រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអំពាវនាវដល់ប្រជាពលរដ្ឋ ទូទាំងប្រទេសកុំមានការតក់ស្លុត ឬភ័យខ្លាចចំពោះជំងឺឆ្កែខាំ ។ មានប្រសាសន៍ក្នុងពិធីអបអរសាទ «ទិវាជាតិទីក្រុងស្អាត» លើកទី៧ ក្រោមប្រធានបទ «ទីក្រុងស្អាត ទីក្រុងផ្តល់ភាពកក់ក្តៅ» ដែលប្រព្រឹត្ត ទៅនៅសណ្ឋាគារសុខាភ្នំពេញ នាព្រឹកថ្ងៃទី២៥ ខែកុម្ភៈ សម្តេចតេជោបានលើកឡើងថា ក្នុងរយៈពេល កន្លងមកនេះមានការជ្រួលច្របល់ និងតក់ស្លុតចំពោះការស្លាប់ដោយសារឆ្កែខាំ ។
សម្តេចបញ្ជាក់ថា« រឿងនេះខ្ញុំសូមយកឱកាសនេះ អំពាវនាវចំពោះប្រជាពលរដ្ឋសូមកុំឲ្យមានការតក់ស្លុត និងភ័យខ្លាចរហូតដល់វិទ្យាស្ថានប៉ាស្ទ័រ និងទីកន្លែងនានាយ៉ាងកកកុញ ទៅយកសេវាវ៉ាក់សាំងដែលអ្នកខ្លះ មិនចាំត្រូវទទួលវ៉ាក់សាំងក៏ទៅទទួលដែរ ។ សម្តេចបន្តថា អ្នកដែលមិនមានឆ្កែខាំ ក៏ទៅយកសេវាដែរ ដូច្នេះបានបណ្តាលឲ្យមានការកកស្ទះ ដូច្នេះក្រសួងសុខាភិបាលបានអំពាវនាវរួចហើយ ថា យើងនឹង ខិតខំដោះស្រាយ ។ ក៏ប៉ុន្តែ អ្នកដែលមិនឆ្កែ ឬឆ្មាខាំ ក៏ទៅទទួលសេវានៅទីនោះដែរ ដែលករណីនេះ បានធ្វើឲ្យមានការពិបាកចំពោះអ្នកដែលចាំបាច់ត្រូវទទួលវ៉ាក់សាំង ។ ព្រោះវាមាន កម្មវិធីចំពោះអ្នកត្រូវ ទទួលវ៉ាក់សាំងឆ្កែខាំ» ។
សម្តេចក៏បានលើកឡើងថា វិធីដែលល្អក្នុងការទប់ស្កាត់ជំងឺឆ្កែឆ្កួតនោះទេ គឺកុំឲ្យឆ្កែខាំ អាហ្នឹងមានតែប៉ុណ្ណឹងទេ គឺល្អជាងគេហើយ កុំទៅប្រឡែងជាមួយសត្វឆ្កែ កុំទៅប្រឡែងជាមួយសត្វមានពឹង ។ អាហ្នឹង គឺវិធីដ៏ល្អហើយ ។ និយាយយ៉ាងដូច្នេះជៀសវាងមិនបានទេ នៅតាម ជនបទសត្វឆ្កែវាមានកូនវា ការពាកូនរបស់វា ដូច្នេះវាខាំក៏មានអ្នកទាំងនោះហើយដែរត្រូវទទួលសេវាបន្ទាន់ »។
សម្តេចតេជោក៏បានស្នើដល់ក្រសួងសុខាភិបាលត្រូវពង្រាយសេវាជួយសង្គ្រោះអ្នកត្រូវឆ្កែខាំ ទៅដល់ មន្ទីពេទ្យមួយចំនួនត្រូវមានសេវាបែបនេះ ហើយក៏អាចផ្តល់លទ្ធផលដល់គ្លីនិចឯកជន ក្នុងការផ្តល់វ៉ាក់សាំង ឆ្កែខាំផងដែរ ។ សម្តេចថា ការផ្តល់សេវានេះ គ្រូពេទ្យត្រូវតែពិគ្រោះចំពោះជំងឺដែលកើតឡើង ដោយកុំចេះតែផ្តល់ដោយមិនបានពិគ្រោះមូលហេតុជំងឺឲ្យសោះ ។
សម្តេចបញ្ជាក់ថា«អីញ្ចឹងខ្ញុំសូមអំពាវនាវចំពោះបញ្ហាឆ្កែខាំកុំតក់ស្លុតចំពោះការស្លាប់របស់កុមារីម្នាក់ ដែលកើតឡើងដោយឆ្កែខាំ» ។ សម្តេចតេជោ ក៏បានលើកឡើងថា កន្លងមកនេះមានអ្នកខ្លះ បានជេប្រទិច ចំពោះវិទ្យាស្ថានប៉ាស្ទ័រ និងក្រសួងសុខាភិបាលផងដែរ ចំពោះការផ្តល់វ៉ាក់សាំងនេះផងដែរ ។ សួមជម្រាបថា ការលើកឡើងរបស់ប្រមុខរាជរដ្ឋាភិបាលនេះ បន្ទាប់ឃើញមានមួយចំនួនបានស្លាប់ ដោយសារឆ្កែខាំ និងឆ្មាក្រញ៉ាំ ៕
ចែករំលែកព័តមាននេះ