រឿងជីកដីដឹកលក់ សង្ស័យចែកគ្នារស់ បានជាគ្មានប្រតិកម្មពីរដ្ឋអំណាច
- កំពង់ស្ពឺ
ខេត្តកំពង់ស្ពឺ៖ ក្រុមរថយន្តដឹកអាចម៍ដីជាច្រើនគ្រឿងកំពុង សម្រុកដឹកជញ្ជូនដីយកទៅលក់ បន្តឱ្យប្រជាពលរដ្ឋ និងទីតាំងមួយចំនួន។ ប៉ុន្តែក្រុមថៅកែគ្រឿងចក្រ បានឲ្យក្រុមរថយន្តដឹកមិនគោរពបទដ្ឋានបច្ចេកទេស (មិនគ្រប) ធ្វើឱ្យមានដីធ្លាក់ប្រឡាក់ផ្លូវជាតិលេខ៤ ប្រឈមហានិភ័យដល់អ្នកធ្វើដំណើរឆ្លងកាត់។
ជាក់ស្ដែងកាលពីល្ងាចថ្ងៃទី២៣-២៤ ខែសីហា ឆ្នាំ២០២៦ អ្នកយកព័ត៌មានបានទៅផ្តិតយករូបភាព ក្រុមរថយន្តដឹកអាចម៍ដីចេញពីរណ្ដៅមួយកន្លែងជីកកាយយូរឆ្នាំមកហើយ នៅក្នុងទំនប់អូរក្រាំងអំបិល ស្ថិតនៅក្នុងឃុំវល្លិ៍សរ ស្រុកសំរោងទង ខេត្តកំពង់ស្ពឺ ដែលគេស្គាល់ថាជារណ្ដៅដីរបស់ថៅកែថុល ហើយមេការគ្រប់គ្រងក្រុមរថយន្តដឹកដីខាងលើនោះមានឈ្មោះ( វុធ ) ដឹកយកទៅលក់បន្តនៅក្បែរផ្លូវល្បឿនលឿន ក្នុងភូមិស្លា ឃុំវល្លិ៍សរ ស្រុកសំរោងទង ខេត្តកំពង់ស្ពឺ ដោយរថយន្តជាច្រើនគ្រឿងមិនបានគោរពច្បាប់នៅឡើយព្រោះតែក្រុមរថយន្តដឹកអាចម៍ដីមិនគ្របតង់ដែលច្បាប់បានកំណត់នោះឡើយ។
ការមិនគ្របរបស់ក្រុមរថយន្តដឹកអាចម៍ដីខាងលើបានធ្វើឲ្យអាចម៍ដីធ្លាក់ពាសវាលពាសកាល តាមបណ្ដោយផ្លូវជាតិលេខ៤ ប្រឈមហានិភ័យដល់អ្នកធ្វើដំណើរ។ មានសភាពហុយ ប្រសិនបើមានភ្លៀងធ្លាក់អ្នកធ្វើដំណើរតាមម៉ូតូ ជាពិសេសកម្មករកម្មការិនីរោងចក្រ និងសិស្សសាលា ប្រឈមនិងការរអិលអាចបង្កជាគ្រោះថ្នាក់ចរាចរណ៍ជាយថាហេតុ។
បើតាមប្រភពព័ត៌មានពីមន្ត្រីរដ្ឋបាលស្រុកសំរោងទង បានខ្សឹបថា ករណីក្រុមរថយន្តដឹកអាចម៍ដី មិនគោរពច្បាប់(ដឹកមិនគ្របនេះ) វាជារបៀបកន្ទេលធំបន្លំដេក ដែលសមត្ថកិច្ចជំនាញអាចនឹងត្រូវ មិនអើពើ ចុះពិនិត្យពីការធ្វើអាជីវកម្មរបស់ថៅកែ រកស៊ីជីកកាយដី។
យ៉ាងណាក៏ដោយគឺគេសង្កេតឃើញការជីកកកាយ និងការដឹកជញ្ជូនអាចម៍ដី ទៅចាក់បំពេញនៅទីតាំងមួយកន្លែងទៀត ដោយឆ្លងកាត់ផ្លូវជាតិលេខ៤ ដោយប្រើរថយន្តជាច្រើនគ្រឿងនោះ មិនត្រឹម ត្រូវតាមបទដ្ឋានបច្ចេកទេសនោះឡើយ ដឹកមិនគ្រប ជ្រុះអាចម៍ដីពាសពេញផ្លូវ ធ្វើឱ្យផ្លូវជាតិលេខ៤ ចំណុចខ្លះមើលទៅក្លាយជាផ្លូវដីរអិល ។ បើកបររថយន្តក្នុងល្បឿនលឿនហាក់បីដូចជាប្រណាំងប្រជែងគ្នា ព្រោះដើម្បីតែប្រយោជន៍ផ្ទាល់ខ្លួនមិនគិតពី គ្រោះថ្នាក់ដល់អ្នកដទៃ។
បើយើងងាកទៅមើលសកម្មភាពការដឹកជញ្ជូនអាចម៍ដីឯណេះវិញត្រូវបានគេកត់សម្គាល់ឃើញថា បង្កហានិភ័យប៉ះពាល់ដល់បរិស្ថាននិងការចរាចរណ៍លើផ្លូវជាតិលេខ៤ ម្តុំអូរក្រាំងអំបិលយ៉ាងខ្លាំង។
ពាក់ព័ន្ធនឹងការលើកឡើង និងក្តីបារម្ភរបស់ប្រជាពលរដ្ឋខាងលើនេះ អ្នកយកព័ត៌មានយើង បានទូរស័ព្ទទៅលោក ប៊ីញ ជីវតុង ប្រធានមន្ទីររ៉ែនិងថាមពលខេត្តកំពង់ស្ពឺ ដើម្បីសួរនាំរឿងក្រុមរថយន្តដឹកអាចម៍ដី មិនគ្រប បើកបរតាមបណ្តោយផ្លូវជាតិលេខ៤ ក្នុងស្រុកសំរោងទង ខេត្តកំពង់ស្ពឺ តេចូលហើយ មិនមានអ្នកទទួលទូរស័ព្ទនោះទេ ។ សង្ស័យគ្មានវាចានឹងថ្លែងទេ សុទ្ធតែគ្នាឯងជួយផលប្រយោជន៍ទេដឹង?
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ