រាជធានីភ្នំពេញ ៖ កម្លាំងនគរបាលផ្នែកប្រឆាំងគ្រឿងញៀនស្រុកអង្គស្នួលសហការជាមួយកម្លាំងនគរបាលប៉ុស្តិ៍បែកចានបានធ្វើការចាប់ខ្លួនជនសង្ស័យចំនួន៥នាក់ ក្នុងនោះ២នាក់ជាអ្នកប្រើប្រាស់គ្រឿងញៀន និង២នាក់ទៀតជាអ្នកជួញដូរ ចំណែកម្នាក់ទៀតគឺជាអ្នកផ្ដល់ទីតាំងសម្រាប់ឲ្យជនសង្ស័យទាំង៤ចូលទៅសេពគ្រឿងញៀនជុំគ្នាផង និងជួញដូរផង។
ក្រៅពីក្របួចបានជនសង្ស័យ១សម្បុកនេះ នគរបាលក៏បានធ្វើការឆែកឆេរទីតាំងនោះហើយដកហូតបានវត្ថុតាងថ្នាំញៀន រួមទាំងសម្ភារៈពាក់ព័ន្ធមួយចំនួនទៀតផងដែរ។
ប្រតិបត្តិការចុះបង្ក្រាបនេះបានធ្វើឡើងកាលពីវេលាម៉ោង៧និង៤០នាទីព្រឹកថ្ងៃទី២២ ខែកុម្ភៈ ឆ្នាំ២០១៩ នៅក្នុងផ្ទះមួយកន្លែង ដែលមានទីតាំងស្ថិតនៅក្នុងភូមិបែកចាន ឃុំបែកចាន ស្រុកអង្គស្នួល ខេត្តកណ្តាល។
ជនសង្ស័យទាំង៥នាក់ខាងលើរួមមាន ១-ឈ្មោះថៃ ផេង ភេទប្រុស អាយុ៣៦ឆ្នាំ មុខរបរជួញដូរគ្រឿង
ញៀន មានទីលំនៅបច្ចុប្បន្ននៅក្នុងភូមិ បែកចាន ជាអ្នកផ្តល់ផ្ទះរបស់ខ្លួនធ្វើជាទីតាំងសម្រាប់ឲ្យបក្ខពួករបស់ខ្លួនប្រើប្រាស់គ្រឿងញៀន ២-ឈ្មោះស្រស់ វិឆ័យ ហៅ ឆៃ ភេទប្រុស អាយុ៣០ឆ្នាំ មុខរបរលក់កាហ្វេ មានទីលំនៅបច្ចុប្បន្ន ភូមិ ត្នោតម្តើម ឬត្នោត១ដើម ឃុំបែកចាន ស្រុកអង្គស្នួល ខេត្តកណ្តាល ជាមុខសញ្ញាជួញដូរគ្រឿងញៀន ដែលមានឈ្មោះនៅក្នុង បញ្ជីគ្រប់គ្រងរបស់នគរបាលផ្នែកប្រឆាំងគ្រឿងញៀនស្រុកអង្គស្នួលស្រាប់ ហើយកន្លងជននេះក៏ធ្លាប់ជាប់ពន្ធនាគារខេត្តកណ្តាលរយៈពេល២៥ថ្ងៃ ដោយសារគ្រឿងញៀនផងដែរ។
៣-ឈ្មោះ ឡាយ លីណា ហៅក្រោះ ភេទប្រុស អាយុ៣៦ឆ្នាំ មុខរបរមិនពិតប្រាក ស្នាក់នៅក្នុងភូមិអណ្តូង ឃុំបែកចានស្រុកអង្គស្នួល ខេត្តកណ្តាល ជាមុខសញ្ញាជួញដូរគ្រឿងញៀនមានឈ្មោះក្នុងបញ្ជីគ្រប់គ្រងមុខសញ្ញារបស់នគរបាលប៉ុស្តិ៍បែកចាន ៤-ឈ្មោះ ជិន សំណាងភេទប្រុស អាយុ៣៥ឆ្នាំ មុខរបរសន្តិសុខរោងចក្រ មានស្រុកកំណើតនៅក្នុងភូមិញ៉េងញ៉ង ឃុំអូរស្ងើន ស្រុកត្រាំកក់ ខេត្តតាកែវ បច្ចុប្បន្នស្នាក់នៅក្នុងភូមិ បែកចានឃុំបែកចាន ស្រុកអង្គស្នួលខេត្តកណ្តាល ជាអ្នកប្រើប្រាស់ និង ៥-ឈ្មោះ ម៉ៅ ពេជ្រពន្លឺ ភេទប្រុស អាយុ៣៤ឆ្នាំ មុខរបរសន្តិសុខរោងចក្រ មានទីលំនៅ ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ បច្ចុប្បន្នស្នាក់នៅ ក្នុងភូមិបែកចានឃុំបែកចាន ស្រុកអង្គស្នួលខេត្ត កណ្តាល ជាអ្នកប្រើប្រាស់។
ចំណែកវត្ថុតាងដែលសមត្ថកិច្ចដកហូតបានរួមមានថ្នាំញៀនចំនួន៣កញ្ចប់ ក្នុងនោះកញ្ចប់ធំចំនួន២កញ្ចប់ និងកញ្ចប់មធ្យម០១កញ្ចប់ ជញ្ជីងសម្រាប់ថ្លឹងថ្នាំញៀនចំនួន១គ្រឿង ទូរស័ព្ទដៃ២គ្រឿង ម៉ាកណូកគាចុចពិល កញ្ចប់បារីសម្រាប់ដាក់ថ្នាំញៀន១ ព្រមទាំងឧបករណ៏សម្រាប់ប្រើប្រាស់ថ្នាំញៀនមួយចំនួន និងកាបូបពណ៌ខ្មៅមួយ ។
នគរបាលបាននិយាយថា កម្លាំងនគរបាលប៉ុស្តិ៍រដ្ឋបាលបែកចាន បានទទួលព័ត៌មានពីប្រជាពលរដ្ឋថា នៅផ្ទះជនសង្ស័យឈ្មោះថៃ ផេង នៅភូមិបែក ចាន មានលក់ថ្នាំញៀននិងកំពុងប្រមូលផ្ដុំគ្នាជក់ថ្នាំញៀន។ ភ្លាមនោះកម្លាំងប៉ុស្តិ៍រដ្ឋបាលបានសហការជាមួយកម្លាំងផ្នែកប្រឆាំងគ្រឿងញៀនស្រុក ក្រោមការដឹកនាំដោយលោកយាន់ ចាន់ អធិការរងនគរបាលស្រុកក្រោមបញ្ជារបស់លោកមាន សំណាង អធិការនគរបាលស្រុក បានចុះដល់កន្លែង កើតហេតុ ។
បន្ទាប់មកបានធ្វើការឃាត់ខ្លួនជនសង្ស័យទាំង៥នាក់ ដែលកំពុងសម្ងំសេពថ្នាំញៀននៅក្នុងផ្ទះនោះ បន្ទាប់មកបានធ្វើការឆែកឆេរនៅក្នុងផ្ទះរកឃើញវត្ថុតាងដូចការរៀបរាប់ខាងលើ ហើយកម្លាំងនគរបាលបានដកហូតព្រមទាំងនាំជនសង្ស័យទៅសាកសួរនៅប៉ុស្តិ៍។
ប្រភពដដែលបានបន្តថា ពេលនោះជនសង្ស័យឈ្មោះថៃ ផេង បានឆ្លើយសារភាពថា នៅវេលាម៉ោងប្រហែលជាង៧ព្រឹកថ្ងៃទី២២ ខែកុម្ភៈ ឈ្មោះ ស្រស់ វិឆ័យ បានបបួលខ្លួននិងឈ្មោះឡាយ លីណា ហៅក្រោះ ចូលទៅជក់ថ្នាំញៀននៅក្នុងបន្ទប់ ចំណែកឈ្មោះ ជិន សំណាង និងឈ្មោះម៉ៅ ពេជ្រពន្លឺ នៅក្រៅផ្ទះ នៅពេលពួកខ្លួនទាំង៣នាក់ រៀបចំជក់ថ្នាំញៀន ស្រាប់តែសមត្ថកិច្ចនគរបាលទៅដល់ ឃាត់ខ្លួនតែម្តង។
ចំណែកជនសង្ស័យឈ្មោះ វិឆ័យ បានឆ្លើយសារភាពថា ថ្នាំញៀនទាំងនេះជារបស់ខ្លួន ដែលបានទិញពីបុរសមិនស្គាល់ឈ្មោះ ម្នាក់នៅម្ដុំផ្សារជម្ពូវន័ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ជាអ្នកយកមកលក់ឲ្យខ្លួនទុកលក់បន្ត និងប្រើប្រាស់ខ្លួនឯងផង។ រីឯជនសង្សយ័ឈ្មោះ ជិន សំណាង និងឈ្មោះម៉ៅ ពេជ្រពន្លឺ បានឆ្លើយសារភាពថា នៅវេលាយប់ថ្ងៃទី២១ ខែកុម្ភៈ ឆ្នាំ២០១៩ ខ្លួន បានប្រើប្រាស់ថ្នាំញៀន ជាមួយឈ្មោះ ថៃ ផេង ដែលជាម្ចាស់ផ្ទះផងដែរ ហើយធ្លាប់ប្រើប្រាស់ថ្នាំញៀន ជាច្រើនខែមកហើយដែរ ។
បច្ចុប្បន្ន ជនសង្ស័យទាំង៥នាក់ខាងលើ ត្រូវបានសមត្ថកិច្ចកសាងសំណុំរឿងដើម្បីចាត់ការតាមនីតិវិធី ៕
ចែករំលែកព័តមាននេះ