តើ​ម្ចាស់​ថ្នាំ​ញៀន​តម្លៃ​រាប់​លាន​ដុល្លារ ​ស្ថិត​នៅ​ឋាន​ណា​ទៅ​ហ្ន៎ ?


រាជធានី​ភ្នំពេញ ៖ រហូត​មក​ដល់​ថ្ងៃ​ទី​២៥ កុម្ភៈ ​បឹង​ដ៏​ធំ​ដែល​បូម​បាច​រីង​ទឹក​ទៅ​ហើយ (ការ​បង្ក្រាប​គ្រឿង​ញៀន​​ក្នុងមណ្ឌលរ៉ក់) អ្នក​ដទៃ​នឹក​ស្មានថា អាច​ចាប់​បាន​ត្រី​រ៉ស់ ត្រី​ឆ្ដោ​យក្ស​ណាមួយ​មិន​ខាន ប៉ុន្តែ​ផ្ទុយ​ទៅ​​វិញ ចាប់​បាន​តែ​ផ្ទក់​ចង្វា​តែ​ប៉ុណ្ណោះ ។ តើ​ម្ចាស់​ថ្នាំ​ញៀន​តម្លៃ​រាប់​លាន​ដុល្លារ ​ស្ថិត​នៅ​ឋាន​ណា​ទៅ​ហ្ន៎ ? គ្មាន​វាចា​នឹង​ថ្លែង​ភ្លាម​ៗ​បាន​ឡើយ គង់តែ​ស្ងាត់​ទៅ​ហោង ។

នៅ​ព្រឹក​ថ្ងៃដដែល​នេះ​ដែរ សមត្ថកិច្ច​ក៏​បាន​សម្រេចចិត្ត ឱ្យ​​ម្ចាស់​ម៉ូតូ​ទៅ​យក​ម៉ូតូ​វិញ ដែល​បាន​រក្សា​ទុក​នៅ​មជ្ឈមណ្ឌល​កម្សាន្ត​រ៉ក់ ប៉ុន្តែ​តម្រូវ​លក្ខខណ្ឌ​ឱ្យ​​មាន​កាត​គ្រី​​សម្គាល់​យានយន្ត និង​អត្តសញ្ញាណប័ណ្ណ​ត្រឹមត្រូវ ទើប​ប្រគល់​ឲ្យ​វិញ ។

គួរបញ្ជាក់ថា ក្រុម​យុវជន​-យុវនារី​ប្រមាណ​ជាង​៣០០​នាក់ ដែល​សមត្ថ​កិច្ច​ឃាត់ខ្លួន​នៅ​ក្នុង​មជ្ឈ​​មណ្ឌល​កម្សាន្ត​រ៉ក់(Rock) ត្រូវ​បាន​ដោះ​លែង​វិញ​ជិត​អស់ហើយ ទាំង​អ្នក​ពាក់ព័ន្ធ និង​មិន​ពាក់ព័ន្ធ​គ្រឿងញៀន ។ បើ​តាម​មន្ត្រី​គ​របាលព្រហ្មទណ្ឌ​បាន​ឲ្យ​ដឹង​ថា កាលពី​យប់​ថ្ងៃទី​២៤ កុម្ភៈ លោកស្នងការ​នគរបាល​រាជ​ធានី​ភ្នំពេញបាន​អនុញ្ញាតឲ្យ​មនុស្ស​ជាង​២០០​នាក់ បាន​ត្រឡប់​ទៅ​ផ្ទះ​វិញ​ហើយ ។

ការ​អនុញ្ញាត​ឱ្យ​យុវជន​ជាង​២០០​នាក់​ទៅ​ផ្ទះ​វិញ​នោះ ដោយ​មានការ​ឯកភាព​ពី​លោក​ព្រះរាជអាជ្ញា​រង តំណាង​អយ្យការ​អម​សាលាដំបូង​រាជធានី​ភ្នំពេញ​ផង​ដែរ ។ មន្ត្រី​នគរបាល​បាន​ឲ្យ​ដឹង​ទៀត​ថា មនុស្ស​ជាង​៣០០​នាក់​នោះគឺ​មាន​២៣៧​នាក់ ជាប់​ពាក់ព័ន្ធ​ប្រើប្រាស់​គ្រឿងញៀន តាម​រយៈ​ពិនិត្យ​លើ​ទឹកនោម និង​៧០​​នាក់ ជា​យុវជន​មិន​ជាប់​ពាក់ព័ន្ធ​គ្រឿងញៀន​ទេ តែ​ត្រូវ​ឃាត់ខ្លួន​ក្នុង​រង្វង់​ប្រតិបត្តិការ ព្រោះ​ត្រូវ​មិត្តភក្តិ​ហៅ​ឱ្យទៅ​ចូលរួម​កម្សាន្ត ។

សរុប​មក​ដល់​វេលា​ថ្ងៃត្រង់​ថ្ងៃ​ទី​២៥ កុម្ភៈ គឺ​នៅ​សល់​តែ​៥៤​នាក់​​ទេ ប៉ុន្តែ​មនុស្ស​៥៤​នាក់​នោះ ក៏​កំពុង​សម្រិត​​សម្រាំង​បន្ថែម​ទៀត​ ចម្រាញ់​យក​ខ្លាញ់​អាក្រក់ ប្រហែលជា​អាច​នៅ​សល់​ជាង​១០​នាក់​​ប៉ុណ្ណោះ
អាច​បញ្ជូន​ទៅ​តុលាការ ឲ្យ​ទទួលខុសត្រូវ​ចំពោះ​គ្រឿងញៀន​ប្រមាណ​៥០​គីឡូក្រាម​នេះ ។

ការ​បង្ក្រាប​គ្រឿងញៀន​ទ្រង់ទ្រាយ​ធំ​ នៅ​ម​ជ្ឈ​មណ្ឌល​កម្សាន្ត​រ៉ក់​នេះ មន្ត្រី​ជំនាញ​បាន​បង្ហើប​ឲ្យ​ដឹង​ថា ពាក់​ព័ន្ធ​ចំពោះ​ម្ចាស់​ទីតាំង ​ដែល​មហាជន​គ្រប់​មជ្ឈដ្ឋាន​កំពុង​តែ​ចង់​ដឹង ចង់​ស្គាល់ឈ្មោះ​បំផុត​នោះ សមត្ថ​កិច្ច​យើង​មិន​ទាន់​កំណត់​បាន​មុខសញ្ញា​នៅឡើយ​ទេ សង្ស័យ​នៅ​លាក់បាំង​ ព្រោះ​អត់​មាន​ចម្លើយ​ណា​ឆ្លើយ​ដាក់​បន្ទុក ។

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ