ខេត្តមណ្ឌលគិរី ៖ យោងតាមប្រភពព័ត៌មានដែលកោះសន្តិភាពទទួលបាននាព្រឹកថ្ងៃទី២០ ខែមេសា ឆ្នាំ២០២៦ បានឲ្យដឹងថា អយ្យការអមសាលាដំបូងខេត្តមណ្ឌលគិរី នៅថ្ងៃទី១៩ ខែមេសា ឆ្នាំ២០២៦…
ខេត្តមណ្ឌលគិរី ៖ យោងតាមប្រភពព័ត៌មានដែលកោះសន្តិភាពទទួលបាននាព្រឹកថ្ងៃទី២០ ខែមេសា ឆ្នាំ២០២៦ បានឲ្យដឹងថា អយ្យការអមសាលាដំបូងខេត្តមណ្ឌលគិរី នៅថ្ងៃទី១៩ ខែមេសា ឆ្នាំ២០២៦ បានចេញសេចក្តីប្រកាសព័ត៌មានជាផ្លូវការ បង្ហាញពីចំណាត់ការផ្លូវច្បាប់លើក្រុមមេខ្លោងដែលរៀបចំឱ្យមាន «មជ្ឈមណ្ឌលឆបោកតាមប្រព័ន្ធបច្ចេកវិទ្យា» ដ៏ធំមួយ បន្ទាប់ពីកម្លាំងចម្រុះបានបើកប្រតិបត្តិការបង្ក្រាបនៅកណ្តាលក្រុងសែនមនោរម្យ។
យោងតាមអ្នកនាំពាក្យនៃអយ្យការអមសាលាដំបូងខេត្ត អង្គហេតុនេះបានចាប់ផ្តើមឡើងកាលពីថ្ងៃទី១០ ខែមេសា ឆ្នាំ២០២៦ នៅពេលដែលកម្លាំងស្នងការដ្ឋាននគរបាលខេត្ត បានចុះអនុវត្តតាមសំណើអន្តរាគមន៍របស់ស្ថានទូតឥណ្ឌាប្រចាំកម្ពុជា។ សមត្ថកិច្ចបានរកឃើញទីតាំងសង្ស័យនៅជាន់ទី១ និងទី២ នៃអគារផ្សារទំនើបមណ្ឌលគិរី ស្ថិតក្នុងសង្កាត់ស្ពានមានជ័យ ក្រុងសែនមនោរម្យ។
ជាលទ្ធផល កម្លាំងចម្រុះបានរកឃើញជនបរទេសសរុបចំនួន ៣១០នាក់ (ស្រី ៥២នាក់) ដែលមានរហូតដល់ ១០សញ្ជាតិ ផ្សេងគ្នា រួមមាន៖ ចិន (១៣៥នាក់), ថៃ (៥៨នាក់), មីយ៉ាន់ម៉ា (២២នាក់), ឥណ្ឌា (៤០នាក់), នេប៉ាល់ (៣០នាក់), ប៉ាគីស្ថាន (១៥នាក់), រវ៉ាន់ដា (៥នាក់) និងសញ្ជាតិមួយចំនួនទៀត។នៅក្នុងប្រតិបត្តិការឆែកឆេរទីតាំងខាងលើ សមត្ថកិច្ចបានដកហូតសម្ភារៈភស្តុតាងជាច្រើនរួមមាន កុំព្យូទ័រលើតុ (All in one) ចំនួន ៤២០គ្រឿង ទូរស័ព្ទដៃចំនួន ១,៤៥០គ្រឿង។
ក្រុមឧក្រិដ្ឋជនទាំងនេះបានបែងចែកក្រុមការងារជាប្រព័ន្ធ ដោយមានគោលដៅឆបោកទៅលើជនរងគ្រោះនៅក្រៅប្រទេស រួមមានការក្លែងបន្លំលក់ទំនិញទៅកាន់ ប្រទេសថៃ និងការអូសទាញឱ្យវិនិយោគលើរូបិយបណ្ណឌីជីថល (Crypto) ទៅកាន់ សហរដ្ឋអាមេរិក ព្រមទាំងមានគោលដៅទៅកាន់ប្រទេសវៀតណាម និងឥណ្ឌាផងដែរ។
ផ្អែកលើភស្តុតាង និងចម្លើយសារភាព តំណាងអយ្យការបានសម្រេចចោទប្រកាន់លើជនសង្ស័យសំខាន់ៗចំនួន ៤រូប (ត្រូវបានឃាត់ខ្លួន) រួមមាន ១.ឈ្មោះ CHEN BINGLIAN (ជនជាតិចិន) ជាអ្នកគ្រប់គ្រងទូទៅ។ ២.ឈ្មោះ CHENG WEN CHONG (ជនជាតិចិន) អ្នកគ្រប់គ្រងបុគ្គលិកឥណ្ឌា និងប៉ាគីស្ថាន។ ៣.ឈ្មោះ HSU DARLI (ជនជាតិមីយ៉ាន់ម៉ា) អ្នកគ្រប់គ្រងជនជាតិមីយ៉ាន់ម៉ា។ ៤.ឈ្មោះ SITTICHAI SAELEE (ជនជាតិថៃ) អ្នកគ្រប់គ្រងជនជាតិថៃ។
ជនសង្ស័យទាំង ៤នាក់ខាងលើ ត្រូវបានចោទប្រកាន់ពីបទ «ឆបោកតាមប្រព័ន្ធបច្ចេកវិទ្យា» តាមមាត្រា ៥ នៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា។
ដោយឡែក ចំពោះជនសង្ស័យ ៣នាក់ផ្សេងទៀត និងបក្ខពួកដែលកំពុងគេចខ្លួន ត្រូវបានចោទប្រកាន់ពីបទ «រៀបចំ ឬដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា» តាមបញ្ញត្តិមាត្រា ៦ នៃច្បាប់ដដែល។
បច្ចុប្បន្ន សំណុំរឿងនេះកំពុងស្ថិតក្នុងដៃចៅក្រមស៊ើបសួរ ដើម្បីបន្តនីតិវិធីតាមផ្លូវច្បាប់ ខណៈដែលសមត្ថកិច្ចកំពុងបន្តស្រាវជ្រាវស្វែងរកចាប់ខ្លួនបក្ខពួកដែលនៅសេសសល់មកផ្តន្ទាទោសឱ្យខានតែបាន ៕
ចែករំលែកព័តមាននេះ