អាល្លឺម៉ង់ ៖ ភ្នាក់ងារសារព័ត៌មាន Reuters បានឲ្យដឹងកាលពីថ្ងៃចន្ទ មកថាការសិក្សាមួយបានឲ្យដឹងថាការងារប្រមាណ ៦០០,០០០ កន្លែងជុំវិញពិភពលោកនឹងអាចត្រូវបានបាត់បង់ ប្រសិនបើប្រទេសអង់គ្លេសចាកចាញពីសហភាពអឺរ៉ុប (EU)…
អាល្លឺម៉ង់ ៖ ភ្នាក់ងារសារព័ត៌មាន Reuters បានឲ្យដឹងកាលពីថ្ងៃចន្ទ មកថាការសិក្សាមួយបានឲ្យដឹងថាការងារប្រមាណ ៦០០,០០០ កន្លែងជុំវិញពិភពលោកនឹងអាចត្រូវបានបាត់បង់ ប្រសិនបើប្រទេសអង់គ្លេសចាកចាញពីសហភាពអឺរ៉ុប (EU) ដោយមិនមានកិច្ចព្រមព្រៀងច្បាស់លាស់ ដោយមានប្រទេសអាល្លឺម៉ង់ទទួលរងការប៉ះពាល់ខ្លាំងជាងគេផងដែរ ។
អ្នកស្រាវជ្រាវនៅវិទ្យាស្ថាន IWH នៅប៉ែកខាងកើតនៃអាល្លឺម៉ង់បានឲ្យដឹងថា ប្រសិនបើការនាំចេញរបស់ EU ទៅកាន់អង់គ្លេសធ្លាក់ចុះ ២៥% បន្ទាប់ពី Brexit នៅការងារប្រមាណ ១០៣,០០០កន្លែងនឹងជួបហានិភ័យក្នុងប្រទេសអាល្លឺម៉ង់ និង៥០,០០០កន្លែងទៀតក្នុងប្រទេសបារាំង ។
សេដ្ឋវិទូបានបន្ថែមទៀតថា ផលប៉ះពាល់ពី Brexit នេះមិនមែនមានតែការបាត់បង់ការងារទេ ។ ពួកគេបានបន្តថា «ព្រោះតែមានកង្វះពលករមានជំនាញជាច្រើនក្នុងប្រទេសអភិវឌ្ឍន៍ សហគ្រាសអាចនឹងព្យាយាមរក្សាបុគ្គលិកដោយកាត់បន្ថយម៉ោងធ្វើការ ឬបង្កើតទីផ្សារថ្មីៗជាដើម»។
គួរបញ្ជាក់ផងដែរថា វានៅមិនទាន់ប្រាកដប្រជានៅឡើយថាតើប្រទេសអង់គ្លេសអាចសម្រេចបានកិច្ចព្រមព្រៀងមួយជាមួយនឹង EU មុនពេលការចាកចេញជាផ្លូវការនៅថ្ងៃទី ២៩ខែមិនាឬទេបន្ទាប់ពីតំណាងរាស្ត្រភាគច្រើនកាលពីខែមុនប្រឆាំងនឹងកិច្ចព្រមព្រៀងរបស់លោកស្រីនាយករដ្ឋមន្ត្រី Theresa May ។សេដ្ឋវិទូបានកត់សម្គាល់ទៀតថា «ព្រោះតែទីផ្សារមានភាពតភ្ជាប់ជុំវុញពិភពលោក អ្នកផ្គត់ផ្គង់ក្រៅសហភាពអ៊ឺរ៉ុបក៏អាចទទួលរងការប៉ះពាល់ដែរ»។
ក្នុងប្រទេសទាំង ២៧នៅ EU មានការងារប្រមាណជិត ១៨០,០០០កន្លែងក្នុងក្រុមហ៊ុនដែលនាំចេញទៅកាន់ចក្រភពអង់គ្លេសដែលអាចជួបនឹងហានិភ័យ ។ ប៉ុន្តែពលករប្រមាណ ៤៣៣,០០០ នាក់បន្ថែមនៅ EU និងជុំវិញពិភពលោកនឹងទទួលរងការប៉ះពាល់ព្រោះក្រុមហ៊ុនរបស់ពួកគេលក់ទៅឲ្យក្រុមហ៊ុនដែលនាំចេញទៅកាន់ប្រទេសអង់គ្លេស ។
វិស័យរថយន្តរបស់ប្រទេសអាល្លឺម៉ង់នឹងទទួលរងការប៉ះពាល់ខ្លាំងជាងគេដែលអាចបង្កហានិភ័យដល់ការងារប្រមាណ ១៥,០០០ កន្លែងដែលភាគច្រើនក្នុងក្រុមហ៊ុន Volkswagen និង BMW ជាដើម ៕
ចែករំលែកព័តមាននេះ