ខេត្តមណ្ឌលគិរី ៖ បន្ទាប់ពីការចេញផ្សាយលើសារព័ត៌មានកោះសន្តិភាពមួយឈុតកាលពីព្រឹកថ្ងៃទី១៣ ខែកុម្ភៈ ឆ្នាំ២០១៩ ពីភាពមិនប្រក្រតីករណីមានអ្នកកេងប្រវ័ណ្ឌដីចម្ការស្រល់រាប់រយហិចតានៅស្រុកអូររាំង ស្រាប់តែបែកធ្លាយព័ត៌មានបន្ថែមដែលជាប់ពាក់ព័ន្ធជាមួយអ្នកទិញ និងអ្នកលក់ដីរដ្ឋ ខ្លះជាមន្ត្រីសាលាស្រុក ខ្លះមានងារជាឧកញ៉ា…។…
ខេត្តមណ្ឌលគិរី ៖ បន្ទាប់ពីការចេញផ្សាយលើសារព័ត៌មានកោះសន្តិភាពមួយឈុតកាលពីព្រឹកថ្ងៃទី១៣ ខែកុម្ភៈ ឆ្នាំ២០១៩ ពីភាពមិនប្រក្រតីករណីមានអ្នកកេងប្រវ័ណ្ឌដីចម្ការស្រល់រាប់រយហិចតានៅស្រុកអូររាំង ស្រាប់តែបែកធ្លាយព័ត៌មានបន្ថែមដែលជាប់ពាក់ព័ន្ធជាមួយអ្នកទិញ និងអ្នកលក់ដីរដ្ឋ ខ្លះជាមន្ត្រីសាលាស្រុក ខ្លះមានងារជាឧកញ៉ា…។
សេចក្តីរាយការណ៍បានឲ្យដឹងថា លោក នង ទុណ្ណារី អភិបាលស្រុកអូររាំង ត្រូវបានមហាជនចោទប្រកាន់ថា ជាអ្នកឃុបឃិតគ្នាជាមួយឧកញ៉ាម្នាក់នៅរាជធានីភ្នំពេញដែលល្បីខាងជំនួញដីធ្លី ដើម្បីយកដីចម្ការស្រល់ប្រមាណជិត១០០ហិកតា កាលពីចុងឆ្នាំ២០១៨ ធ្វើជាកម្មសិទ្ធិតាមរូបភាពញុះញង់ប្រជាពលរដ្ឋជាអ្នកចេញមុខផ្តិតមេដៃលក់ដីនេះឲ្យខ្លួន ។
ទាក់ទិនបញ្ហានេះលោក ស្វាយ សំអ៊ាង អភិបាលខេត្តមណ្ឌលគិរីមានប្រសាសន៍ថា «ពាក់ព័ន្ធទៅនឹងបញ្ហានេះ លោកទើបនឹងទទួលបានព័ត៌មាន។ ហើយក្រោយពីទទួលបានព័ត៌មានលោកបានបញ្ជាទៅមន្ទីរកសិកម្ម ហើយនិងរដ្ឋបាលព្រៃឈើខេត្ត ដែលមានមុខងារមើលលើការងារទាំងនោះ…។ លោកថា ចម្ការស្រល់នេះ យើងដឹងទាំងអស់គ្នាហើយថា គឺជាការដាំរបស់ក្រសួងកសិកម្ម រុក្ខាប្រមាញ់ និងនេសាទ ដោយខាងទាហានខេត្តមណ្ឌលគិរី ជាអ្នកទទួលថវិកាពីក្រសួងយកមកធ្វើការដាំដើមស្រល់ទាំងអស់នេះ។
ក្រោយមក មានការប្រគល់ឲ្យរដ្ឋបាលព្រៃឈើ និងកសិកម្មមណ្ឌលគិរី ជាអ្នកមើលថែ។ ដូច្នេះបញ្ហានេះ មានខាងកសិកម្ម មានខាងរដ្ឋបាលព្រៃឈើ ជាអ្នកទទួលខុសត្រូវរាល់ការលក់រាល់ការបញ្ជាក់នៃការទិញយ៉ាងម៉េច ទាល់តែមានការឯកភាពពីក្រសួងកសិកម្ម និងរដ្ឋបាលព្រៃឈើ»។
លោកអភិបាលខេត្តបញ្ជាក់ថា «បើមិនអញ្ចឹងទេ វាពាក់ព័ន្ធទៅនឹងការគ្រប់គ្រងការចុះបញ្ជីរបស់រដ្ឋបាលព្រៃឈើថ្នាក់កណ្តាល ដូច្នេះហើយបានជាលោកបញ្ជាឲ្យក្រុមការងារខាងលើ ធ្វើការស្រាវជ្រាវពិនិត្យមើលទំហំផ្ទៃដី ដែលពាក់ព័ន្ធទាំងអស់វិញ។ ហើយឥឡូវឯកសារយ៉ាងណា គឺខាងកសិកម្មគេកំពុងតែធ្វើការនេះហើយ។ លោកមិនគាំទ្រអ្នកដែលទៅទិញទៅផ្ទេរទិញលក់ដីនេះ វានាំឲ្យយូរៗទៅលែងមានដីបម្រុងរបស់រដ្ឋហើយ វាទៅជាដីកម្មសិទ្ធិឯកជន ហើយនាំឱ្យខូចដល់ដើមស្រល់ដែលខំដាំតាំងពីយូរណាស់មកហើយ»។
មហាជនរង់ចាំមើលថា តើអាជ្ញាធរខេត្តមណ្ឌលគិរីអាចវែកមុខមន្ត្រីខិចខូច ឬអ្នកពាក់ព័ន្ធលក់ដីរដ្ឋបានដែរទេ? ព្រោះសកម្មភាពជីកដាំបង្គោលថ្មធ្វើជាព្រំដី មិនមែនប្រើខ្យល់ទៅធ្វើបានឡើយ មានទាំងរថយន្តតូចធំ មនុស្សជាច្រើននាក់ដឹកយកទៅបោះកំណត់ព្រំរៀងៗខ្លួន។ ជាងនេះទៀតសោតមិនត្រឹមតែដីចម្ការស្រល់នៅឆ្ងាយៗពីភូមិនោះទេ ដែលគេព័ទ្ធយក សូម្បីដីស្រល់នៅអមសងខាងផ្លូវជាតិលេខ៧៦ មុខបន្ទាយទាហានស្រុកអូររាំង ក៏ត្រូវគេលេបយកទាំងកម្រោលដែរ ជាពិសេសដីនៅជិតផ្ទះលោកអភិបាលស្រុកតែម្តង៕
ចែករំលែកព័តមាននេះ