ខេត្តសៀមរាប ៖ ជនសង្ស័យម្នាក់បានចូលផ្ទះជនរងគ្រោះ រួចធ្វើសកម្មភាពកាត់សោហិបកេសឈើយកទ្រព្យសម្បត្តិ ហើយត្រូវបានកម្លាំងអធិការនគរបាលស្រុកពួក ដឹកនាំដោយលោកវរសេនីយ៍ឯក ទេព ពុំសែន អធិការនគរបាលស្រុក ចុះឃាត់ខ្លួនយកទៅសួរនាំនៅអធិការស្រុកពួកតាមពាក្យបណ្តឹងរបស់ជនរងគ្រោះ ។
ការចុះចាប់ខ្លួនជនសង្ស័យខាងលើបានធ្វើឡើងកាលពីវេលាម៉ោង៦ព្រឹករហូតដល់ម៉ោង៣រសៀលថ្ងៃទី២៣ ខែ កុម្ភៈ ឆ្នាំ ២០១៩ ស្ថិតនៅអធិការស្រុកពួក ខេត្តសៀមរាប ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលនគរបាលព្រហ្មទណ្ឌខេត្ត បានឱ្យដឹងថា ជនសង្ស័យម្នាក់ខាងលើឈ្មោះសឿម ធា ហៅសង់ ភេទប្រុស អាយុ២៧ឆ្នាំ រស់នៅភូមិទ្រាយ ឃុំពោធិ៍ទ្រាយ ស្រុកពួក ខេត្តសៀមរាប មុខរបរនេសាទត្រី ។ ចំណែកជនរងគ្រោះឈ្មោះ អុីង នឹម ភេទស្រី អាយុ៧៣ឆ្នាំ មុខរបរនេសាទត្រី រស់នៅភូមិទ្រាយ ឃុំពោធិ៍ទ្រាយ ស្រុកពួក ខេត្តសៀមរាប ។
លោកបានបញ្ជាក់ថា កាលពីវេលាម៉ោង២រសៀល ថ្ងៃទី២២ ខែកុម្ភៈ ឆ្នាំ២០១៩ ជនសង្ស័យបានចូលផ្ទះរបស់ជនរងគ្រោះ ខណៈជនរងគ្រោះកំពុងនៅមុខផ្ទះមិនបានចាប់អារម្មណ៍ ហើយជនសង្ស័យបានយករណាអារដែកមកអារសោក្រយ៉ូវដែកហិបកេសឈើរបស់ជនរងគ្រោះរួចបើកយកកាបូបស្ពាយ១ ពណ៌ខ្មៅ ដោយក្នុងកាបូបនោះមានទ្រព្យសម្បត្តិមួយចំនួនរួមមាន ខ្សែ.កមាស១ខ្សែ ទំងន់៤ជីកន្លះ, ខ្សែដៃមាស១ខ្សែ ទំងន់៣ជី, ចិញ្ចៀនមាស១វង់, ចិញ្ចៀនប្លាទីនត្បូងពណ៌ខៀវ ១, រូបព្រះធ្វើពីភ្លុកសត្វ និងធ្វើពីឈើចំនួន៣អង្គ, ចង្គោមចែកាច់២, ថ្លើមថ្ម២, គ្រឿងធ្វើអំពីប្រាក់រួមមាន (សត្វមាន់២, តោ១, ផ្លែល្ពៅ១), ខ្សែក្រវ៉ាត់ប្រាក់២, ខ្សែកថាយ័ន្ត១ដុំ, គ្រឿងកាឡៃមួយចំនួន ។
បន្ទាប់ពីធ្វើសកម្មភាពលួចបាន ហើយជនសង្ស័យបានយកកាបូប និងគ្រឿងធ្វើអំពីប្រាក់ ចង្គូមចែកាច់ រូបព្រះធ្វើពីភ្លុកសត្វ និងខ្សែកថាយ័ន្តយកទៅលាក់ក្នុងព្រៃជុំវិញផ្ទះរបស់ជនសង្ស័យក្នុងភូមិឃុំកើតហេតុខាងលើ។
ប្រភពដដែលបានបន្តទៀតថា គ្រឿងអលង្ការដែលជនសង្ស័យលួចបានរួមមានខ្សែដៃ១ខ្សែទំងន់៣ជីមាស គេយកទៅលក់ក្នុងផ្សារពួក(ស្រុកពួក) បានតម្លៃមួយលានប៉ែតសិបម៉ឺនរៀល រីឯខ្សែ.កមាស១ខ្សែ និងចិញ្ចៀន២វង់ គេយកទៅលក់នៅផ្សារ(មិនស្គាល់ឈ្មោះ) ក្នុងក្រុងសៀមរាប បានតម្លៃពីរលានម្ភៃបួនម៉ឺនរៀល បន្ទាប់មកជនសង្ស័យយកទៅផឹកស៊ី ចាយវាយ និងដេកនៅផ្ទះសំណាក់អស់មួយលានម្ភៃប្រាំពីរម៉ឺនបួនពាន់រៀល លុះព្រឹកឡើងថ្ងៃ២៣ កុម្ភៈ ពេលជនសង្ស័យត្រឡប់មកផ្ទះវិញក៏ត្រូវសមត្ថកិច្ចនាំមកធ្វើការសាកសួរ ហើយជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពកាត់សោលួចយកទ្រព្យសម្បត្តិរបស់ជនរងគ្រោះប្រាកដមែន ។
បច្ចុប្បន្នជនសង្ស័យ ត្រូវបានកម្លាំងជំនាញកំពុងរៀបចំកសាងសំណុំរឿងបញ្ជូនទៅតុលាការចាត់ការបន្តតាមនីតិវិធី ។ ចំណែកទ្រព្យសម្បត្តិដែលសមត្ថកិច្ចដកហូតបានពីជនសង្ស័យត្រូវបានប្រគល់ជូនម្ចាស់ដើមវិញហើយ៕
ចែករំលែកព័តមាននេះ