អភិបាលខេត្តខេត្តប៉ៃលិន ត្រៀមបង្កើតស្លាកសញ្ញាសម្គាល់ទុរេនប៉ៃលិន និងជំរុញឱ្យកសិករប្រែក្លាយចម្ការទៅជាតំបន់កសិទេសចរណ៍
- ប៉ៃលិន
ខេត្តប៉ៃលិន ៖ លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន នាថ្ងៃទី៣១ ខែឧសភា ឆ្នាំ២០២៦ បានអញ្ជើញចុះពិនិត្យមើលស្ថានភាពការប្រមូលផលផ្លែទុរេនរបស់កសិករ នៅសង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដើម្បីត្រៀមបង្កើតស្លាកសញ្ញាសំគាល់អត្តសញ្ញាណដែលបញ្ជាក់ពីប្រភពដើម ថាជាផលិតផលរបស់ខេត្តប៉ៃលិន ក្នុងការផ្គត់ផ្គង់ទីផ្សារក្នុងស្រុក និងការនាំចេញ ខណៈពេលដែលឆ្នាំ២០២៦នេះ ទីផ្សារហាក់ដូចជាល្អប្រសើរជាងឆ្នាំមុនៗ។
លោកជំទាវបណ្ឌិត បាន ស្រីមុំ បានមានប្រសាសន៍លើកឡើងថា៖ បច្ចុប្បន្នរាជរដ្ឋាភិបាលកកម្ពុជា ដែលមាន សម្តេច មហាបវរធិបតី ហ៊ុន ម៉ាណែត ជានាយករដ្ឋមន្ត្រី បានជំរុញឱ្យមន្ត្រីជំនាញធ្វើការបណ្តុះបណ្តាលដល់សហគមន៍ ឬបណ្តុំកសិករ ដោយផ្តល់អ្នកជំនាញការទៅបណ្តុះបណ្តាលដល់មូលដ្ឋានផ្ទាល់តែម្តង ពោលគឺធ្វើយ៉ាងណា ឱ្យការដាំដុះរបស់ប្រជាកសិករទទួលបានទិន្នផលខ្ពស់ ចំណាយលើការផលិតតិច និងមានសុវត្ថិភាព ដល់អ្នកប្រើប្រាស់ ក៏ដូចជាអ្នកដាំដុះផ្ទាល់ ព្រមទាំងបង្កើតស្លាកសញ្ញាសំគាល់អត្តសញ្ញាណដែលបញ្ជាក់ពីប្រភពដើម ថាជាផលិតផលរបស់ខេត្តប៉ៃលិនផ្ទាល់ ឱ្យសមស្របទៅតាមតម្រូវការទីផ្សារក្នុងស្រុក និងនាំចេញទៅក្រៅប្រទេសផងដែរ។
លោកអភិបាលបណ្ឌិតអភិបាលខេត្ត បានមានប្រសាសន៍ណែនាំដល់ម្ចាស់ចំការទុរេនដែរថា ធ្វើយ៉ាងណាត្រូវឱ្យធ្វើការប្រែក្លាយចំការ ទុរេនទាំងអស់ ទៅជាតំបន់កសិទេសចរណ៍ (Agrotourism) គឺជាជម្រើសថ្មីដ៏ល្អបំផុតមួយ ដើម្បីបង្កើនប្រាក់ចំណូលក្រៅពីរដូវប្រមូលផល ពីព្រោះមិនត្រឹមតែលក់ផ្លែឈើប៉ុណ្ណោះទេ ថែមទាំងអាចឲ្យម្ចាស់ចំការផ្តល់នូវបទពិសោធន៍ផ្ទាល់ ជូនដល់ភ្ញៀវទេសចរ ដូចជាការដើរទស្សនាក្នុងចំការ ការភ្លក្សរសជាតិ ទុរេនស្រស់ៗ កន្លែងលេងកម្សាន្តធម្មជាតិ និងការស្នាក់នៅបែបធម្មជាតិផងដែរ។
ដើម្បីជាការលើកទឹកចិត្ត លោកជំទាវបណ្ឌិត បាន ស្រីមុំ ក៏បានជួយទិញផ្លែទុរេនរបស់បងប្អូនកសិករ ព្រមទាំងជំរុញឱ្យពួកគាត់បង្កើនការដាំដុះបន្លែផ្លែឈើសរីរាង្គឱ្យបានច្រើនតាមដែលអាចធ្វើទៅបាន ដើម្បីលើកកម្ពស់ជីវភាពក្នុងគ្រួសារ និងផ្គត់ផ្គង់តម្រូវការ ទីផ្សារទាំងក្នុងខេត្ត និងក្រៅខេត្ត ជាពិសេសការនាំចេញទៅក្រៅប្រទេស ហើយក្នុងករណីមានបញ្ហាទីផ្សារ សូមទំនាក់ទំនងមក កាន់ក្រុមការងារ លោកជំទាវនឹងជួយរកទីផ្សារជូនប្រជាពលរដ្ឋក្នុងខេត្តទាំងអស់ផងដែរ ៕
ចែករំលែកព័តមាននេះ