ្រាវ និងកិច្ចការតែងនិពន្ធលើគ្រប់មុខវិជ្ជា ។ ជាមួយនេះត្រូវពិនិត្យផ្ទៀងផ្ទាត់ឱ្យបានម៉តចត់លើអត្ថបទសិក្សាស្រាវជ្រាវ កាសែត ទស្សនាវដ្ដី គេហទំព័រ ស្លាកសញ្ញានានានៅតាមទីសាធារណៈ ឱ្យរក្សាបាននូវទំរង់ និងក្បួនខ្នាតអក្សរសាស្ដ្រ និងភាសាជាតិខ្មែរដូចបានរៀបចំនៅក្នុងវចនានុក្រមខ្មែរបស់សម្ដេចព្រះសង្ឃរាជ ជួន ណាត ។ពាក់ព័ន្ធនឹងបញ្ហានេះ សម្ដេចតេជោនាយករដ្ឋមន្ដ្រីបានឱ្យគណៈកម្មាធិការជាតិភាសាខ្មែរផ្ដោតការយកចិត្ដទុកដាក់ទៅលើភារកិច្ចកំណត់ឯកភាពនៃភាសាខ្មែរក្នុងការអាន ការបង្កើតពាក្យការឱ្យនិយមន័យ ក៏ដូចជាការសរសេរអក្ខរាវិរុទ្ធដែលបច្ចុប្បន្ននេះមានមួយចំនួនមិនទាន់មានការឯកភាពគ្នានៅឡើយ ។សម្ដេចតេជានាយករដ្ឋមន្ដ្រីមានប្រសាសន៍ថា បើប្រៀបធៀបទៅនឹង២០ឆ្នាំមុន គឺមានការស្រួលបន្ដិច ។ ឥឡូវនេះ ក្រុមសម្ដេចជួន ណាត កំពុងមានកំលាំងខ្លាំងលើសលប់ហើយ ។ ក្រុមទំនាញសូររបស់លោកកេង វ៉ាន់សាក់ បានធាក់ថយហើយ…។ ពិបាកណាស់ មហាពិបាក ខុសគ្នារឿងអក្សរ កាលសម័យដើមទាស់គ្នាពីរឿងអក្សរនេះ។ ម្ខាងគឺខាងសម្ដេចព្រះសង្ឃរាជ ជួន ណាត ឯម្ខាងទៀត គឺក្រុមទំនាញសូររបស់លោក កេង វ៉ាន់សាក់ ។ក្រោយឆ្នាំ១៩៧៩ នៅពេលបើកកិច្ចប្រជុំសភាម្ដងៗមានការជជែកយ៉ាងខ្លាំងអំពីរឿងភាសានេះ ក្រុមទំនាញសូរមួយក្រុមទៅ ឯខាងក្រុមម្ខាងទៀត ក៏ទិតៀនទៅ ឧទាហរណ៍ៈ ដូចពាក្យសំណើ=គេសរសេរ សំណើ ។ ប៉ុន្ដែទំនាញសូររបស់លោកតាកេង វ៉ាន់សាក់ ពាក្យណើនោះសរសេរនឹង “ន”ទេ (សំនើ)។ ទោះជាយ៉ាងនេះក្ដី សម្ដេចតេជោនាយករដ្ឋមន្ដ្រីបញ្ជាក់ថា កាលណោះ ខ្ញុំម៉ឺងម៉ាត់ណាស់ តាំងពីឆ្នាំ១៩៨៥ ពេលខ្ញុំធ្វើនាយករដ្ឋមន្ដ្រី ខ្ញុំកំណត់ច្បាស់ថា អ្នកណាធ្វើលិខិតឬបញ្ជូនរបាយការណ៍អ្វីៗ… សរសេរ តាមទំនាញសូរ ខ្ញុំអត់ចុះហត្ថលេខា ត្រូវយកទៅកែដែលកាលជំនាន់នោះមិនមែនជំនាន់ កុំព្យូទ័រឯណា ជំនាន់អង្គុលីលេខយកទៅវាយកែវិញទៅ ។បើប្រៀបធៀបនឹងជាង២០ឆ្នាំមុនការលំបាកមានការថយចុះហើយ ។ ឥឡូវល្អហើយអត្ថបទច្បាប់មួយ ឬអនុក្រឹត្យមួយមានសន្ទានុក្រមភ្ជាប់ទៅជាមួយដើម្បីបកស្រាយ ។ ទាក់ទិននឹងបញ្ហានេះ សម្ដេចតេជោនាយករដ្ឋមន្ដ្រីបញ្ជាក់ថា ព្រោះមានភាសាខ្លះយើងអត់ទាន់មានផង ។ នេះគឺជាចំណុចមួយដែលត្រូវបន្ដយកចិត្ដទុកដាក់ យើងត្រូវយល់ហើយឯកភាពគ្នាក្នុងការប្រើប្រាស់ ។ សម្ដេចបានលើកមកបញ្ជាក់ខ្លះៗថា គ្រាន់តែភាសាខ្មែរមួយក៏មានរបៀបសរសេរខុសគ្នាដែរ ។ ឥឡូវយើងបានឯកភាពគ្នាត្រឹមត្រូវហើយតាមវចនានុក្រមរបស់សម្ដេចព្រះសង្ឃរាជ ជួន ណាត ។លោកអ៊ឹម សិទ្ធី រដ្ឋមន្ដ្រីក្រសួងអប់រំ យុវជន និងកីឡា បានថ្លែងថា អង្គសន្និបាតបានពិនិត្យផ្ដល់យោបល់លើរបាយការណ៍បូកសរុប និងទិសដៅការងារព្រមទាំងបានពិភាក្សាលើប្រធានបទសំខាន់ៗចំនួន៨ នឹងបានឯកភាពលើរបាយការណ៍បូកសរុបវាយតំលៃ និងទិសដៅ ។ ការពិភាក្សាលើប្រធានបទនីមួយៗបានវាយតំលៃពីការរីកចំរើនកំណត់បញ្ហាប្រឈមដែលត្រូវដោះស្រាយ និងលើកវិធានការ និងអនុសាសន៍ជាអាទិភាពសំរាប់អនុវត្ដនាពេលខាងមុខមានៈ
- -ការចូលរៀន និងអត្រាបញ្ចប់ការសិក្សាដើម្បីសំរេចការអប់រំសំរាប់ទាំងអស់គ្នាៈ បង្កើនការចូលរៀនកុមារអាយុ៣-៥ឆ្នាំ នៅថ្នាក់មតេយ្យសិក្សា ជាពិសេសកុមារអាយុ៥ឆ្នាំ, បង្កើនការចុះឈ្មោះចូលរៀន កុមារអាយុ៦ឆ្នាំ នៅថ្នាក់ទី១ និងធានានិរន្ដរភាពការសិក្សានៅបឋមសិក្សា, បង្កើនអត្រាបញ្ចប់ការសិក្សានៅបឋមសិក្សា។
- -ការគ្រប់គ្រង និងការធ្វើសនិទានកម្ម បុគ្គលិកអប់រំតំរូវការនិងការផ្គត់ផ្គង់គ្រូបង្រៀនៈ កែលំអគុណភាពគ្រប់គ្រង និងធ្វើសនិទានកម្មបុគ្គលិកអប់រំ ។ ដោះស្រាយតំរូវការគ្រូបង្រៀន និងពង្រឹងគុណភាពវិជ្ជា ជីវៈគ្រូបង្រៀន ។
- -ការអនុវត្ដន៍កម្មវិធីសមមូល និងអភិវឌ្ឍន៍មជ្ឈមណ្ឌលសិក្សាសហគមន៍ៈ ធានាសមធម៌នៃការចូលរៀនតាមកម្មវិធីសមមូល, ធានានិរន្ដរភាពនៃដំណើរការមជ្ឈមណ្ឌលសិក្សាសហគមន៍ ។
- -ការចូលរៀននៅឧត្ដមសិក្សាៈ ធានាសមធម៌នៃការចូលរៀននៅឧត្ដមសិក្សា, ធានាគុណភាព និងប្រសិទ្ធភាពនៃការបណ្ដុះបណ្ដាលនៅឧត្ដមសិក្សា ។
- -ការងារយុវជន និងការងារអប់រំកាយ និងកីឡាៈ អភិវឌ្ឍន៍គោលនយោបាយជាតិយុវជនកម្ពុជា, ជំរុញចលនាប្រលងប្រនាំង៣ល្អ (កូនល្អ សិស្សល្អ មិត្ដល្អ), ពង្រឹងក្រុមប្រឹក្សាយុវជន-កុមារ និងសមាគមនិស្សិត, អភិវឌ្ឍន៍មជ្ឈមណ្ឌលយុវជនជាតិ និងមជ្ឈមណ្ឌលយុវជនរាជធានី-ខេត្ដ, អភិវឌ្ឍន៍គោលនយោបាយជាតិកីឡា, ពង្រឹងគុណភាព និងប្រសិទ្ធភាពសកម្មភាពអប់រំកាយ និងកីឡា ។
- -អនុវត្ដកម្មវិធីសិក្សាថ្មី និងផ្គត់ផ្គង់សៀវភៅសិក្សាគោលៈ អនុវត្ដកម្មវិធីសិក្សាថ្មីនៅមធ្យមសិក្សាទុតិយភូមិដោយផ្សារភ្ជាប់ទៅនឹងការតំរង់ទិសវិជ្ជាជីវៈ, ពង្រឹងគុណភាពអប់រំនៅមធ្យមសិក្សាទុតិយភូមិ, ផ្គត់ផ្គង់សៀវភៅសិក្សាគោលទៅដល់សាលារៀនឱ្យទាន់ពេលវេលា និងគ្រប់គ្រាន់ ។
- -ការកសាងសមត្ថភាពមន្ដ្រីគ្រប់គ្រងអប់រំៈ អនុវត្ដវិមជ្ឈការការងារស្ថិតិ និងផែនការអប់រំ, ពង្រឹងសមត្ថភាពមន្ដ្រីគ្រប់គ្រងសំរាប់ឆ្លើយតបទៅនឹងកំណែទំរង់រដ្ឋបាលសាធារណៈ ។
- -ការងារកំណែទំរង់ការគ្រប់គ្រងហិរញវត្ថុសាធារណៈក្នុងវិស័យអប់រំៈ ពង្រឹងគណនេយ្យភាពហិរញវត្ថុសាធារណៈ, អនុវត្ដយន្ដការគ្រប់គ្រងហិរញវត្ថុតាមប្រព័ន្ធព័ត៌មានវិទ្យា, ពង្រឹងភាពជឿទុកចិត្ដលើថវិកា ។
ទាំងអស់នេះ គឺជារបាយការណ៍សង្ខេបស្ដីពីលទ្ធផលសន្និបាតប្រចាំឆ្នាំរបស់ក្រសួងអប់រំយុវជន និងកីឡា ។ លោករដ្ឋមន្ដ្រីក្រសួងអប់រំយុវជន និងកីឡា បញ្ជាក់ថា លទ្ធផលវិជ្ជមានដែលក្រសួងសំរេចបាននេះ គឺអាស្រ័យដោយមគ្គុទេសក៍ភាពដ៏ឆ្នើមនៃសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រីនៃព្រះរាជាណាចក្រកម្ពុជាដែលផ្ដល់ឱកាសឱ្យក្រសួងបានទទួលកិច្ចសហប្រតិបត្ដិការល្អពីសំណាក់ក្រសួង និងស្ថាប័នពាក់ព័ន្ធជាពិសេសកិច្ចគាំទ្រដ៏មានប្រសិទ្ធភាពរបស់ក្រសួងសេដ្ឋកិច្ច និងហិរញ្ញវត្ថុ ព្រមទាំងអាជ្ញាធរដែនដីគ្រប់លំដាប់ថ្នាក់ និងដៃគូអភិវឌ្ឍន៍ជាតិ និងអន្ដរជាតិ ។
ចែករំលែកព័តមាននេះ