តាមប្រភពពីOddity Central បានឱ្យដឹងថា សត្វឆ្កែញីមួយក្បាលបានជាប់នៅលើទំព័រកាសែតដោយសារតែកើតមកមានលក្ខណៈខុសគ្នាខ្លាំងពីឆ្កែដទៃ ដោយសារវាមានមាត់មួយទៀតនៅស្លឹកត្រចៀកខាងស្តាំ ។
Toad ដែលជាឆ្កែប្រភេទ Pitbull ញី អាយុ៥ឆ្នាំ មានបញ្ហាពីកំណើតមកទៅលើការលូតលាស់ផ្នែកក្បាល ដែលមានមាត់ទីពីរនៅត្រង់ត្រចៀកខាងស្តាំ រួមជាមួយនឹងធ្មេញនិងក្រពេញទឹកមាត់។ ត្រចៀករបស់វាមានតែម្ខាងទេ ដោយសារតែខាងស្តាំក្លាយទៅជាមាត់បាត់ទៅហើយ។
ឆ្កែដ៏ចម្លែកមួយក្បាលនេះ បានធ្វើឱ្យមានការភ្ញាក់ផ្អើលដល់បុគ្គលិកនៅមណ្ឌលសត្វចិញ្ចឹម Oklahoma City ដោយសារតែគេឃើញមានធ្មេញដុះនៅក្នុងត្រចៀកខាងស្តាំ។ ពេលគេពិនិត្យមើលឱ្យបានច្បាស់លាស់ទៅ ទើបឃើញថា វាគឺជាមាត់ពេញលេញ ដោយសារតែមានក្រពេញទឹកមាត់ និង ធ្មេញជាច្រើនទៀតដុះនៅខាងក្នុង។
ត្រចៀករបស់វាខាងស្តាំមិនអាចស្តាប់ឮនោះទេ ដោយសារតែវាគឺជាមាត់ ។ វាតែងតែមានទឹកមាត់ហូរចេញមកតាមហ្នឹងជានិច្ច ដែលតម្រូវឱ្យអ្នកមើលថែជូតចេញជាប្រចាំ ។ មាត់ទីពីររបស់វា ថ្វីបើមានធ្មេញនិងក្រពេញទឹកមាត់មែន តែវាមិនអាចប្រើការបានទេ ដោយសារតែគ្មានថ្គាម និង ឆ្អឹងទ្រទ្រង់។ និយាយឱ្យចំទៅ គឺខាតអស់ត្រចៀកម្ខាង ដែលជំនួសដោយមាត់មិនបានការ។
គេបានដកធ្មេញរបស់វាចេញពីក្នុងត្រចៀក ដោយសារតែវាធ្វើឱ្យ Toad ឈឺមិនបាត់។ ពេលនេះគឺសល់
តែធ្មេញពីរខាងក្រៅទេ ដែលមិនអាចដកបាន ព្រោះមានឬសជាប់ទៅនឹងឆ្អឹងលលាដ៍ក្បាល។ ថ្វីដ្បិតតែ Toad កើតមកខុសគេក៏ដោយ អ្នកមើលថែវានៅតែស្រឡាញ់និងអាណិតវាមិនប្រែឡើយ ៕
ចែករំលែកព័តមាននេះ