ខេត្តស្ទឹងត្រែង ៖ ជនជាតិដើមភាគតិចព្រៅ នៅភូមិកាតូត ឃុំកំភុន ស្រុកសេសានខេត្តស្ទឹងត្រែង បាននាំគ្នាសែនព្រេនឡើងអ្នកតាភ្នំ សុំសេចក្តីសុខ បង្ហាញពីប្រពៃណី ទំនៀមទម្លាប់របស់ខ្លួន…
ខេត្តស្ទឹងត្រែង ៖ ជនជាតិដើមភាគតិចព្រៅ នៅភូមិកាតូត ឃុំកំភុន ស្រុកសេសានខេត្តស្ទឹងត្រែង បាននាំគ្នាសែនព្រេនឡើងអ្នកតាភ្នំ សុំសេចក្តីសុខ បង្ហាញពីប្រពៃណី ទំនៀមទម្លាប់របស់ខ្លួន ។ ម្យ៉ាងពិធីនេះដើម្បីឲ្យកូនចៅជំនាន់ក្រោយបានស្គាល់ និងជួយបន្តអភិរក្ស ។
ក្នុងពិធីសែនអ្នកតាភ្នំ កាលទី១៣ កុម្ភៈឆ្នាំ២០១៩ លោកតាទាង ប៊ុនណាត អាយុ៧៨ឆ្នាំជាមេកន្ទ្រាញបានដឹកនាំពិធីសែន ។ គាត់បានថ្លែងថា៖«ពិធីសែនអ្នកតាភ្នំនេះបងប្អូនជនជាតិព្រៅ ក្នុងភូមិសុំឱ្យមានសេចក្តីសុខចម្រើនកូនចៅរស់នៅក្នុងភូមិកុំឱ្យកើតជម្ងឺឈឺថ្កាត់ ។
ទោះបីថាផ្នែកសម្ភារ សម្លៀកបំពាក់ ភាសា ត្រូវបានប្រែក្លាយអស់ទៅហើយក៏ដោយ តែពិធីសែនព្រេននេះមិនបោះបង់ទេ ។ តាំងពីឆ្នាំ១៩៩០មក បងប្អូនជនជាតិមួយចំនួនបានបែងចែកភូមិទៅរស់នៅ ផ្សេងៗពីគ្នា តែការគោរពប្រពៃណីរបស់ជនជាតិ ព្រៅ ព្នង កួយទំពួន ចារាយ ស្ទៀង គ្រឹង បានធ្វើពិធីនេះដូចគ្នា»។
លោកតាទាង ប៊ុនណាត បន្តថា«ក្នុងមួយឆ្នាំមាន២ដង ហើយខែមាឃនេះថ្ងៃ៩កើត១ដង ខែពិសាខម្តង ធ្វើស្រែធ្វើចម្ការបានសុខសាន្ត ក្នុងភូមិករ តាំងពីជ្រូកមាន់ទាអី គោក្របីឱ្យសុខសាន្ត ។ បើយើងមិនធ្វើទេវាអន្តរាយ អាហ្នឹងជំនឿណាគឺគោរពអញ្ចឹងតែម្តង ហើយបើសិនជាខ្ញុំឧទាហរណ៍ថាវាអស់និស្ស័យហើយមានតដល់អំបូរចាស់ទុំ បន្តៗទៀត អត់ចេះបាត់ទេ តែប៉ុណ្ណឹងអត់ឱ្យបាត់ទេប្រពៃណី »។
លោកឡឹង សុន ជនជាតិព្រៅនៅភូមិកាតូតបានលើកឡើងថាពិធីនេះមិនខុសពីជនជាតិខ្មែរធ្វើបុណ្យចូលឆ្នាំទេ តែជនជាតិភាគតិចមិនបានទៅធ្វើនៅវត្ត មកធ្វើនៅរោងអ្នកតាជាទីកន្លែងគោរពបូជា ។ លើកនេះក៏ដូចសព្វដងដែរ មេកន្ទ្រាញតែងកោះហៅទាំងក្មេងចាស់ប្រុសស្រី ប្រមូលគ្នាយកអាហារ នំចំណី មកជួបជុំសែនព្រេន នៅចំពោះមុខអ្នកតាភ្នំ ។ មានមាន់ អង្ករ បង្អែម អន្សម យកថ្វាយអារក្ស អ្នកតា ដើម្បីជួយថែឱ្យបានសុខសប្បាយទាំងអស់គ្នា ។
អ្នកស្រីវេង សារឿន និយាយថា «កូនចៅជនជាតិមិនដែលមើលរំលងប្រពៃណីទេ តែងគោរពតាមចាស់ទុំដឹកនាំ ធ្វើពិធីសែនព្រេនជារៀងរាល់ឆ្នាំ ព្រោះនិយមថាពេលធ្វើហើយទទួលបានសេចក្តីសុខចម្រើន ក្នុងការរស់នៅ និងដំណាំ ផ្សេងៗដាក់ចុះដុះឡើងបានផ្លែផ្កា »។
ជនជាតិភាគតិចធ្វើពិធីសែនទៅតាមអំបូររៀងៗខ្លួនដូចជា សែនឡើងអ្នកតាភ្នំសុំសុខចម្រើន ។ សែនស្រូវឡើងជង្រុកទុកភោគផលឱ្យគង់វង្ស ។ សែនប្រយុងស្រែឱ្យអ្នកតាជួយការពាកុំឱ្យមានសត្វចង្រៃយាយី ។ សែនលាបំណន់សងកុំឱ្យមានជាប់ជំពាក់បំណុលជាដើម ៕
ចែករំលែកព័តមាននេះ