ខេត្តស្វាយរៀង ៖ មន្ត្រីសាខាកាំកុងត្រូលខេត្តស្វាយរៀងសហការជាមួយមន្ទីរពាណិជ្ជកម្មខេត្ត និងគណៈកម្មការផ្សារបានចុះត្រួតពិនិត្យទំនិញជាច្រើនមុខដោយផ្តោតសំខាន់ទៅលើគ្រឿងឧបភោគបរិភោគប្រចាំថ្ងៃ ស្រាប់តែរកងៀតបបែល និងស្ពៃជ្រក់មានផ្ទុកសារធាតុអាស៊ីតសាលីស៊ីលិក កាលពីព្រឹកថ្ងៃទី១១ ខែកុម្ភៈ ឆ្នាំ២០១៩នេះ នៅចំណុចផ្សារវាលយន្តក្រុងស្វាយរៀង។
លោក ផឹង និល ប្រធានសាខាកាំកុងត្រូលខេត្តស្វាយរៀងបានឲ្យដឹងថា មន្ត្រីជំនាញបានធ្វើTest Kits គំរូបឋមចំនួន១២មុខទំនិញ ជាលទ្ធផលក្រោយការចុះអនុវត្តការងារ មន្ត្រីបានរកឃើញសារធាតុគីមី ដែលដាក់ក្នុងមុខទំនិញងៀតបបែលចំនួន៥,៥គីឡូក្រាម និងស្ពៃជ្រក់ចំនួន៦គីឡូក្រាម មានសារធាតុអាស៊ីតសាលីស៊ីលិក (salicylic acid) ដែលវាអាចបំផ្លាញក្រពះ ពោះវៀនយ៉ាងធ្ងន់ធ្ងរ។
ក្រោយពីរកឃើញ មន្ត្រីជំនាញបានយកទៅដុតកម្ទេចចោល ក្នុងនោះមន្ត្រីកាំកុងត្រូលក៏បានពិនិត្យមើលកាលបរិច្ឆេទទៅលើមុខទំនិញដែលដាក់តាំងលក់នៅតាមបណ្តាតូបនានាក្នុងផ្សារវាលយន្ត ព្រមទាំងចុះទៅពិនិត្យមុខទំនិញនៅកន្លែងតាំងពិព័រណ៌ពាណិជ្ជកម្មថៃ នៅក្រុងស្វាយរៀងផងដែរ។
ជាមួយគ្នានោះលោកប្រធានកាំកុងត្រូលខេត្តស្វាយរៀងក៏បានអំពាវដល់ប្រជាពលរដ្ឋទាំងអស់ សូមមានការប្រុងប្រយ័ត្នចំពោះការបរិភោគចំណីអាហារ ត្រូវពិនិត្យមើលស្លាកសញ្ញាកាលបរិច្ឆេទឲ្យបានច្បាស់លាស់ មុនទិញយកទៅបរិភោគដើម្បីចូលរួមលើកកម្ពស់សុខុមាលភាពទាំងអស់គ្នា ហើយមន្ត្រីកាំកុងត្រូលបានសន្យានឹងបន្តចុះពិនិត្យទំនិញនៅតាមផ្សារនានានៅក្នុងខេត្តស្វាយរៀង ឲ្យបានញឹកញាប់បន្ថែមទៀតផងដែរ៕
ចែករំលែកព័តមាននេះ