ខេត្តកណ្តាល ៖ បុរសជាមេការសំណង់ម្នាក់ត្រូវកម្មករសំណង់ផឹកស្រវឹងកាប់២ពូថៅរបួសយ៉ាងដំណំ ខណៈពេលមេការរូបនេះចូលទៅឃាត់កុំឱ្យស្រែកឡូឡាពេលយប់ ហើយត្រូវកម្មករដូចគ្នាព័ទ្ធចាប់ខ្លួនបានភ្លាមៗកាលពីវេលាម៉ោង១១យប់ ថ្ងៃទី៣ កញ្ញា ២០១៣ នៅការដ្ឋានសំណង់ស្ថិតក្នុងភូមិព្រែកសំរោងទី១ សង្កាត់តាខ្មៅ ក្រុងតាខ្មៅ។
ប៉ូលិសព្រហ្មទណ្ឌក្រុងតាខ្មៅបានឱ្យដឹងថា ជនសង្ស័យដែលត្រូវចាប់ខ្លួនពីបទហិង្សាឈ្មោះអ៊ូ សុខហឿន ភេទប្រុស អាយុ២៣ឆ្នាំ មានស្រុកកំណើតនៅភូមិស្រែវាល ឃុំស្រែវាល ស្រុកស្ទឹងត្រង់ ខេត្តកំពង់ចាម ជាកម្មករសំណង់ស្នាក់នៅភូមិកើតហេតុ។ ចំណែកជនរងគ្រោះជាមេការសំណង់ឈ្មោះឡុញ សុភាព ភេទប្រុស អាយុ២៣ឆ្នាំ ស្នាក់នៅភូមិកើតហេតុ ត្រូវជនសង្ស័យកាប់ត្រូវស្មាខាងស្តាំ និងកំភួនដៃខាងស្តាំ។
បច្ចុប្បន្នជនសង្ស័យត្រូវបានបញ្ជូនទៅកាន់អធិការដ្ឋាននគរបាលក្រុងតាខ្មៅដើម្បីកសាងសំណុំរឿងចាត់ការតាមផ្លូវច្បាប់៕
ចែករំលែកព័តមាននេះ