សហរដ្ឋអាមេរិក ៖ ទីភ្នាក់ងារសម្ងាត់សហរដ្ឋអាមេរិក (U.S. Secret Service) កាលពីថ្ងៃទី២៥ ខែសីហា ឆ្នាំ២០២៦ (ម៉ោងនៅសហរដ្ឋអាមេរិក) កំពុងស៊ើបអង្កេត ក្រោយបានបញ្ជាក់ជាផ្លូវការថា ខ្លួនបានដឹងអំពីវីដេអូរបស់ប្រព័ន្ធផ្សព្វផ្សាយរដ្ឋអ៊ីរ៉ង់ ដែលបង្ហាញពីការគំរាមកំហែងដល់អាយុជីវិតរបស់លោក បារ៉ុន ត្រាំ (Barron Trump) ដែលជាកូនប្រុសពៅរបស់ប្រធានាធិបតីអាមេរិក លោក ដូណាល់ ត្រាំ (Donald Trump)។ នេះបើតាមប្រភពពី CNN បានចេញផ្សាយ។
អ្នកនាំពាក្យទីភ្នាក់ងារសម្ងាត់អាមេរិក លោក Nate Herring បានប្រាប់ CNN នៅក្នុងសេចក្តីថ្លែងការណ៍មួយថា «ទីភ្នាក់ងារសម្ងាត់បានដឹងអំពីវីដេអូនោះ ហើយក៏កំពុងស៊ើបអង្កេតរាល់អ្វីៗទាំងអស់ដែលអាចចាត់ទុកថា ការគំរាមកំហែងដល់បុគ្គលដែលត្រូវយើងការពារ ហើយដោយសារក្តីបារម្ភលើសន្តិសុខប្រតិបត្តិការ ដូច្នេះយើងមិនអាចពិភាក្សាអំពីបញ្ហាព័ត៌មានសម្ងាត់នៃកិច្ចការពារនោះទេ។
វីដេអូដែលមានរយៈពេលជិត៣នាទីនោះ បានចាប់ផ្តើមជាមួយរូបភាពជាភាសាអង់គ្លេសដែលសរសេរថា «តើត្រូវសម្លាប់ Barron Trump នៅកន្លែងណា0x017d7!» ហើយបានបង្ហាញរូបច្នៃប្រឌិតពីទីតាំងនានាដែលគេដឹងជាសាធារណៈថា កូនប្រុសពៅរបស់លោក ត្រាំ រូបនេះ បានចំណាយពេលនៅទីនោះ រួមទាំងអគារ Trump Tower ក្នុងទីក្រុងញូវយ៉កផងដែរ។ ជាងនេះទៀត នៅជិតបញ្ចប់វីដេអូ អ្នកអត្ថាធិប្បាយបាននិយាយថា «មនុស្សម្នាកំពុងទន្ទឹងរង់ចាំយ៉ាងអន្ទះសារ ដើម្បីទទួលបានប្រាក់រង្វាន់ ១០ លានដុល្លារអាមេរិករបស់យើង»។
វីដេអូនេះត្រូវបានផ្សព្វផ្សាយកាលពីចុងសប្តាហ៍មុន ដោយប្រព័ន្ធផ្សព្វផ្សាយរដ្ឋអ៊ីរ៉ង់ IRIB ដែលមាននិន្នាការទៅរកក្រុមអភិរក្សនិយមជ្រុលនៅក្នុងរបបដឹកនាំអ៊ីរ៉ង់ ខណៈប្រធាននៃប្រព័ន្ធផ្សព្វផ្សាយមួយនេះ ត្រូវបានតែងតាំងដោយផ្ទាល់ដោយមេដឹកនាំកំពូលរបស់អ៊ីរ៉ង់តែម្តង។
ប្រភពអនុវត្តច្បាប់សហព័ន្ធមួយបានប្រាប់ទូរទស្សន៍ CNN ថា វីដេអូនោះជាផ្នែកមួយនៃយុទ្ធនាការផ្សព្វផ្សាយវីដេអូមកពីប្រទេសអ៊ីរ៉ង់ ដែលកំណត់គោលដៅលើក្រុមគ្រួសារលោក ត្រាំ និងខ្លួនលោកផ្ទាល់តែម្តង។ វីដេអូខ្លះរួមមានព័ត៌មានលម្អិតអំពីការធ្វើដំណើរ និងការផ្តល់យោបល់សម្រាប់ការសម្លាប់សមាជិកគ្រួសារលោកផងដែរ។ ប្រភពដដែលបានបន្ថែមថា ប្រតិបត្តិការការពារត្រូវបានផ្លាស់ប្តូរ និងកែសម្រួលជាបន្តបន្ទាប់ ដោយផ្អែកលើព័ត៌មានសន្តិសុខជាច្រើនពីទីភ្នាក់ងារសម្ងាត់អាមេរិក ក៏ដូចជាភ្នាក់ងារផ្សេងទៀត រួមទាំងប៉ូលិស និងបណ្តាប្រទេសដទៃទៀតផងដែរ។
ប្រព័ន្ធផ្សព្វផ្សាយអ៊ីរ៉ង់បានបង្ហាញខ្លឹមសារគំរាមកំហែងជីវិតរបស់លោកប្រធានាធិបតី ត្រាំ និងក្រុមគ្រួសារលោកជាបន្តបន្ទាប់ បន្ទាប់ពីការធ្វើឃាតអតីតមេដឹកនាំកំពូលរបស់ខ្លួនគឺលោក អាយ៉ាតូឡា អាលី ខាមេនី (Ayatollah Ali Khamenei) រួមទាំងសមាជិកគ្រួសាររបស់លោកជាច្រើនរូបផ្សេងទៀត នៅដើមដំបូងនៃសង្គ្រាមរវាងសហរដ្ឋអាមេរិក-អ៊ីស្រាអែល ជាមួយនឹងអ៊ីរ៉ង់ កាលពីខែកុម្ភៈ។ ទោះយ៉ាងណាក៏ដោយ ការគំរាមកំហែងថ្មីៗនេះ ហាក់ដូចជាលើកទី១ហើយដែលកូនប្រុសពៅរបស់លោក ត្រាំ ត្រូវបានកំណត់មុខសញ្ញាចំៗជាសាធារណៈបែបនេះ៕
ចែករំលែកព័តមាននេះ