គណៈបញ្ជាការឯកភាពខណ្ឌចំការមន ឆែកឆេររដ្ឋបាល ២ទីតាំង រកឃើញជនជាតិឥណ្ឌូនេស៊ី ៨នាក់ ជាបុរស គ្មានលិខិតឆ្លងដែន និងហួសទិដ្ឋាការ ។
រដ្ឋបាលខណ្ឌចំការមន បានប្រកាសនាល្ងាចថ្ងៃទី៣០ ខែឧសភានេះថា ៖ នៅថ្ងៃទី៣០ ខែឧសភា ឆ្នាំ២០២៦ គណៈបញ្ជាការឯកភាពរដ្ឋបាលខណ្ឌចំការមនដឹកនាំដោយ លោក កៀង ល័ក្ស អភិបាល នៃគណៈអភិបាលខណ្ឌចំការមន និងជាប្រធានគណៈបញ្ជាការឯកភាពរដ្ឋបាលខណ្ឌចំការមន ដោយមានការសម្របសម្រួលនីតិវិធីផ្លូវច្បាប់ពី លោក ញ៉ាន បូរី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះត្រួតពិនិត្យរដ្ឋបាលចំនួន០២ទីតាំង ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយមានសមាសភាពចូលរួមពីមន្ត្រីពាក់ព័ន្ធ ។
រដ្ឋបាលខណ្ឌចំការមន បានបន្តថា ជាលទ្ធផល ក្រុមការងារចម្រុះរកឃើញអ្នកស្នាក់នៅសរុបចំនួន៤៣នាក់ ស្រី១៥នាក់ មាន ០៥សញ្ជាតិ (ក្នុងនោះជនជាតិឥណ្ឌូនេស៊ី ចំនួន០៨នាក់ប្រុស (ពុំមានលិខិតឆ្លងដែន និងហួសទិដ្ឋាការស្នាក់នៅ) បញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីចំពោះទីតាំងទាំង០២ខាងលើ ពុំបានរកសម្ភារពាក់ព័ន្ធសង្ស័យបម្រើការឱ្យបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ។
ចែករំលែកព័តមាននេះ