ខេត្តកណ្ដាល ៖ មនុស្ស៣នាក់នៅក្នុងគ្រួសារមួយមានប្ដីប្រពន្ធ និងកូនប្រុសបានរងរបួសបែកក្បាលយ៉ាងដំណំ ដោយសារតែយុវជនស្ទាវម្នាក់វាយនឹងដែក ដោយចោទប្រកាន់គ្មានភស្តុតាងថា ជនរងគ្រោះខាងលើលួចកូនទារបស់ខ្លួនអស់ជាច្រើនក្បាល ។ ក្រោយពីមានការសង្ស័យបែបនេះជនស្ទាវខាងលើបានចងគំនុំក្នុងចិត្តជាមួយគ្រួសារជនរងគ្រោះយ៉ាងខ្លាំង លុះពេលផឹកស្រាស្រវឹងបានជួបជនរងគ្រោះក៏បានវាយមិនប្រណី…
ខេត្តកណ្ដាល ៖ មនុស្ស៣នាក់នៅក្នុងគ្រួសារមួយមានប្ដីប្រពន្ធ និងកូនប្រុសបានរងរបួសបែកក្បាលយ៉ាងដំណំ ដោយសារតែយុវជនស្ទាវម្នាក់វាយនឹងដែក ដោយចោទប្រកាន់គ្មានភស្តុតាងថា ជនរងគ្រោះខាងលើលួចកូនទារបស់ខ្លួនអស់ជាច្រើនក្បាល ។
ក្រោយពីមានការសង្ស័យបែបនេះជនស្ទាវខាងលើបានចងគំនុំក្នុងចិត្តជាមួយគ្រួសារជនរងគ្រោះយ៉ាងខ្លាំង លុះពេលផឹកស្រាស្រវឹងបានជួបជនរងគ្រោះក៏បានវាយមិនប្រណី បណ្ដាលឲ្យរងរបួស១គ្រួសារបែបនេះតែម្ដង ។ ហេតុការណ៍នេះបានកើតឡើង កាលពីវេលាម៉ោង១៥និង៣០នាទីថ្ងៃទី២៥ ខែកុម្ភៈ ឆ្នាំ២០១៩ នៅក្នុងភូមិព្រៃសំរោង ឃុំបែកចានស្រុក អង្គស្នួល ខេត្តកណ្តាល ។
ជនរងគ្រោះទាំង៣នាក់នោះរួមមាន១-ឈ្មោះ កែវ ផល្លី ភេទប្រុស អាយុ៥៣ឆ្នាំ ជនជាតិខ្មែរមុខរបរកម្មករសំណង់រងរបួសបែកក្បាលដេរ០៦ថ្នេ ២- ឈ្មោះ ឡាំង គន្ធា ភេទស្រី អាយុ៥២ឆ្នាំ ជនជាតិខ្មែរមុខរបរមេផ្ទះ ត្រូវជាប្រពន្ធរងរបួសក្បាលដេរ០៤ថ្នេរ និងរបួសរយះដៃឆ្វេង១ថ្នេរ ។ ៣- ឈ្មោះ ផល្លី ចាន់ថេត ភេទប្រុស អាយុ១៦ឆ្នាំ ជនជាតិខ្មែរ មុខរបរសិស្ស ត្រូវជាកូនរងរបួសក្បាល ដេរ០៥ថ្នេរ ។ អ្នកទាំង៣នាក់នេះរស់នៅក្នុងភូមិព្រៃសំរោងឃុំបែកចាន ស្រុកអង្គស្នួលខេត្តកណ្តាល ។
ចំណែកជនសង្ស័យឈ្មោះ ចាន់ សុជាតិ អាយុ២៣ ឆ្នាំជនជាតិខ្មែរ មុខរបរមិនពិត ស្នាក់នៅក្នុងភូមិថ្មី ឃុំបែកចាន ស្រុកអង្គស្នួល ខេត្តកណ្តាល ហើយនគរបាលដកហូតបានដែកមូលប្រហោង១កំណាត់ ។ តាមប្រភពព័ត៌មានបានឲ្យដឹងថា នៅមុនពេលកើតហេតុក្មេងប្រុសរងគ្រោះឈ្មោះ ផល្លី ចាន់ថេត បានជិះកង់ម្នាក់ឯងចេញពីផ្ទះទៅរកទិញនំហូប លុះក្រោយពេលចេញបានបន្តិចក៏ស្រាប់តែជួបជនដៃដល់កំពុងដើរតាមផ្លូវ ។ គ្រាន់តែឃើញជនរងគ្រោះភ្លាមជននេះក៏បានស្ទុះទៅមកវាយ១ដៃ ទាំងកម្រោលដោយគ្មានរឿងអ្វីសោះ បន្ទាប់ក្មេងប្រុសរងគ្រោះបានជិះកង់ទៅប្រាប់ឪពុករបស់ខ្លួនឈ្មោះ កែវ ផល្លី ។
ភ្លាមៗនោះបុរសជាឪពុកបានទៅសួរនាំជនសង្ស័យថា «ហេតុអីបានជាឯងវាយប្អូនអញ្ចឹង?»ពេលនោះជនសង្ស័យមិនបានឆ្លើយតបទេ ហើយរត់ទៅផ្ទះយកដែកសៀតនៅចង្កេះខោរួចដើរត្រឡប់មកវិញ ។ បន្ទាប់មកបានទាញដែកមូលពីចង្កេះវាយលើជនរងគ្រោះ២នាក់ ឪពុក និងកូនម្នាក់១ដែក បណ្ដាលឲ្យរងរបួសបែករយះក្បាល និងបង្កឲ្យមានការភ្ញាក់ផ្អើលយ៉ាងខ្លាំង ។
ប្រភពដដែលបានបន្តថា បន្ទាប់ពីមានរឿងបែបនេះជនរងគ្រោះ២នាក់ ឪពុក និងកូន ត្រូវបានអ្នកភូមិបញ្ជូនទៅកាន់មន្ទីរពេទ្យ ដើម្បីព្យាបាលរបួសហើយនៅក្នុងពេលកំពុងមានការភ្ញាក់ផ្អើល ។ ស្រាប់តែជនដៃដល់ខាងលើដើរទៅកាន់ផ្ទះជនរងគ្រោះ រួចហើយយកដែកនោះវាយទៅលើស្ត្រីជាប្រពន្ធ និងម្ដាយជនរងគ្រោះ បណ្ដាលឲ្យរងរបួសបែកក្បាល និងរយះដៃម្នាក់ទៀត ។
ក្រោយមកទើបកម្លាំងនគរបាលប៉ុស្តិ៍បែកចាន និងនគរបាលផ្នែកព្រហ្មទណ្ឌស្រុកអង្គស្នួលចុះទៅអន្តរាគមន៍ចាប់ខ្លួនជននេះបាន រួចនាំទៅសាកសួរ ដើម្បីកសាងសំណុំរឿងចាត់ការតាមច្បាប់ ។ ក្រោយពេលចាប់ខ្លួនជនដៃដល់ខាងលើបាននិយាយថា ខ្លួនត្រឡប់មកពីផឹកស្រានៅផ្ទះលោកយាយរបស់ខ្លួននៅក្នុងភូមិត្រពាំងទ្រា ឃុំបែកចាន លុះដល់ចំណុចកើតហេតុ ។ ស្រាប់តែឃើញឈ្មោះ ផល្លី ចាន់ថេត នេះកំពុងជិះកង់ខណៈនោះខ្លួនខឹងខ្លាំងណាស់ ព្រោះមានគំនុំយូរហើយ ដោយសារតែជនរងគ្រោះលួចកូនទារបស់ខ្លួន ។ ទើបពេលនោះខ្លួនបានវាយ១ដៃបញ្ចេញកំហឹង លុះបន្តិចក្រោយមកឃើញឈ្មោះ កែវ ផល្លី ជាឪពុកជនរងគ្រោះទៅដល់សួរនាំរញ៉េរញ៉ៃខ្លួនក៏វាយទៀត ។ ប៉ុន្តែដោយសារតែកំហឹងកាន់តែពុះកញ្ជ្រោលទប់លែងបានខ្លួនក៏បានបន្តទៅវាយឈ្មោះ ឡាំង គន្ធា ដែលត្រូវជាប្រពន្ធ និងម្ដាយជនរងគ្រោះកំពុងនៅផ្ទះបណ្ដាលឲ្យរងរបួសម្នាក់ទៀតតែម្ដង ៕
ចែករំលែកព័តមាននេះ