ខេត្តព្រះសីហនុ ៖ គ្រោះថ្នាក់ចរាចរណ៍រវាងម៉ូតូមួយគ្រឿងបុកពីក្រោយម៉ូតូមួយគ្រឿងទៀត បណ្តាលឱ្យមនុស្សម្នាក់រងរបួសធ្ងន់ និងមនុស្សម្នាក់ទៀតរងរបួសស្រាល ដែលហេតុការណ៍នេះបានកើតឡើងកាលពីវេលាម៉ោង១និង១៥នាទីរសៀលថ្ងៃទី១២ កុម្ភៈ ឆ្នាំ២០១៩ តាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ១៧៩-១៨០ ត្រង់ចំណុចមុខក្លោងទ្វារចូលវត្តវាលមាស ភូមិវាសមាស ឃុំវាលរឹញ ស្រុកព្រៃនប់ខេត្តព្រះសីហនុ ។
ភាគីម៉ូតូមួយគ្រឿងម៉ាកវ៉េវ ពណ៌ក្រហម គ្មានស្លាកលេខ បើកបរដោយឈ្មោះ សួយ សាន្ត ភេទប្រុស អាយុ៥៣ឆ្នាំ មានទីលំនៅភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ បានរងរបួសស្រាល ។ ចំណែកម៉ូតូមួយគ្រឿងទៀតម៉ាកហុងដា ធុនសេ១២៥ ពណ៌ខ្មៅ ពាក់ស្លាកលេខ ព្រះសីហនុ ១B-៥៨៥៤ អ្នកបើកបរឈ្មោះ ប្រាក់ កក់ ភេទប្រុស អាយុ៥៤ឆ្នាំ មុខរបររត់ម៉ូតូឌុប មានទីលំនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ រងរបួសបាក់ជើង ។
តាមប្រភពព័ត៌មានបានឱ្យដឹងថា មុនពេលកើតហេតុ គេឃើញបុរសម្នាក់បើកបរម៉ូតូមួយគ្រឿងម៉ាកវ៉េវ លុះមកដល់ចំណុចកើតហេតុខាងលើបានបុកពីក្រោយម៉ូតូមួយគ្រឿងទៀតម៉ាកហុងដាដែលកំពុងឈប់ចតលើចិញ្ចើមថ្នល់ បណ្តាលឲ្យអ្នកបើកបរម៉ូតូម៉ាកហុងដារងរបួសបាក់ជើង ត្រូវបានកំលាំងកងរាជអាវុធហត្ថស្រុកព្រៃនប់ជួយដឹកបញ្ជូនមកសង្គ្រោះនៅគ្លីនិកឯកជនមួយកន្លែង ។ ចំណែកអ្នកបើកបរម៉ូតូម៉ាកវ៉េវបានរងរបួសស្រាល ៕
ចែករំលែកព័តមាននេះ